جاردەماقى مەن زەينەتاقىنى ەسەپتەۋدە جاساندى ينتەللەكت قولدانىلا باستادى

استانا. KAZINFORM - قازاقستاندا الەۋمەتتىك تولەمدەردى تاعايىنداۋ جۇيەسى جاڭارتىلىپ، ەندى جاردەماقى مەن زەينەتاقىنى ەسەپتەۋدە جاساندى ينتەللەكت قولدانىلماق.

بۇل تۋرالى ق ر ەڭبەك جانە حالىقتى الەۋمەتتىك قورعاۋ ۆيتسە-ءمينيسترى باحتيار جازىقپايەۆ ورتالىق كوممۋنيكاتسيالار قىزمەتىندە وتكەن بريفينگىدە مالىمدەدى.

- بۇگىندە الەۋمەتتىك-ەڭبەك سالاسىنداعى 49 مەملەكەتتىك قىزمەتتىڭ 45 ءى ەلەكتروندىق فورماتتا كورسەتىلەدى، ونىڭ 28 ءى پرواكتيۆتى تۇردە ۇسىنىلادى. 2026-جىلعى 1-ناۋرىزداعى جاعداي بويىنشا 1,4 ميلليون قىزمەت كورسەتىلدى. ونىڭ 41 پايىزى ەلەكتروندى، 35 پايىزى پرواكتيۆتى فورماتتا جۇزەگە اسىرىلدى، - دەدى ول.

ۆيتسە-ءمينيستردىڭ ايتۋىنشا، قىزمەت كورسەتۋ جۇيەسى تولىق جاڭعىرتىلىپ جاتىر.

- الدىمەن قىزمەتتەر ەلەكتروندىق فورماتقا كوشىرىلدى، كەيىن موبيلدى قوسىمشالارعا ەنگىزىلدى. ودان سوڭ پرواكتيۆتى قىزمەت كورسەتۋ مەن تولەمدەردى اۆتوماتتى تۇردە تاعايىنداۋ ىسكە قوسىلدى. ەندى جاساندى ينتەللەكت قولدانۋ باستالدى. بۇل قىزمەت كورسەتۋدى تولىق اۆتوماتتاندىرىپ، ازاماتتارعا ىڭعايلى جۇيە قالىپتاستىرۋعا مۇمكىندىك بەرەدى، - دەدى باحتيار جازىقپايەۆ.

ونىڭ سوزىنشە، جاڭا تەحنولوگيالار قازىردىڭ وزىندە ءبىرقاتار باعىتتا قولدانىلىپ جاتىر.

- 2025-جىلى اتاۋلى الەۋمەتتىك كومەكتى تاعايىنداۋ، جۇمىسسىزداردى تىركەۋ جانە مۇگەدەكتىكتى بەلگىلەۋ وسى ءتاسىل ارقىلى جۇزەگە اسىرىلدى. ال 2026-جىلى زەينەتاقى مەن مەملەكەتتىك جاردەماقىلاردى تاعايىنداۋ، قانداس مارتەبەسىن بەرۋ جانە جۇمىسپەن قامتۋ شارالارىنا جولداۋ كەزىندە قولدانىلادى، - دەدى ول.

سونىمەن قاتار ۆيتسە-مينيستر جاساندى ينتەللەكت نەگىزىندە قالىپتاساتىن شەشىمدەر تۇپكىلىكتى ەمەس ەكەنىن اتاپ ءوتتى.

- بۇل شەشىمدەر ۇسىنىمدىق سيپاتتا بولادى جانە شەشىم قابىلداۋ ساپاسى مەن وبەكتيۆتىلىگىن ارتتىرۋ ءۇشىن پايدالانىلادى، - دەپ تۇيىندەدى ول.

ايتا كەتەيىك، بۇعان دەيىن ەڭبەك مينيسترلىگى ارناۋلى الەۋمەتتىك قىزمەتتەردىڭ اشىقتىعىن ارتتىرۋ ءۇشىن دەرەكقورلاردى بىرىكتىرۋ بويىنشا پيلوتتىق جوبا باستاعان ەدى.