جاراقاتىم ەل ايتقانداي اسا قاۋىپتى دەڭگەيدە ەمەس - ءابيبا ءابۋجاقىنوۆا
استانا. KAZINFORM - بارعان جارىسىنان جۇلدەسىز قايتپايتىن قازاقتىڭ قايسار قىزى ءابيبا ءابۋجاقىنوۆا وسىدان تۋرا ءبىر اپتا بۇرىن ازەربايجان استاناسى باكۋدە دزيۋدودان Grand Slam تۋرنيرىندە تاعى دا ەل قورجىنىنا جۇلدە سىيلاعان بولاتىن.
الايدا، كەشەلى-بەرى كەيبىر ب ا ق وكىلدەرى مەن الەۋمەتتىك جەلىلەردە «ءابيبانىڭ بىلتىر العان جاراقاتى ءالى جازىلماعان. وعان، ءتىپتى، وپەراتسيا جاساۋ كەرەك ەكەن» دەگەن اڭگىمەلەر جەلدەي ەسىپ كەتتى. وسىعان وراي KAZINFORM ءتىلشىسى سپورتشىنىڭ وزىنە ارنايى قوڭىراۋ شالىپ، ءىستىڭ انىق-قانىعىن ءبىلدى.
- ءابيبا، ءسىزدى باكۋدە وتكەن تۋرنيردەگى جەڭىسىڭىزبەن قۇتتىقتايمىز!
- راحمەت. الايدا، ول ءبىر كەرەمەتتەي جەتىستىك ەمەس. نەگىزى التىن الۋىم كەرەك ەدى. باكۋدەگى جەتىستىگىمە دە، پورتۋگالياداعى جەتىستىگىمە دە ءوزىمنىڭ كوڭىلىم تولعان جوق. سول جارىستاردا قاتەلىكتەرگە بوي الدىردىم. ارتىنان كۇرەستەرىمدى قايتا قاراپ، اناليز جاساپ، قاي جەردەن قانداي ولقىلىقتارعا بوي الدىرعانىمدى زەرتتەپ، سول قاتەلىكتەرمەن جۇمىس ىستەپ جاتىرمىن.
- ەندى تاشكەنتتە التىنعا تالاسۋعا مۇمكىندىك بار ما؟
- ارينە. بۇيىرسا، التىنعا تالاسامىن.
- كەيىنگى كەزدە الەۋمەتتىك جەلىلەردە، سونداي-اق كەيبىر ينتەرنەت باسىلىمدارىندا ءسىزدىڭ دەنساۋلىعىڭىز تۋرالى كوپ ايتىلىپ كەتتى. «ءابيبانىڭ بىلتىر العان جاراقاتى ءالى جازىلماعان. وعان، ءتىپتى، وپەراتسيا جاساۋ كەرەك ەكەن» دەگەن اڭگىمەلەر جەلدەي ەسىپ ءجۇر. ءسىز بۇل اقپاراتتى قانشالىقتى راستايسىز؟
- مەن جارىسقا مۇلدە جاراماي قالعان جوقپىن. وتكەندە ءبىر جۋرناليسكە بەرگەن سۇحباتىمدا ازداپ يىعىم اۋىراتىنىن ايتقانىم راس. ءبىراق، ول مەنىڭ سوزدەرىمدى بۇرمالاپ، «ءابيباعا يىعىنا وپەراتسيا جاساتۋ كەرەك» دەپ جازىپ جىبەرىپتى. ەگەر، مەنىڭ يىعىم سول جۋرناليست ايتقانداي اسا قيىن دەڭگەيدە بولسا، وندا جارىستارعا قاتىسۋدان باس تارتار ەدىم عوي. مەندە عانا ەمەس، سپورتپەن كاسىبي تۇردە اينالىسىپ جۇرگەن بارلىق ارىپتەسىمدە كىشىگىرىم جاراقاتتار بار. ونداي كەزدە تاڭىپ نە بۋىپ الىپ، جارىسقا شىعامىز، كۇرەسەمىز. قازىر مەنىڭ يىعىمداعى جاراقاتىم 20 پايىز ەمدەلۋدى قاجەت ەتەدى. 80 پايىز كۇرەسۋگە دايىنمىن.
- دزيۋدوشىلاردىڭ دەنساۋلىعىن قاداعالاۋعا ءار جارىسقا دارىگەرلەر بىرگە بارا ما؟
- وسىعان دەيىنگى جارىستاردا بىزبەن بىرگە جارىستارعا دارىگەرلەر بارمادى. وسى جولى تاشكەنتتە وتەتىن تۋرنيرگە بىزبەن بىرگە ىلەسىپ كەلدى.
- پاريج وليمپياداسى الدىندا سپورتشىلارعا بارلىق جاعدايدى جاساۋدى ماقسات ەتىپ، ارنايى «دايىندىق شتابى» قۇرىلعان ەدى. شتاپ سىزدەرگە وليمپياداعا الاڭسىز جاتتىعۋعا قانداي مۇمكىندىكتەر جاساپ جاتىر؟
- ازىرگە ءوز باسىم دايىندىق شتابىنىڭ ايىرىقشا قامقورلىعىن سەزىنە قويعان جوقپىن. جالپى قۇراماداعى قىزدارمەن بىرگە ورتاق وقۋ-جاتتىعۋ جيىندارىن وتكىزۋدەمىز.
- اڭگىمەڭىزگە راحمەت!
اۆتور
كۇنسۇلتان وتارباي
