جانىبەك ءالىمحان ۇلى «كانەلومەن» جەكپە-جەككە قاتىستى مالىمدەمە جاسادى
استانا. قازاقپارات - WBO جانە IBF تۇجىرىمى بويىنشا ورتا سالماقتاعى الەم چەمپيونى جانىبەك ءالىمحان ۇلى كاسىپقوي بوكستاعى باستى ماقساتى - ءتورت تۇجىرىم بويىنشا چەمپيون اتانىپ، تاريحتا قالعىسى كەلەتىنىن جەتكىزدى. بۇل تۋرالى Sports.kz جازدى.
«مەن ءتورت تيتۋلعا يە بولۋ جانە ابسوليۋتتى چەمپيون اتانۋ ءۇشىن ءبارىن جاساۋعا دايىنمىن. ءبىز دۇنيە جۇزىنە تانىمال بولۋ ءۇشىن ايانباي ەڭبەكتەنۋدەمىز جانە سول ءۇشىن قولىمىزدان كەلگەننىڭ ءبارىن ىستەيمىز. بۇل دارەجەگە جەتۋ جولىندا مەن مىقتىلارمەن، تانىمال بوكسشىلارمەن جەكپە-جەك وتكىزۋىم كەرەك. الداعى ۋاقىتتا كانەلو الۆارەس، داۆيد بەناۆيدەس سىندى جۇلدىزدارمەن جۇدىرىقتاسۋدى جوسپارلاپ وتىرمىز»، - دەدى ءالىمحان ۇلى Boxingscene.com سايتىنا بەرگەن سۇحباتىندا.
ايتا كەتەيىك، جانىبەك ءالىمحان ۇلى 14-شىلدە كۇنى تاڭەرتەڭ لاس- ۆەگاس قالاسىندا شارشى الاڭعا شىعىپ، جاڭازەلانديالىق بوكسشى اندرەي ميحايلوۆيچپەن جەكپە- جەك وتكىزەدى.
