جانازا كەزىندە اس بەرۋگە تىيىم سالىندى

استانا. KAZINFORM - ازەربايجاننىڭ كەيبىر وڭىرلەرىندە اقساقالدار جانازادا داستارقاندى اس تا توك ەتىپ جايماي، تەك شايمەن شەكتەۋ تۋرالى باستاما كوتەردى.

بۇل شەشىم - قارالى جيىندار كەزىندە ىسىراپشىلدىق پەن كوزبوياۋشىلىققا جول بەرمەۋ ماقساتىندا قابىلدانعان، دەپ حابارلايدى El.kz ينتەرنەت پورتالى.

Oxu.Az مالىمەتىنشە، بۇعان دەيىن ازەربايجاندا قايتىس بولعان ادامدى ەسكە الۋ راسىمدەرىندە مول داستارقان جايىلىپ، ءتۇرلى ەت تاعامدارى مەن تاتتىلەر ۇسىنىلاتىن. الايدا كوپشىلىكتىڭ پىكىرىنشە، بۇل ءداستۇر قارالى كوڭىل كۇيگە ساي كەلمەيتىن، ءارى كەي وتباسىلار ءۇشىن اۋىر قارجىلىق جۇكتەمە بولاتىن.

اتاپ ايتقاندا، سااتلى اۋدانىندا جەرگىلىكتى اقساقالدار داستارقاندى مول جايۋ داستۇرىنەن باس تارتىپ، قارالى جيىنداردى تەك شاي ءىشۋ فورماتىنا كوشىرۋ تۋرالى شەشىم قابىلدادى. مۇنداي باستامالار قازىرگى ۋاقىتتا ازەربايجاننىڭ وزگە وڭىرلەرىندە دە قولعا الىنۋدا.

ءداستۇرلى تۇردە ازەربايجانداعى جانازا داستارقانىنا پالاۋ، دولما سىندى ەت تاعامدارى، ءتۇرلى تاتتىلەر مەن سۋسىندار - جەمىس شىرىندارى، قارا جانە جەمىس شايلارى، مينەرالدى سۋ ۇسىنىلاتىن. الايدا سوڭعى ۋاقىتتا ءۇردىس وزگەرىپ، جانازا داستارقانى قاراپايىم، رۋحاني مازمۇنعا كوبىرەك باسىمدىق بەرىلۋدە.