جانارماي باعاسىن كورشى ەلدەرمەن تەڭەستىرەمىز - رومان سكليار

استانا. KAZINFORM - پرەمەر-ءمينيستردىڭ ءبىرىنشى ورىنباسارى رومان سكليار ۇكىمەت ۇيىندەگى باسپا ءسوز ءماسليحاتىندا قازاقستانداعى جانارماي باعاسى كورشى ەلدەردەگى باعامەن تەڭەستىرلەتىنىن ايتتى.

- ءبىز قازىر جىلىنا 90 ميلليون توننادان استام مۇناي وندىرەتىن ەلمىز. ءبىراق مۇناي ونىمدەرىن جەتكىلىكتى دەڭگەيدە وڭدەپ وتىرعان جوقپىز. 2017-2019 -جىلدارى ءبىز جانار- جاعارماي ءوندىرۋ كولەمىن ەداۋىر ارتتىرا وتىرىپ، ءۇش زاۋىتتى قايتا قۇرۋدى اياقتادىق. جانارماي تۇرلەرىن ايتساق، بەنزين، ديزەل جانە اۋە كەروسينى بويىنشا تاپشىلىق 2019 -جىلعا قاراي توقتادى. الايدا، اۋە كەروسينىن تۇتىنۋدىڭ ايتارلىقتاي وسكەنىن ەسكەرسەك، تاپشىلىق بايقالىپ وتىر، - دەدى رومان سكليار.

ۆيتسە-پرەمەر جانار- جاعارمايدىڭ باعاسىن كورشى نارىقتارعا جاقىنداتۋ ساياساتى ءجۇرىپ جاتقانىن ەسكە سالدى.

- ءبىز جانارماي سىرتقا ساتىلىپ كەتپەۋ ءۇشىن باعاسىن بىرتىندەپ كورشىلەس ەلدەرمەن تەڭەستىرەمىز. ال ىشكى ءوندىرىس ۇلعايتۋ جوسپارىنا كەلسەك، شىمكەنت مۇناي وڭدەۋ زاۋىتىنىڭ ەكىنشى كەزەگىن سالۋ جوسپارلانىپ وتىر. بۇل شىمكەنتتە مۇناي وڭدەۋ كولەمىن 6 ميلليون توننادان 12 ميلليون تونناعا دەيىن ۇلعايتۋعا مۇمكىندىك بەرەدى. سونداي-اق، پاۆلودار جانە اتىراۋ زاۋىتتارىنىڭ قۋاتىن ارتتىرۋ باعىتىندا ءىس-شارالار قولعا الىنادى، - دەدى پرەمەر-ءمينيستردىڭ ءبىرىنشى ورىنباسارى.

ايتا كەتەيىك، كەشە رومان سكليار Airbus-تىڭ ەۋروپا بويىنشا پرەزيدەنتى جوان پەليسەمەن اۆياتسيا سالاسىنداعى ىنتىماقتاستىقتى دامىتۋ جايىن تالقىلاپ، قازاقستان اۋماعىندا ازاماتتىق جانە مەملەكەتتىك اۆياتسيا ۇشاقتارىن جوندەۋ مەن قىزمەت كورسەتۋ ورتالىعىن اشۋ قاجەتتىگىن مالىمدەگەن بولاتىن.

اۆتور

ەسىمجان ناقتىباي