جانۋارلاردان 1300 دەن استام ادام زارداپ شەكتى

ورال. KAZINFORM - باتىس قازاقستان وبلىسىندا جانۋارلاردان زارداپ شەككەن ادامدار سانى كوبەيدى.

ب ق و سانيتاريالىق- ەپيدەميولوگيالىق باقىلاۋ دەپارتامەنتىنىڭ باسشىسى دينارا جاڭابەرگەنوۆانىڭ ءمالىم ەتكەنىندەي، بيىلعى التى ايدا جانۋارلاردان جاراقات العان 1333 ادام مەديتسينالىق كومەككە جۇگىندى.

ونىڭ سوزىنە قاراعاندا، بۇل وتكەن جىلعى وسى كەزەڭدەگىدەن (1296) اسىپ كەتىپ وتىر.

- سونىڭ ىشىندە 942 ادامدى ءيت قاپقان. 341 ى مىسىقتان، تورتەۋى جىلقىدان، 10 ى ءىرى قارادان، 35 ى باسقا جانۋارلاردان زارداپ شەكتى. دەگەنمەن ادامدار اراسىندا قۇتىرما اۋرۋى تىركەلگەن جوق، - دەدى د. جاڭابەرگەنوۆا.

دەپارتامەنت باسشىسىنىڭ ايتۋىنشا، بيىل اقجايىق، بايتەرەك، قاراتوبە جانە تاسقالا اۋدانىندا 4 ادامنىڭ برۋتسەللەزگە شالدىققانى تىركەلدى. بۇل 100 مىڭ تۇرعىنعا شاققاندا، 0,6 دان كەلەدى. بارلىق جاعدايدا اۋرۋ melitensis قوزدىرعىشىنان تۋىنداعان جانە ادامدار مالمەن تىعىز قارىم-قاتىناس جاساعان كەزدە جۇقتىرعان.

وتكەن جىلعى وسى كەزەڭمەن سالىستىرعاندا، برۋتسەللەز 16 دەرەككە كەمىگەنىمەن، وڭىردە ءالى دە كەزدەسىپ وتىر.

- برۋتسەللەزدىڭ الدىن الۋ ءۇشىن مالدى جىل سايىن تەكسەرۋدەن وتكىزۋ قاجەت. سونداي-اق جەكە قورعانىش قۇرالدارىن قولدانىپ، مال دارىگەرىنىڭ رۇقساتىنسىز ەت پەن ءسۇتتى ساتپاۋ كەرەك. وعان قوسا ونىمدەردى تەك رۇقسات ەتىلگەن ورىنداردان ساتىپ الۋ ماڭىزدى، - دەدى د. جاڭابەرگەنوۆا.