جامبىل وبلىسىنداعى اتىس: ەكى ادام جانساقتاۋ بولىمىندە جاتىر
استانا. KAZINFORM - جامبىل وبلىسىنداعى اتىس كەزىندە جاراقات العان ءتورت ادامنىڭ ەكەۋىنىڭ جاعدايى اۋىر. ولارعا بىرنەشە رەت وق تيگەن، پىشاق جاراقاتتارى انىقتالعان. سونىمەن قوسا بىرنەشە جەرى سىنعان، دەپ حابارلايدى Kazinform ءتىلشىسى.

قالعان ەكى زارداپ شەككەن ادامنىڭ جاعدايى تۇراقتى، الايدا ولار دا دارىگەرلەردىڭ باقىلاۋىندا.
جامبىل وبلىستىق دەنساۋلىق ساقتاۋ باسقارماسىنىڭ مالىمەتىنشە، شىلدەنىڭ 29-ى كۇنى بولعان وقيعادا جاراقات العان ءتورت ادام مويىنقۇم اۋداندىق ورتالىق اۋرۋحاناسىنا جەتكىزىلگەن. ولار ءارتۇرلى اۋىر جاراقاتتار العان - باس-سۇيەك- مي جاراقاتتارىنان باستاپ، كوپتەگەن وق تيۋ مەن پىشاق جاراقاتتارىنا دەيىن. بارلىق ناۋقاسقا شۇعىل مەديتسينالىق كومەك كورسەتىلگەن، سونىڭ ىشىندە حيرۋرگيالىق ەم جۇرگىزىلدى. قازىر ناۋقاستاردىڭ جاعدايىنا تۇراقتى باقىلاۋ جۇرگىزىلىپ جاتىر.
-ءبىرىنشى بولىپ، ساعات 21:10- دا 28 جاستاعى ەر ادام جانساقتاۋ بولىمىنە تۇسكەن. دارىگەرلەر ونىڭ باس سۇيەگىنىڭ اشىق جاراقاتىن، ميىنىڭ زاقىمدانۋىن، رەزەڭكە وق تيگەن جاراقاتتارىن (باسىنىڭ جوعارعى بولىگى، كەۋدە تۇسى، وڭ بىلەگى)، سونىمەن قاتار، سوعىلىپ، جىرتىلعان جاراقاتتاردى، ەكى سانىندا كوپتەگەن پىشاق جاراقاتتارىن، سىرتقى قان كەتۋ مەن 2- دارەجەلى تراۆماتيكالىق شوكتى تىركەگەن. تاڭەرتەڭ دارىگەرلەر ونىڭ جاعدايىن اۋىر دەپ باعالاعان. مەديتسينا قىزمەتكەرلەرىنىڭ ايتۋىنشا، بۇل جاعداي جاراقاتتاردىڭ كۇردەلى جيىنتىعىمەن بايلانىستى، دەگەنمەن جاعىمسىز ديناميكا بايقالمايدى. دەگەنمەن ومىرلىك ماڭىزدى كورسەتكىشتەرى - قان قىسىمى، پۋلس، دەنە قىزۋى، تىنىس الۋ جانە وتتەگىمەن قانىعۋى - قالىپتى دەڭگەيدە، - دەلىنگەن حابارلامادا.
ەكىنشى بولىپ، ساعات 22:10 شاماسىندا 26 جاستاعى ەر ادام جەتكىزىلدى. ونىڭ سول جاق بىلەگى، سانى جانە وڭ قولىندا وق تيگەن بىتىرالى جاراقاتتار انىقتالعان. سونىمەن قاتار، وڭ قولىنىڭ ەكىنشى ساۋساعىندا جانشىلعان اشىق سىنىق بار. بۇدان بولەك، سول جاق سانىنىڭ جاناي تيگەن وق جاراقاتى، وڭ جاق سانىنىڭ تۇيىق (وق كىرىپ، شىقپاعان) جاراقاتى جانە سول بىلەكتىڭ تەسىپ وتكەن وق جاراقاتى تىركەلگەن. العاشقى حيرۋرگيالىق وڭدەۋدەن كەيىن ونىڭ جاعدايى اۋىر، ءبىراق تۇراقتى دەپ باعالاندى. ومىرلىك ماڭىزدى كورسەتكىشتەرى تۇراقتى.
قالعان ەكى ادام حيرۋرگيا بولىمىندە جاتىر. ولاردىڭ ءبىرى ماڭداي- توبە تۇسىنان سوعىلىپ، جىرتىلعان جارا السا، ەكىنشىسى وڭ قولىنان تۇيىق وق جاراقاتىن العان. ەكەۋىنىڭ دە جاعدايى تۇراقتى، ولار دارىگەرلەردىڭ باقىلاۋىندا.
بۇعان دەيىن جامبىل وبلىسىندا اتىس بولىپ، ءتورت ادام جاراقاتتانعانى حابارلانعان ەدى.