جامبىل وبلىسىندا بولات وندىرەتىن جاڭا زاۋىتتىڭ قۇرىلىسى باستالدى
تاراز. KAZINFORM - مەملەكەت باسشىسىنىڭ ەكونوميكانى ءارتاراپتاندىرۋ جانە ينۆەستيتسيا تارتۋ بويىنشا تاپسىرماسىنا سايكەس جامبىل وبلىسىندا وڭدەۋ ونەركاسىبىندەگى جوبالاردى قولداۋ بويىنشا كەشەندى جۇمىستار جۇزەگە اسىرىلىپ جاتىر.
سونداي جوسپارلى جوبالاردىڭ ءبىرى - شۋ اۋدانىنداعى «جىبەك جولى» ارنايى ەكونوميكالىق ايماعىنىڭ اۋماعىنداعى مەتاللۋرگيالىق زاۋىت. كاسىپورىن قۇرىلىسىنىڭ باستالۋ سالتاناتىنا جامبىل وبلىسىنىڭ اكىمى ەربول قاراشوكەيەۆ قاتىستى.
قىتايدىڭ جەتەكشى مەتاللۋرگيالىق كومپانياسى - Fujian Hengwang Investment Co.، Ltd وندىرىستىك قۋاتى جىلىنا 3 ميلليون تونناعا دەيىن جەتەتىن مەتاللۋرگيالىق زاۋىت سالادى. ينۆەستيتسيا كولەمى - 564 ميلليارد تەڭگەنى قۇرايدى. جوبا اياسىندا 2,5 مىڭ جۇمىس ورنى اشىلادى. العاشقى كەزەڭدە 1000-نان استام ادام جۇمىسپەن قامتىلادى.
كومپانيا ۇلكەن تاجىريبەسىن پايدالانا وتىرىپ، ساپالى جانە باسەكەگە قابىلەتتى ءونىم ءوندىرۋ ءۇشىن تەمىر رۋداسىن تەرەڭ وڭدەۋدىڭ تولىق سيكلىن جولعا قويۋعا نيەتتى:
- ءبىرىنشى كەزەڭدە 1 ميلليون تونناعا دەيىن ارماتۋرا، سوزبا سىم، بۇرىشتى بولات.
- ەكىنشى كەزەڭدە 2 ميلليون توننا پروفيلدى جانە جولاقتى بولات شىعارىلادى.
كاسىپورىندا تەمىردى تىكەلەي قالپىنا كەلتىرۋ تەحنولوگياسى ەنگىزىلەدى. بۇل - ءونىم قۇرامىنداعى تەمىردىڭ جوعارى مولشەردە ساقتالۋىن قامتاماسىز ەتەدى. ونەركاسىپتە عىلىمي ءتاسىل مەن زاماناۋي تەحنولوگيالاردىڭ ءتيىمدى ۇيلەسۋى ءوندىرىستىڭ ەكولوگيالىق تۇراقتىلىعىن ارتتىرا تۇسەدى.
زاۋىتتى ىسكە قوسۋ - ساباقتاس سالالاردىڭ دامۋىنا بەرىك نەگىز قالاپ، ءوڭىردىڭ ەكسپورتتىق مۇمكىندىكتەرىن ارتتىرىپ، جاڭا جۇمىس ورىندارىن اشۋعا مۇمكىندىك بەرەدى.
- مەملەكەت باسشىسى قاسىم-جومارت كەمەل ۇلى توقايەۆ پەن ەل ۇكىمەتىنىڭ قولداۋىنىڭ ارقاسىندا وڭىردە قولايلى ينۆەستيتسيالىق احۋال قالىپتاسىپ، ءىرى حالىقارالىق جوبالار ىسكە اسىرىلىپ جاتىر. ەكونوميكانىڭ ستراتەگيالىق سالالارى جۇيەلى تۇردە دامىپ كەلەدى. جامبىل وبلىسىنىڭ ينۆەستيتسيالىق قورجىنىندا جالپى قۇنى 3,6 تريلليون تەڭگە بولاتىن، 10 مىڭنان استام جۇمىس ورنىن قۇرۋدى كوزدەيتىن 82 جوبا بار. 2025 -جىلى جالپى سوماسى 175,2 ميلليارد تەڭگەگە 30 جوبانى ىسكە اسىرۋ جوسپارلانعان. بيىلعى جىلدىڭ ءبىرىنشى توقسانىندا وتكەن جىلدىڭ سايكەس كەزەڭىمەن سالىستىرعاندا 37,1 پايىزعا كوپ ينۆەستيتسيا تارتىلدى. بۇگىنگى جوبا - مەملەكەت پەن بيزنەس اراسىنداعى تابىستى ىنتىماقتاستىقتىڭ جارقىن ۇلگىسى، جاڭا مۇمكىندىكتەر مەن تۇراقتى ءوسۋدىڭ سيمۆولى، - دەدى وبلىس اكىمى.
«Fujian Hengwang Investment Co.، Ltd» كومپانياسىنىڭ باسقارما ءتوراعاسى جەن جاۋشيان مەملەكەت تاراپىنان كورسەتىلگەن قولداۋعا العىسىن ءبىلدىرىپ، جوبا قازاقستان مەن قىتاي اراسىنداعى بايلانىستى نىعايتۋداعى قوسىمشا دانەكەر بولاتىنىنا سەنىم ءبىلدىردى.
