جامبىل وبلىسىندا گازعا باي شوگىندى تابىلدى

استانا. قازاقپارات - «QazaqGaz» ۇلتتىق كومپانياسى» اكسيونەرلىك قوعامىنىڭ باسقارما ءتوراعاسى الىبەك جاماۋوۆ جامبىل وبلىسىندا تاعى ءبىر الەۋەتتى گاز كەنىشىن بارلاۋ جۇمىستارىنا دايىنداق باستالعانىن ءمالىم ەتتى.

- گەولوگيالىق بارلاۋ جۇمىستارىنىڭ ناتيجەسىندە جامبىل وبلىسىنىڭ مالدىباي ۋچاسكەسىندە گاز شوگىندىسى بار ەكەنىن دالەلدەندى. قازىر سەيسميكالىق بارلاۋ جۇمىستارىنا دايىندىق ءجۇرىپ جاتىر، - دەدى الىبەك جاماۋوۆ «سامۇرىق- قازىنا» قورى قوعامدىق كەڭەسىنىڭ وتىرىسىندا.

سونداي-اق، ول اتالعان وبلىستاعى اناباي ۋچاسكەسىنە دە توقتالدى.

- جامبىل وبلىسىنىڭ اناباي كەن ورنىندا جۇمىس جالعاسىپ جاتىر. گاز ساپاسىن باعالاۋعا ارنالعان 1 ۇڭعىما، پايدالانۋعا ارنالعان 3 ۇڭعىما بۇرعىلاندى. دالەلدەنگەن گاز قورى - 3,2 ميلليارد تەكشە مەتر، - دەدى ۇلتتىق كومپانيا باسشىسى.