قازاقستاندا تاعى ءبىر جول اقىلى بولادى
استانا. قازاقپارات – 2025-جىلعى 26-قاڭتاردان باستاپ قىزىلوردا - ارال تاسجولى اقىلى بولادى، - دەپ حابارلايدى «قازاۆتوجول» ۇلتتىق كومپانياسىنىڭ باسپا ءسوز قىزمەتى.

كولىك مينيسترلىگىنىڭ 2025-جىلعى 9-قاڭتارداعى 6-بۇيرىعىنا سايكەس قىزىلوردا مەن ارال قالالارىن بايلانىستىراتىن اۆتوجول اۆتوبۋس پەن جۇك كولىكتەرى ءۇشىن اقىلى بولادى. دالىرەك ايتقاندا، Ⅱ تەحنيكالىق ساناتتاعى ۇزىندىعى 454 شاقىرىم جول ۋچاسكەسى اقى الۋ جۇيەسىنە 2025-جىلعى 26-قاڭتاردان باستاپ ىسكە قوسىلادى.
«رەسپۋبليكالىق ماڭىزى بار ر ف شەكاراسى (سامارا) - شىمكەنت اۆتوجولىنىڭ قىزىلوردا - ارال ۋچاسكەسىندە 6 باقىلاۋ اركا جانە كليەنتتەرمەن جۇمىس ىستەيتىن ورتالىق بار. اركالاردا ورناتىلعان كامەرالار اقىلى ۋچاسكەلەردە اۆتوموبيلدەردىڭ قوزعالىسىن، ولاردىڭ جىلدامدىعى مەن قارقىندىلىعىن، جولداعى جاعدايدى جانە تاعى باسقانى تىركەيدى. سونداي-اق ۋچاسكەدەگى جاعدايدى kaztoll.kz سايتىنداعى «ونلاين ترانسلياتسيا» بولىمىندە كورۋگە بولادى»، - دەپ حابارلادى كومپانيا.
«قازاۆتوجولدىڭ» مالىمەتىنشە، اۆتوجولدا تولەم بەكەتتەرى بولمايدى، ونىڭ ورنىنا ىڭعايلى «اشىق» تولەم جۇيەسى قولدانىلادى. شلاگباۋمدار مەن وتكىزۋ پۋنكتتەرى قويىلماعاندىقتان كەپتەلىستەر بولمايدى، بۇل قوسىمشا قاۋىپسىزدىكتى قامتاماسىز ەتىپ، ساپار ۋاقىتىن قىسقارتادى.
جول ءجۇرۋ تولەمى قولما-قول اقشاسىز جۇرگىزىلەدى. پايدالانۋشىلاردىڭ قولايلىعى ءۇشىن تولەم جاساۋدىڭ 10 عا جۋىق ءادىسى بار: Payway.kz سايتىندا، ينتەرنەت-بانكينگتەر، تولەم تەرمينالدارى مەن ەلەكتروندىق ءامياندار، ۇيالى تەلەفون بالانسىنان، 100 جانارماي كارتاسى ارقىلى جانە زاڭدى تۇلعالارمەن كەلىسىم شارت جاساۋ.
«الدىن الا تولەم الدەقايدا ارزان بولعاندىقتان، تولەماقىنى ۋاقىتىلى جاساۋعا كەڭەس بەرەمىز»، - دەلىنگەن حابارلامادا.
ءبىر باعىتتاعى (454 شاقىرىم) تولەم مولشەرى:
16 ورىنعا دەيىنگى اۆتوبۋستار جانە جۇك كوتەرگىشتىگى 2,5 تونناعا دەيىنگى جۇك اۆتوموبيلدەرى ءۇشىن الدىن الا تولەم - 2840 تەڭگە، كەيىنگى تولەم - 3330 تەڭگە؛
32 ورىنعا دەيىنگى اۆتوبۋستار جانە جۇك كوتەرگىشتىگى 5,5 تونناعا دەيىنگى جۇك اۆتوموبيلدەرى ءۇشىن الدىن الا تولەم - 5750 تەڭگە، كەيىنگى تولەم - 6740 تەڭگە؛
32 ورىننان اساتىن اۆتوبۋستار جانە جۇك كوتەرگىشتىگى 10 تونناعا دەيىنگى اۆتوپويىزدار ءۇشىن الدىن الا تولەم - 8570 تەڭگە، كەيىنگى تولەم - 10100 تەڭگە؛
جۇك كوتەرگىشتىگى 10 توننادان جوعارى جانە 15 تونناعا دەيىنگى جۇك اۆتوموبيلدەرى ءۇشىن الدىن الا تولەم - 11470 تەڭگە، كەيىنگى تولەم - 13470 تەڭگە؛
جۇك كوتەرگىشتىگى 15 توننادان جوعارى جۇك اۆتوموبيلدەرى، ونىڭ ىشىندە تىركەلگىش جانە ەرشىكتى تارتقىشتار ءۇشىن الدىن الا تولەم - 14290 تەڭگە، كەيىنگى تولەم - 16830 تەڭگە.
ايتا كەتەيىك، جەڭىل كولىك يەلەرى قىزىلوردا - ارال تاسجولىن تەگىن پايدالانادى. جەرگىلىكتى تۇرعىندار ءۇشىن ءبىر ايلىق جانە ءبىر جىلدىق ابونەمەنتتەر قاراستىرىلعان.