جالعان تاريح جاساۋدىڭ قاجەتى جوق - ءماجىلىس دەپۋتاتى

استانا. KAZINFORM - تاريح شىندىعىن مويىنداۋ ۇلى حالىقتاردىڭ عانا قولىنان كەلەدى. مۇنداي پىكىردى ءماجىلىس دەپۋتاتى ەدىل جاڭبىرشين ءبىلدىردى.

- جالعان تاريح جاساپ قاجەتى جوق. ەرتەڭ اشكەرە بولىپ قالادى. سوندىقتان باردى بار، جوقتى جوق دەپ جازۋ كەرەك. بولماعان دۇنيەنى بولدى دەپ قاتتى اسىرەلەۋدەن، «وسى دۇنيەدە تەك ءبىز مىقتى مەملەكەتپىز، حالىقپىز» دەپ اسىرا سىلتەۋشىلىكتەن اياعىمىزدى تارتۋىمىز قاجەت. ەڭ باستىسى اقتاڭداقتىڭ ءبارىن ءادىل كورسەتىپ، اشىق ايتۋىمىز قاجەت. ءتىپتى كەي جەردە جىبەرگەن قاتەلىكتەرىمىز ءۇشىن دە كەشىرىم سۇراۋىمىز كەرەك شىعار. سەبەبى تاريح شىندىعىن، ادىلدىگىن مويىنداۋ ۇلى حالىقتاردىڭ عانا قولىنان كەلەدى، - دەدى ەدىل جاڭبىرشين.

وسى ورايدا ءماجىلىس دەپۋتاتى قازاق حالقىنىڭ تاريحىندا ۇلى جەڭىستەردىڭ دە از بولماعانىن باسا ايتتى.

- سونىڭ ارقاسىندا وسىنداي ۇلعانعايىر جەردى الىپ قالدىق. سونىڭ ارقاسىندا وسى كۇنگە دەيىن مەملەكەت بولىپ ءومىر ءسۇرىپ كەلەمىز. ءتىلىمىزدى دە، ءدىنىمىزدى دە، ءدىلىمىزدى دە جوعالتپادىق. ارينە، بىزدە جەڭىلىستەر دە بولدى. ونى جاسىرماۋىمىز قاجەت. ەرتەڭ قايتالاماس ءۇشىن ساباق بولۋى ءتيىس. سوندىقتان تاريح ءادىل، شىن جازىلۋى ءتيىس دەپ ەسەپتەيمىن، - دەدى ول.

بۇعان دەيىن ەدىل جاڭبىرشين ەلىمىزدىڭ ىشكى ساياساتىنداعى شارۋانىڭ ءبارىن جۇيەلەيتىن ءبىرتۇتاس تۇجىرىمدامالىق قۇجات دوكترينا نە ستراتەگيا بولۋى تيىستىگىن ايتقان ەدى.