جاعاجايعا كىرۋ ءۇشىن اقى تولەۋ كەرەك پە؟
استانا. KAZINFORM - ەلىمىزدە جاعاجايلارعا كىرۋ ماسەلەسى ۋشىعىپ بارادى. زاڭ بويىنشا ازاماتتار سۋ ايدىندارىنا ەركىن ءارى تەگىن قول جەتكىزۋگە ءتيىس بولسا، ءىس جۇزىندە كوپتەگەن جاعاجايلار قورشالىپ، كىرۋ ءۇشىن اقى تالاپ ەتىلەدى، دەپ حابارلايدى El.kz ينتەرنەت پورتالى.
سۋ - حالىقتىڭ ورتاق مەنشىگى
زاڭگەر ءارى بلوگەر بولات باشجانوۆ قازاقستاندىقتارعا ەلىمىزدەگى بارلىق جاعاجايلاردا سۋعا قول جەتكىزۋ اقىسىز ەكەنىن ەسكە سالدى. ول بۇل ماسەلەنى Instagram-دا كوتەرىپ، سۋ ايدىندارىنا قاتىستى ازاماتتاردىڭ قۇقىعىن ءتۇسىندىردى.
بلوگەر وتباسىمەن بىرگە بۋراباي كەنتىندەگى جەكەمەنشىك جاعاجاي اۋماعىنا بارماق بولىپ، بەينەروليك تۇسىرگەن. قورشاۋعا جاقىنداي بەرگەندە، دەمالىس ورنىنىڭ قىزمەتكەرى جولىن بوگەپ، جاعاجايعا كىرۋ ءۇشىن ەرەسەكتەردەن - 4000 تەڭگە، بالالاردان - 2000 تەڭگە تالاپ ەتكەن. زاڭگەر دەرەۋ پوليتسيا شاقىرىپ، زاڭ بۇزۋشىلىق فاكتىسى بويىنشا حاتتاما تولتىرۋدى سۇراعاننان كەيىن عانا وعان كەدەرگىسىز وتۋگە رۇقسات بەرىلگەن.
بۇل اۋماق جەكەمەنشىككە تيەسىلى بولسا دا، قازاقستاندا سۋعا قول جەتكىزۋدى ەشكىم شەكتەي المايدى. بۇل - سۋ كودەكسىنىڭ 1-بابىندا انىق جازىلعان، - دەدى بولات باشجانوۆ.
بۇل پىكىردى زاڭگەر الىشەر قادىربەكوۆ تە راستادى. ونىڭ ايتۋىنشا، ازاماتتىعىنا قاراماستان، ءاربىر ادام سۋ ايدىنىنا ەركىن جاقىنداۋعا قۇقىلى. جاعالاۋ جەكەمەنشىك مەنشىكتە نەمەسە جالعا بەرىلگەن بولۋى مۇمكىن، ءبىراق سۋدىڭ ءوزى - قازاقستان حالقىنا تيەسىلى. سوندىقتان وعان قول جەتكىزۋدى شەكتەۋ - زاڭعا قايشى. مۇنداي شەكتەۋگە تەك سانيتارلىق نەمەسە ەكولوگيالىق قاۋىپ تونگەن جاعدايدا عانا رۇقسات بەرىلەدى. ال تولەم تەك قوسىمشا قىزمەتتەرگە - مىسالى، شەزلونگ، كۇركە نەمەسە وزگە دە دەمالىسقا ارنالعان جايلىلىق ءۇشىن عانا الىنۋى مۇمكىن.
الىشەر قادىربەكتىڭ ايتۋىنشا، ازاماتتار جاعاجايعا ءوز تاعامى مەن سۋسىنىن الا بارۋعا تولىق قۇقىلى، ءبىراق تازالىق ساقتاۋ - ءاربىر ادامنىڭ مادەنيەتتىلىك دەڭگەيىن كورسەتۋ مىندەتى.
ادام ءوز تاعامى مەن سۋسىنىن الىپ كەلە الادى. ويتكەنى بۇل - ونىڭ جەكە مەنشىگى. ال تابيعي سۋ ايدىنىنا تىكەلەي ىرگەلەس جاعاجاي - جەكەمەنشىك اۋماق بولىپ سانالمايدى. ياعني، جاعاجايدى شارتتى تۇردە يەلەنىپ وتىرعان تۇلعا دەمالۋشىلاردان اقىلى شارتتاردى ورىنداۋدى زاڭدى تۇردە تالاپ ەتە المايدى، - دەپ ءتۇسىندىردى ول.
سونىمەن قاتار، سۋ قورعاۋ ايماعىندا شاتىر تىگۋگە رۇقساتسىز جول بەرىلمەيدى، سەبەبى بۇل ەكولوگيالىق رەجيمدى بۇزۋى مۇمكىن. ال جاعاجايعا اۆتوكولىكپەن تەك ارنايى جولدار ارقىلى كەلۋگە رۇقسات بار، الايدا جاعالاۋ جولاعىنا تىكەلەي كىرۋگە تىيىم سالىنعان.
زاڭگەرلەر ازاماتتاردى ءوز قۇقىقتارىن بىلۋگە جانە سۋ كودەكسى مەن كونستيتۋتسياعا سۇيەنە وتىرىپ، سۋدى پايدالانۋدا زاڭسىز تولەمدەرگە جول بەرمەۋگە شاقىرادى. سەبەبى سۋ رەسۋرستارى - مەملەكەتتىڭ ەمەس، حالىقتىڭ ورتاق مەنشىگى.
ەرتىسكە جەتۋ مۇڭعا اينالدى
پاۆلوداردا ەرتىستىڭ اۋماعىنداعى جاعاجايلارعا ەمىن-ەركىن كىرىپ شىعۋىڭ دا مۇڭعا اينالعان. جەرگىلىكتى تۇرعىندار سۋ كودەكسىندە كورسەتىلگەن سۋعا قول جەتكىزۋ قۇقىعىنىڭ قاعاز جۇزىندە عانا قالعانىن ايتىپ، نارازىلىق بىلدىرگەن.
قالاداعى ءۇش تانىمال جاعاجايدىڭ ەكەۋىنە قازىر تۇرعىندار ەركىن كىرە المايدى - ءبىرى اقىلى، ەكىنشىسى مۇلدە جابىلعان. ال ءۇشىنشىسى، ياعني قايىقپەن نەمەسە سۋ تاكسيىمەن جەتۋگە بولاتىن جاعاجاي، دەمالىس كۇندەرى قورشاپ تاستايدى.
ەرتىستە دەمالۋ - تەك اقشاسى بارلارعا ارنالعان دۇنيەگە اينالىپ بارادى. زاڭ بويىنشا، كەز كەلگەن ادام سۋ جاعاسىنا كەدەرگىسىز جەتۋگە قۇقىلى. ءبىراق تابيعي اۋماقتاردى يەمدەنىپ العان كاسىپكەرلەر سۋعا جولدى جاۋىپ، اقشا سۇراپ وتىر. بۇل زاڭعا قايشى. جالعا الۋشىلارعا وسىنداي قۇقىقتى كىم بەردى؟، - دەيدى قالا تۇرعىنى Kerek.pv پاراقشاسىندا جاريالانعان جازباسىندا.
قازاقستاننىڭ سۋ كودەكسىنە سايكەس، ورتاق پايدالانۋداعى سۋ ايدىندارى مەن ولاردىڭ جاعالاۋىنان 20 مەترگە دەيىنگى اۋماق ءاربىر ازامات ءۇشىن تەگىن جانە ەركىن قولجەتىمدى بولۋى ءتيىس. سۋعا وتەتىن جولعا اقى الۋ - زاڭعا قايشى. دەگەنمەن بۇل تالاپتى ەلەمەي، قوعامدىق بايلىقتى جەكە تابىس كوزىنە اينالدىرىپ وتىرعاندار سانى ارتىپ كەلەدى.
بۇل جاعدايعا قاتىستى پاۆلودار قالالىق كاسىپكەرلىك جانە اۋىل شارۋاشىلىعى ءبولىمى بۇل جاعدايعا قاتىستى ءوز تۇسىنىكتەمەسىن بەردى. ۆەدومستۆو وكىلدەرى ارنايى جابدىقتالعان جاعاجايلاردا دەمالۋعا كەڭەس بەرىپ، سۋدا قاۋىپسىزدىك ەرەجەلەرىن ساقتاۋ قاجەتتىگىن ەسكە سالدى.
قالا اۋماعىندا ەكى كوممۋنالدىق جاعاجاي بار - ورتالىق جانە ۋسولكا. بۇل جاعاجايلارعا كىرۋ تەگىن. سونىمەن قاتار ەرتىس وزەنىنىڭ سول جاعالاۋىندا، ورتالىق جاعالاۋعا قاراما-قارسى تۇستا ەكى جەكە جاعاجاي ورنالاسقان - Family جانە Riviera. سۋ ايدىندارىن رەكرەاتسيالىق ماقساتتا پايدالانۋ جالپى سۋ پايدالانۋدىڭ تارتىبىمەن تەگىن نەگىزدە جۇزەگە اسىرىلادى. ال جەكە جاعاجايلاردا الىناتىن تولەم تەك قوسىمشا قىزمەتتەرگە - اۋماقتى اباتتاندىرۋ، تازالىق جۇمىستارى، دەمالاتىن توسەكتەردى جالعا بەرۋ جانە باسقا دا جايلىلىقتارعا قاتىستى عانا الىنادى، - دەپ حابارلادى ءبولىم وكىلدەرى.
استاناداعى جاعاجاي دا اقىلى
استانالىقتار قالانىڭ ءدال ورتاسىنداعى جاعاجايعا كىرۋدىڭ اقىلى بولۋىنا نارازى. بۇل جاعداي كوپشىلىكتىڭ اشۋ-ىزاسىن تۋعىزدى.
اتالعان جاعاجاي ورتالىق ساياباق اۋماعىندا، امفيتەاتر ماڭىندا ورنالاسقان. ول تاڭعى ساعات 10:00 دەن كەشكى 19:00 گە دەيىن جۇمىس ىستەيدى. كىرۋ اقىسى - ەرەسەكتەر ءۇشىن 1500 تەڭگە، ال 4 پەن 15 جاس ارالىعىنداعى بالالار ءۇشىن 500 تەڭگە.
الايدا سۋ كودەكسىندە ناقتى كورسەتىلگەن: سۋ ايدىندارى مەن جاعالاۋدان 20 مەترگە دەيىنگى بەلدەۋ - حالىقتىڭ ورتاق مەنشىگى جانە ول بارشا ازامات ءۇشىن تەگىن ءارى كەدەرگىسىز قولجەتىمدى بولۋى ءتيىس. ءبىراق ەلوردالىقتار ناقتى ومىردە بۇل تالاپتىڭ ورىندالماي وتىرعانىن ايتىپ دابىل قاعۋدا.
ۇلىممەن بىرگە جاعاجايعا باردىق. ەسىكتەن كىرگەننەن-اق اقشا سۇرادى. كىرۋ - 1500 تەڭگە. جارايدى دەدىك. ءبىراق ىشكە كىرگەن سوڭ تاعى اقشا شىعا باستادى: شەزلونگ – 1500، بالمۇزداق - 800. بالمۇزداق پەن شەزلونگ ءۇشىن تولەيتىنىمىز تۇسىنىكتى. ال سۋ مەن قۇمعا نەگە تولەۋىمىز كەرەك؟، - دەيدى قالا تۇرعىنى.
قونايەۆ تۇرعىندارى جاعاجايدىڭ جەكەمەنشىككە وتۋىنە نارازى
قونايەۆ قالاسىنىڭ تۇرعىندارى قالالىق جاعاجايدىڭ جەكە مەنشىككە ءوتىپ كەتكەنىنە بايلانىستى نارازىلىق بىلدىرۋدە. ولاردىڭ ايتۋىنشا، زاڭنامادا سۋ ايدىندارىنا ەركىن قول جەتكىزۋ قۇقىعى بەكىتىلگەنىنە قاراماستان، جاعالاۋعا كىرۋ شەكتەلىپ وتىر. جەرگىلىكتى حالىق بۇل جاعدايدان قالا بيلىگىنىڭ حاباردار ەكەنىن، الايدا ەشقانداي ناقتى شارا قابىلداماي وتىرعانىن العا تارتادى.
«قالايشا جاعالاۋ جەكەمەنشىككە اينالدى؟ مۇندا بىردە-ءبىر شەزلونگ جوق، تازالىق اتىمەن جوق. بۇل - جاي عانا جاعالاۋ، ەشكىمنىڭ مەنشىگى ەمەس قوي»، - دەيدى جاعاجايعا كەلگەن تۇرعىننىڭ ءبىرى الەۋمەتتىك جەلىدە تاراعان ۆيدەودا.
جاعاجاي اكىمشىلىگىنىڭ وكىلدەرى بولسا، اقى تەك كورسەتىلەتىن قىزمەتتەر ءۇشىن الىناتىنىن، ونىڭ ىشىندە قۇتقارۋشىلاردىڭ جۇمىسى مەن دەمالۋشىلاردىڭ قاۋىپسىزدىگىن قامتاماسىز ەتۋ بار ەكەنىن ءتۇسىندىردى. ولاردىڭ ايتۋىنشا، جاعاجايدىڭ توتەنشە جاعدايلار مينيسترلىگى تاراپىنان بەرىلگەن رەسمي پاسپورتى بار، بۇل نىساننىڭ تالاپتارعا ساي ەكەنىن دالەلدەيدى.
newtimes.kz مالىمەتىنشە، قونايەۆ قالاسى اكىمدىگىنىڭ باسپا ءسوز قىزمەتى جاعاجاي ورنالاسقان جەر تەلىمىنىڭ جەكە مەنشىك يەلىگىندە ەكەنىن راستادى.
قازاقستان رەسپۋبليكاسىنىڭ ازاماتتىق كودەكسىنە سايكەس، مەنشىك يەسى ءوز اۋماعىنا قاتىستى وكىلەتتىگىن جۇزەگە اسىرۋعا قۇقىلى، ونىڭ ىشىندە كىرۋ ءتارتىبىن بەلگىلەۋگە دە. سونىمەن قاتار، سۋ كودەكسىندە كورسەتىلگەندەي، سۋ ايدىندارىنا قول جەتكىزۋ ەركىن بولۋى ءتيىس. تەك زاڭمەن بەلگىلەنگەن ەرەكشە جاعدايلاردا، مىسالى، سانيتارلىق نەمەسە قورعالاتىن ايماقتاردا - بۇل قۇقىق شەكتەلۋى مۇمكىن، - دەلىنگەن رەسمي جاۋاپتا.
اكىمدىك وكىلدەرى سونداي-اق، جەكە تۇلعالار اقىلى قىزمەت كورسەتەتىن جاعدايدا زاڭ تالاپتارىن قاتاڭ ساقتاۋى ءتيىس ەكەنىن اتاپ ءوتتى.
كاسىپكەرلىك قىزمەتتى جۇزەگە اسىرۋ ءۇشىن ءتيىستى تىركەۋى، باقىلاۋ-كاسسالىق اپپاراتى بولۋى جانە فيسكالدىق چەك بەرۋى مىندەتتى. اكىمدىك ءوز قۇزىرەتى شەگىندە باقىلاۋ جۇرگىزەدى جانە زاڭبۇزۋشىلىقتار انىقتالعان جاعدايدا قۇزىرلى ورگاندارمەن بىرلەسە ارەكەت ەتەدى، - دەپ مالىمدەدى اكىمدىك.
سۋ رەسرۋرستارى مينيسترلىگى نە دەيدى؟
جاڭا قابىلدانعان سۋ كودەكسىنە سايكەس، جەكە جانە زاڭدى تۇلعالاردىڭ ازاماتتاردىڭ سۋ نىساندارىنا قول جەتكىزۋىنە شەكتەۋ قويۋعا قۇقىعى جوق. ەگەر زاڭنامادا ناقتى كورسەتىلمەسە، قورشاۋ ورناتۋ، كۇزەت قويۋ نەمەسە وزگە دە شەكتەۋ تەتىكتەرىن قولدانۋعا تىيىم سالىنادى.
اتالعان نورمالاردىڭ ورىندالۋىن قامتاماسىز ەتۋ ماقساتىندا سۋ رەسۋرستارى جانە يرريگاتسيا مينيسترلىگى ەل ازاماتتارىنىڭ سۋ ايدىندارىنا ەركىن قولجەتىمدىلىگىن رەتتەيتىن سۋدى ورتاق پايدالانۋدىڭ ۇلگىلىك قاعيدالارىن بەكىتتى.
قاعيدادا سۋدى ارنايى پايدالانۋ مەن ورتاق پايدالانۋ ۇعىمدارى ناقتى اجىراتىلعان. سۋدى ورتاق پايدالانۋ ءۇشىن رۇقسات تالاپ ەتىلمەيدى. بۇل دەگەنىمىز - ازاماتتار سۋ نىساندارىنىڭ جاعالاۋ بەلدەۋىنە ەركىن ءوتىپ، دەمالۋعا، شومىلۋعا، اۋەسقوي بالىق اۋلاۋعا، سەرۋەندەۋگە، سونداي-اق جايىلىمدىق جەرلەردە مال سۋارۋعا قۇقىلى.
جەرگىلىكتى اتقارۋشى ورگاندار حالىققا ارنالعان جاپپاي دەمالىس ايماقتارىن ايقىنداپ، بۇل تۋرالى قوعامدى دەر كەزىندە حاباردار ەتۋگە مىندەتتى. سونىمەن قاتار، سۋ ايدىندارىن لاستايتىن ارەكەتتەرگە، اتاپ ايتقاندا كولىك جۋۋ، جانار-جاعارماي ساقتاۋ، قۇرىلىس قالدىقتارىن توگۋ سياقتى زاڭسىز ىستەرگە قاتاڭ تىيىم سالىنادى.
سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆتىڭ ايتۋىنشا، سۋدى ورتاق پايدالانۋ قۇقىعىنا تۋريزم، شومىلۋ، بالىق اۋلاۋ، تابيعات اياسىندا سەرۋەندەۋ سىندى ءىس-ارەكەتتەردىڭ بارلىعى كىرەدى.
ءار ازامات، ەگەر بۇل ارەكەت كاسىپكەرلىك ماقساتقا ارنالماعان بولسا، جەكە ماقساتتا سۋدى ورتاق پايدالانا الادى. قورشاۋ ورناتۋ نەمەسە كىرۋگە تىيىم سالۋ سياقتى شەكتەۋلەرگە جول بەرىلمەيدى. ايتا كەتەتىن جايت - بۇل تالاپتار جەرگىلىكتى اكىمدىك رەسمي تۇردە بەلگىلەگەن ۇيىمداستىرىلعان جاعاجايلاردان تىس اۋماقتارعا قاتىستى. مۇنداي جاعاجايلاردا تولەم الىنۋى مۇمكىن، ءبىراق ول سۋعا ءوتۋ ءۇشىن ەمەس، قوسىمشا سەرۆيستىك قىزمەتتەر ءۇشىن عانا الىنادى، - دەدى مينيستر.
