جاپاروۆ قىرعىزستان مينيسترلەر كابينەتى ەكس-ءتوراعاسىنىڭ وتستاۆكاعا كەتۋ سەبەبىن اتادى
استانا. KAZINFORM - قىرعىزستان پرەزيدەنتى سادىر جاپاروۆ 16-جەلتوقسانعا دەيىن مينيسترلەر كابينەتىنىڭ ءتوراعاسى قىزمەتىن اتقارعان اقىلبەك جاپاروۆتىڭ وتستاۆكاعا كەتۋىنە قاتىستى پىكىر ءبىلدىردى.
قىرعىزستان باسشىسى اقىلبەك جاپاروۆتىڭ مينيسترلەر كابينەتىنىڭ جەتىستىكتەرىنە قوسقان زور ۇلەسىن اتاپ ءوتىپ، ونىڭ كەتۋىن ساياسيلاندىرماۋدى ءوتىندى.
- بۇگىندە سالىق جۇيەسىندە ءبىرقاتار كەلەڭسىز كورىنىستەر بار، ال ول بيۋدجەتتى تولىقتىرادى. بەلگىلى بولعانداي، اكسيزدىك ماركالار بويىنشا بارلىق الاياقتىق فاكتىلەرىنە قاتىستى تەرگەۋ ءجۇرىپ جاتىر. سالىق سالاسى تىكەلەي اقىلبەك جاپاروۆتىڭ باقىلاۋىندا بولدى. بۇل زاڭسىز ارەكەتتەردى ەرتەرەك توقتاتۋعا بولاتىن ەدى. جەكە مۇددەلەردى قۋزاماۋ ءۇشىن مەن ونى قىزمەتىنەن بوساتۋعا ءماجبۇر بولدىم، - دەدى پرەزيدەنت.
ەستەرىڭىزگە سالا كەتەيىك، 16-جەلتوقساندا قىرعىزستان مينيسترلەر كابينەتىنىڭ ءتوراعاسى اقىلبەك جاپاروۆ وتستاۆكاعا كەتكەن بولاتىن. كەيىن ەل باسشىلىعىنىڭ ۇكىمەت باسشىسىن روتاتسيالاۋ تۋرالى شەشىمىنە قىرعىز رەسپۋبليكاسى مينيسترلەر كابينەتى باسشىسىنىڭ ورىنباسارى ەدىل بايسالوۆ تۇسىنىك بەردى. 18-جەلتوقساندا قىرعىز رەسپۋبليكاسى پرەزيدەنتىنىڭ جارلىعىمەن ادىلبەك قاسىماليەۆ مينيسترلەر كابينەتىنىڭ جاڭا ءتوراعاسى -پرەزيدەنت اكىمشىلىگىنىڭ باسشىسى بولىپ تاعايىندالدى.
ەركەجان سماعۇلوۆا
اۆتور
