جاپاروۆ جيەنىنىڭ «Marry me» ءراسىمى ءۇشىن حالىقتان كەشىرىم سۇرادى
بىشكەك. kazinform - قىرعىزستان پرەزيدەنتى سادىر جاپاروۆ جيەنى لاززات نۋرگوجويەۆانى ۇزاتۋ راسىمىندە توتەنشە جاعدايلار مينيسترلىگىنىڭ تىكۇشاعىن پايدالانعانى ءۇشىن كەشىرىم سۇرادى. بۇل تۋرالى ول «كابار» اگەنتتىگىنە تۇسىنىكتەمە بەردى.
24-ماۋسىم كۇنى قىرعىزستانداعى ورۋۋ- ساي شاتقالىندا 23 جاستاعى لاززات نۋرگوجويەۆانىڭ «ماعان ۇيلەن» ءراسىمى وتكەن. سالتاناتتى شارادان تۇسىرىلگەن ۆيدەونى نۋرگوجويەۆانىڭ ءوزى Instagram پاراقشاسىندا جاريالادى. ۆيدەودا قالىڭدىق پەن كۇيەۋ جىگىتتىڭ شاتقالعا ت ج م- عا تيەسىلى تىكۇشاقپەن ءساندى بەزەندىرىلگەن پلاتفورماعا كەلگەنىن كورۋگە بولادى.
بۇل جاعداي الەۋمەتتىك جەلى قولدانۋشىلارىنىڭ سىنىنا ۇشىراپ، نۋرگوجويەۆانى وتباسىلىق بايلانىسىن پايدالاندى دەپ ايىپتادى.
ايتا كەتەيىك، قىرعىزستان ت ج م رەسمي تۇردە تىكۇشاقتاردى جالعا بەرەدى. تىكۇشاقتى ءبىر ساعاتقا جالعا الۋ قۇنى - 185000 سوم (شامامەن 2150 دوللار) . پرەزيدەنت جاپاروۆ ءوز تۇسىنىكتەمەسىندە تىكۇشاقتاردى جالعا بەرۋدەن كەلگەن قارجى بيۋدجەتكە تۇسەتىنىن، بۇل اقشاعا ت ج م تىكۇشاق پاركى جاڭارتىلاتىنىن باسا ايتتى. بۇل رەتتە ول وتباسى مۇشەلەرىنىڭ اقشا شاشۋدان اۋلاق بولۋى كەرەكتىگىن اتاپ ءوتتى.
- ەل باسشىلىعىنا جاقىن ادامدار وزگەلەرگە ۇلگى بولۋى كەرەك. مەن ىسىراپشىلدىققا نۇكتە قويۋ كەرەكتىگىن ءجيى قايتالايمىن. ەڭ بولماسا، بولاشاق كۇيەۋ بالا وسىلاي جاساماس بۇرىن مەنى قولداپ، ويلانۋى كەرەك ەدى. سىناماۋعا، پرەزيدەنتتى ىڭعايسىز جاعدايدا قالدىرماۋعا تىرىسۋ كەرەك ەدى. مەنىڭ ويىمشا، ول مۇنى بالالىقپەن جاسادى. ول جاي عانا كەلىپ قولىن سۇراسا دا، وعان جوق دەمەس ەدى، - دەدى جاپاروۆ.
سونداي- اق، جاپاروۆ تۋىستارىنا قاتاڭ تالاپ قوياتىنىن، ولاردى بۇرىنعى قاتەلىكتەرگە جول بەرمەۋگە، مەملەكەت ىسىنە ارالاسپاۋعا ۇنەمى شاقىراتىنىن اتاپ ءوتتى.
- مەن باسقالاردى سىنايتىنمىن. ەندى بۇل جاعداي ءوز باسىما كەلدى. جيەنىم ءۇشىن حالىقتان كەشىرىم سۇرايمىن. ول حالىقتىڭ پىكىرىن تىڭدايدى. بۇل جاعدايدان دۇرىس قورىتىندى شىعارادى دەپ ەسەپتەيمىن. ونىڭ ۇستىنە ول جاڭا ءومىرىن باستاپ، وتباسىن قۇرعىسى كەلەدى جانە ونىڭ ءاربىر قادامى بولاشاقتا پاراساتتى بولادى دەپ سەنەمىن، - دەيدى قىرعىزستان پرەزيدەنتى.
