جاڭارتىلاتىن ەنەرگيا: قازاقستان مەن قىتاي 30 جوبانى جۇزەگە اسىرىپ جاتىر
استانا. KAZINFORM - بۇگىن ەلوردادا «ورتالىق ازيا - قىتاي: ەنەرگەتيكا» فورۋمىندا ق ر ەنەرگەتيكا ءمينيسترى ەرلان اقكەنجەنوۆ سالاداعى جوبالار تۋرالى ايتتى.
ونىڭ ايتۋىنشا، ەنەرگەتيكا سالاسى - ءداستۇرلى تۇردە قازاقستان- قىتاي سەرىكتەستىگىنىڭ وزەگى. ەكى ەل قارىم- قاتىناسى قازىر بىرلەسكەن ءارى تەحنولوگيالىق تۇرعىدان باي ەكوجۇيەگە باعىت الدى.
- قازىرگى كەزدە قىتاي كومپانيالارىنىڭ قاتىسۋىمەن جاڭارتىلاتىن ەنەرگيا بويىنشا 30 جوبا جۇزەگە اسىرىلىپ جاتىر، جالپى قۋاتتىلىعى - 1700 م ۆ ت، - دەدى ەرلان اقكەنجەنوۆ.
ونىڭ سوزىنە قاراعاندا، بۇگىن CNPC كومپانياسىمەن نەگىزگى قۇجاتتارعا سالتاناتتى تۇردە قول قويىلدى. سونىڭ ىشىندە:
- شىمكەنت مۇناي وڭدەۋ زاۋىتىن 12 ميلليون تونناعا دەيىن كەڭەيتۋ تۋرالى نەگىزدەمەلىك كەلىسىم. ناتيجەسىندە ەلىمىزدىڭ شيكىزات وڭدەۋ، مۇناي ونىمدەرىن ەكسپورتتاۋ الەۋەتى ارتادى؛
- اقتوبە وبلىسىندا كارباميد وندىرەتىن زاۋىتتى ىسكە قوسۋعا ارنالعان كەلىسىم؛
- ءۇشجاقتى مالىمدەمە: قازاقستان رەسپۋبليكاسى ەنەرگەتيكا مينيسترلىگىنىڭ «QazaqGaz» ا ق جانە CNPC- مەن «سولتۇستىك-1» جوباسى جانە كومىرسۋتەگى سالاسىنداعى ىنتىماقتاستىقتى دامىتۋ بويىنشا.
سونداي-اق قازاقستان-قىتاي مۇناي قۇبىرلارىن (اتىراۋ- كەڭقياق، كەڭقياق- قۇمكول) كەڭەيتۋ جۇمىستارى جۇرگىزىلىپ جاتىر.
- بۇگىنگى فورۋم ءوزارا ارىپتەستىگىمىزدىڭ جاڭا پاراعىن اشىپ، ەنەرگەتيكا، ونەركاسىپ، عىلىم جانە ءبىلىم بەرۋ سالالارىنداعى تەرەڭ ىنتىماقتاستىققا نەگىز بولاتىن ماڭىزدى الاڭعا اينالىپ وتىر، - دەدى مينيستر.
بۇدان بۇرىن حابارلانعانداي، سونىمەن قاتار ەلوردادا «ورتالىق ازيا - قىتاي» ەكىنشى يندۋستريالىق- ينۆەستيتسيالىق ىنتىماقتاستىق فورۋمى ءوتىپ جاتىر.
