جاڭا زەلانديا شەتەلدىك ستۋدەنتتەر سانىن ەكى ەسە ارتتىرماق
استانا. KAZINFORM - جاڭا زەلانديا ۇكىمەتى 2034-جىلعا قاراي حالىقارالىق ءبىلىم بەرۋ نارىعىن ەكى ەسەگە ۇلعايتۋدى جوسپارلاپ وتىر، دەپ جازادى ازەرتادج.
ەلدىڭ ءبىلىم بەرۋ ءمينيسترى ەريكا ستەنفوردتىڭ ايتۋىنشا، 2023-جىلدان باستاپ شەتەلدىك ستۋدەنتتەر سانى تۇراقتى تۇردە ءوسىپ كەلەدى، سوندىقتان ۇكىمەت بۇل ءوسىمدى ودان ءارى جەدەلدەتىپ، 2034-جىلعا قاراي 4,32 ميلليارد دوللار كولەمىندە پايدا العىسى كەلەدى.
بۇل مالىمدەمە شەتەلدىك ستۋدەنتتەر ءۇشىن تانىمال باعىتتار - اۋستراليا مەن ا ق ش وزدەرىندەگى شەتەلدىك ستۋدەنتتەر سانىن قىسقارتۋعا نيەت بىلدىرگەن تۇستا ايتىلدى. ال باسقا ەلدەردىڭ ۋنيۆەرسيتەتتەرى بۇل شەكتەۋلەردى ءوز پايداسىنا پايدالانۋعا تىرىسىپ جاتىر.
- قىسقا مەرزىم ىشىندە جاڭا زەلانديانىڭ ءبىلىم مينيسترلىگى ءوز ناسيحات جۇمىستارىن ەڭ ۇلكەن ءوسىم الەۋەتى بار نارىقتارعا باعىتتايدى، - دەدى ستەنفورد.
قازىرگى ۋاقىتتا جاڭا زەلانديانىڭ حالىقارالىق ءبىلىم بەرۋ نارىعى ەكونوميكاعا جىل سايىن 2,15 ميلليارد دوللار تابىس اكەلىپ وتىر. ۇكىمەت 2024-جىلى 83700 بولعان شەتەلدىك ستۋدەنتتەر سانىن 2027-جىلى 105 مىڭعا، ال 2034-جىلى 119 مىڭعا جەتكىزۋدى كوزدەيدى. وسىلايشا، بۇل سالانىڭ ەكونوميكاعا قوساتىن ۇلەسىن ەكى ەسەلەۋ جوسپارلانىپ وتىر.
شەتەلدىك ستۋدەنتتەردى تارتۋ ءۇشىن جاڭا زەلانديا ۇكىمەتى:
رۇقسات ەتىلگەن شەتەلدىك ستۋدەنتتەر ءۇشىن جارتىلاي جۇمىس ىستەۋ ساعاتتارىن ارتتىرۋدى،
سونداي-اق بەكىتىلگەن الماسۋ نەمەسە شەتەلدە وقۋ باعدارلامالارىنا قاتىساتىن ج و و ستۋدەنتتەرىنىڭ بارلىعىنا جۇمىس ىستەۋ قۇقىعىن بەرۋدى كوزدەپ وتىر.
ەكونوميكالىق ءوسىمى باياۋلاعان جاڭا زەلانديا ءۇشىن بۇل قادام - سيفرلىق كوشپەندىلەردى (digital nomads) تارتۋعا جانە شەتەلدىك ينۆەستيتسيالاردى ارتتىرۋعا باعىتتالعان ءبىرقاتار رەفورمادان كەيىنگى ەكونوميكانى قالپىنا كەلتىرۋ شارالارىنىڭ ءبىرى بولىپ وتىر.
ەسكە سالساق، 23-مامىر كۇنى ترامپ اكىمشىلىگى گارۆاردتى شەتەلدىك ستۋدەنتتەردى وقىتۋ قۇقىعىنان ايىردى.
وسىدان كەيىن عىلىم جانە جوعارى ءبىلىم ءمينيسترى ساياسات نۇربەك گارۆارد ۋنيۆەرسيتەتىندە ءبىلىم الىپ جاتقان وتانداستارىمىزدىڭ جاعدايىنا بايلانىستى پىكىر ءبىلدىردى.
