جاڭا زاڭنامالىق نورمالاردا بالالاردى اتا-انالارىنان تارتىپ الۋ ماسەلەسى قاراستىرىلماعان - دەپۋتات

استانا. KAZINFORM - جاڭا زاڭنامالىق نورمالاردا بالالاردى اتا-انالارىنان تارتىپ الۋ ماسەلەسى قاراستىرىلماعان. بۇل تۋرالى ءماجىلىس دەپۋتاتى جۇلدىز سۇلەيمەنوۆا ايتتى.

بۇگىن سەناتتىڭ جالپى وتىرىسىندا ايەلدەردىڭ قۇقىقتارى مەن بالالاردىڭ قاۋىپسىزدىگىن قامتاماسىز ەتۋ تۋرالى زاڭى قارالىپ، ماقۇلداندى.

تالقىلاۋ كەزىندە سەناتور اسەم راحمەتوۆا قازىر اتالعان زاڭعا قاتىستى الەۋمەتتىك جەلىلەردە ءتۇرلى قاۋەسەت تاراپ جاتقانىن ايتتى.

«اتالعان قۇجات اياسىندا بالالاردى وتباسىنان تارتىپ الۋ باعىتىندا وكىلەتتى ورگاننىڭ قۇزىرەتى شەكتەن تىس كۇشەيتىلىپ جاتىر دەگەن ءبىرقاتار ازاماتتىڭ ءۋاجى شىندىققا جاناسا ما؟»، - دەپ سۇرادى ءا. راحمەتوۆا.

بۇل سۇراققا قاتىستى زاڭعا باستاماشىلىق جاساعاندار اتىنان ءماجىلىس دەپۋتاتى جۇلدىز سۇلەيمەنوۆا تۇسىنىك بەردى.

«بۇگىن تالقىلاۋعا ۇسىنىلعان زاڭدار ءماجىلىستىڭ دەپۋتاتتارىنىڭ باستاماسىمەن ازىرلەندى. بۇل سۇراقتاعى پايىمدار شىندىققا جاناسپايتىنىن ايتقىم كەلەدى. بالالاردى اتا-انالاردان تارتىپ الۋعا قاتىستى توقتالساق، ەڭ باسىنان ونداي نورمالار قاراستىرىلمادى جانە تالقىلاۋ كەزىندە تىپتەن ايتىلمادى. مۇنى تاعى باسا اتاپ وتكىم كەلەدى. قازىر الەۋمەتتىك جەلىلەردە قوعامداستىق، ونىڭ ىشىندە حالىقارالىق بولسىن، قازاقستاندىق ساراپشىلار قوعامداستىعى بۇل زاڭدى كوپتەن كۇتىپ وتىرعانىن اتاپ ءوتتى. دەگەنمەن، دەسترۋكتيۆتى كەيبىر پايىمدار ارقىلى جالعان اقپارات تاراتىپ وتىر. سوندىقتان ايتىلعان سۇراقتىڭ ءبارى جالعان، شىندىققا مۇلدەم جاناسپايدى. فەيك اقپارات ەكەنىن اتاپ وتكىم كەلەدى»، - دەدى ج. سۇلەيمەنوۆا.

ونىڭ ايتۋىنشا، زاڭدار قوعامنىڭ ەڭ وسال ساناتى سانالاتىن ايەلدەر مەن بالالاردىڭ قۇقىعىن قورعاۋعا باعىتتالعان.

«بۇل زاڭ قوعام كوپتەن كۇتكەن بارلىق سۇرانىسىنا ساي، حالىقتىڭ يگىلىگىنە قىزمەت ەتەتىن زاڭ بولادى. ەشقانداي حالىقارالىق ۇيىمداردىڭ نۇسقاۋلىعىمەن جاسالعان جوق. سونى اتاپ وتكىم كەلەدى. ءبىزدىڭ بالالارىمىزعا، اتا- انالارىمىزعا قايشى كەلەتىن بىردە-ءبىر نورما جوق ەكەنىن اتاپ وتكىمىز كەلەدى. سەناتتا 1 ايدان اسا ۋاقىت تالقىلاندى»، - دەدى ءماجىلىس دەپۋتاتى.

اۆتور

رۋسلان عابباسوۆ