جاڭا زاڭ: زەينەت جاسى 70 كە دەيىن ۇلعايتىلدى
استانا. KAZINFORM - دانيادا زەينەت جاسىن ەۋروپاداعى ەڭ جوعارى دەڭگەيگە دەيىن كوتەرۋ تۋرالى زاڭ قابىلداندى، دەپ حابارلايدى ازەرتادج.
اگەنتتىك CNN گە سىلتەمە جاساپ حابارلاۋىنشا، پارلامەنتتە 81 دەپۋتات «قولداپ»، 21 دەپۋتات «قارسى» داۋىس بەردى.
جاڭا زاڭ 1970-جىلعى 31-جەلتوقساننان كەيىن تۋعاندارعا قاتىستى بولادى. قازىرگى زەينەت جاسى ورتا ەسەپپەن 67 جاس بولسا، 1967-جىلعى 1-قاڭتاردان كەيىن تۋعاندار ءۇشىن ول 69 جاسقا دەيىن ۇلعايتىلۋى مۇمكىن.
ەڭبەك ءمينيسترى انە حالسبو- يورگەنسەن بۇل شەشىمنىڭ ماقساتى - «بولاشاق ۇرپاقتىڭ لايىقتى ءال-اۋقاتىن قامتاماسىز ەتۋ» ەكەنىن ايتتى.
دانيانىڭ ستاتيستيكا باسقارماسىنىڭ رەسمي سايتىنداعى مالىمەتتەرگە سايكەس، ەلدە شامامەن 6 ميلليون ادام تۇرادى. ولاردىڭ 713 مىڭعا جۋىعى 60-69 جاس ارالىعىندا، ال 580 مىڭعا جۋىعى 70-79 جاس ارالىعىندا.
دانيا ساقتاندىرۋ كومپانيالارى مەن زەينەت قورلارىنىڭ ساۋدا قاۋىمداستىعى حابارلاعانداي، سوڭعى جىلدارداعى ءۇردىس بويىنشا كوپتەگەن دانيالىق مەملەكەتتىك زەينەت جاسىنا جەتكەننەن كەيىن دە جۇمىس ىستەي بەرەدى.
FP مالىمەتتەرى بويىنشا قازىر دانيادا زەينەت جاسىنان اسقان شامامەن 80 مىڭ ادام ەڭبەك ەتەدى. بۇل ءوسىمنىڭ سەبەبى - جاقسى ەكونوميكالىق جاعداي، جۇمىس بەرۋشىلەردىڭ يكەمدىلىگى، قارجىلىق ىنتالاندىرۋ جانە جۇمىسقا دەگەن ۇمتىلىس.
زەينەتپەن قامتاماسىز ەتۋ ديرەكتورى يان ۆ. حانسەننىڭ ايتۋىنشا، 2040-جىلعا قاراي مەملەكەتتىك زەينەت جاسىن 70 جاسقا دەيىن كوتەرۋ كوپتەگەن دانيالىقتار ءۇشىن تاڭعالارلىق بولۋى مۇمكىن.
- الايدا ستاتيستيكا ۇزاق ۋاقىت جۇمىس ىستەگەندى قالايتىن دانيالىقتاردىڭ سانى ارتىپ جاتقانىن كورسەتەدى. جاقسى جاڭالىق - كوپتەگەن دانيالىق دەنساۋلىعى مەن ەڭبەككە دەگەن ىنتاسىن ساقتاپ كەلەدى، - دەدى ول.
دانيا - 60 جاستان جوعارى زەينەت جاسىن بەلگىلەۋگە كوشكەن العاشقى ەۋروپا ەلىنىڭ ءبىرى. بۇل شەشىم دانياداعى زەينەت جاسىن الەمدەگى ەڭ جوعارىلاردىڭ ءبىرى ەتىپ، ليۆيامەن ءبىر قاتارعا قويادى.
2023-جىلدىڭ ناۋرىزىندا فرانسيادا 64 جاسقا دەيىن زەينەت جاسىن كوتەرۋگە قارسى ءبىر ميلليوننان استام ادام نارازىلىققا شىققان ەدى - بۇل دانيانىڭ جاڭا زەينەت جاسىنان 6 جاس تومەن.
قىركۇيەكتە قىتاي ۇكىمەتى ەرلەردىڭ زەينەت جاسىن 60 تان 63 جاسقا، ايەلدەر ءۇشىن - كاسىبىنە قاراي 50 مەن 55 تەن سايكەسىنشە 55 پەن 58 جاسقا دەيىن ارتتىرۋ تۋرالى زاڭ قابىلدادى.
ۇلى بريتانيادا زەينەت جاسى 2026-2028-جىلدارى 67 جاسقا كوتەرىلەدى، ال كەيىن 68 جاسقا دەيىن ۇلعايۋى مۇمكىن.
ا ق ش- تا زەينەت جاسى ۇلىبريتانياعا ۇقساس، ءبىراق كەيبىر الەۋمەتتىك تولەمدەر 62 جاستان بەرىلەدى.
دەنساۋلىعىنىڭ جاقسى بولۋى، ءومىر ءسۇرۋ ۇزاقتىعىنىڭ ارتۋى جانە قاشىقتان جۇمىس ىستەۋ كوپتەگەن امەريكالىققا ەگدە جاستا جۇمىس ىستەۋگە مۇمكىندىك بەرەدى. دەگەنمەن زەرتتەۋلەر بويىنشا كوبىنەسە قارجى تاپشىلىعى ولاردى ۇزاق ەڭبەك ەتۋگە ماجبۇرلەيدى.
بۇدان بۇرىن قازاقستاندا 2025-جىلى زەينەت جاسى ەرلەر ءۇشىن دە، ايەلدەر ءۇشىن دە وزگەرمەيتىنى حابارلاندى.
