جاڭا زاڭ: قازاقستان ءدىني باسقارماسى بەتتى تولىق جابۋعا قاتىستى مالىمدەمە جاسادى
استانا. KAZINFORM - بەتتى تولىق جابۋعا قاتىستى قازاقستان مۇسىلماندارى ءدىني باسقارماسى مالىمدەمە جاسادى.
- بۇگىندە ەلىمىزدە قوعامدىق قاۋىپسىزدىكتى قامتاماسىز ەتۋ، ازاماتتاردىڭ قۇقىقتارى مەن بوستاندىقتارىن قورعاۋ ماقساتىندا ءبىرقاتار زاڭنامالىق وزگەرىستەر ەنگىزىلۋدە. سونىڭ ءبىرى - بەت-الپەتىن تولىق جاباتىن كيىمگە (ونىڭ ءبىرى نيقاب) قوعامدىق ورىنداردا تىيىم سالۋ تۋرالى جاڭا شەكتەۋلەر.
بۇل شەشىم قانداي ءدا بىر ءدىني سەنىمدى نەمەسە جەكە تاڭداۋدى شەكتەۋ ءۇشىن ەمەس، ەڭ الدىمەن قوعامدىق قاۋىپسىزدىكتى قامتاماسىز ەتۋ قاجەتتىلىگىنەن تۋىنداپ وتىر. قازىرگى تاڭدا الەمنىڭ كوپتەگەن ەلدەرى، ونىڭ ىشىندە مۇسىلمان ەلدەرى دە قاۋىپسىزدىك ماقساتىندا وسىنداي ۇستانىمدى قابىلداپ جاتىر، - دەلىنگەن حابارلامادا.
اللا تاعالا قاسيەتتى قۇراندا ايەل كىسىلەردىڭ اۋرەت جەرىنە قاتىستى اياتتا:
وَقُلْ لِلْمُؤْمِنَاتِ يَغْضُضْنَ مِنْ أَبْصَارِهِنَّ وَيَحْفَظْنَ فُرُوجَهُنَّ وَلَا يُبْدِينَ زِينَتَهُنَّ إِلَّا مَا ظَهَرَ مِنْهَا وَلْيَضْرِبْنَ بِخُمُرِهِنَّ عَلَى جُيُوبِهِنَّ وَلَا يُبْدِينَ زِينَتَهُنَّ
«مۇمين ايەلدەرگە ايت: «(بوگدە ەرلەردەن) كوزدەرىن ساقتاسىن. ءارى ۇياتتى جەرلەرىن قورعاسىن. سونداي-اق زەينەتتەرىن كورسەتپەسىن. ءبىراق ولاردىڭ وزدىگىنەن كورىنگەندەرى (بەتى، قول- اياقتارى) بۇدان تىس جانە بۇركەنشىكتەرىن ومىراۋلارىنا ءتۇسىرسىن. زەينەتتەرىن كورسەتپەسىن»، - دەگەن («نۇر» سۇرەسى، 31-ايات).
اللا ەلشىسى (وعان اللانىڭ سالاۋاتى مەن سالەمى بولسىن) ءوزىنىڭ حاديسىندە: «ۋا، ءاسما! باليعات جاسىنا جەتكەن قىزدىڭ (سىرت كوزگە) مىنا ەكەۋىنەن باسقا جەرىنىڭ كورىنگەنى دۇرىس ەمەس دەپ، بەتى مەن ەكى قولىن كورسەتكەن» (يمام ءابۋ ءداۋىد).
- جوعارىدا قۇران اياتتارى مەن حاديستە باياندالعانداي ايەل كىسىلەر بەت-ءجۇزىن جابۋعا نەمەسە بۇركەمەلەۋگە مىندەتتەلمەگەن. بۇل حالقىمىزدىڭ داستۇرىندە دە كورىنىس تاپپاعان. ء بىز ەلىمىزدەگى مۇسىلمانداردىڭ ءبىرتۇتاس ءدىني بىرلەستىگى رەتىندە، قوعامداعى تۇراقتىلىق، ىنتىماق پەن بىرلىكتى باستى قۇندىلىقتارىمىزدىڭ ءبىرى دەپ باعالايمىز. يسلام ءدىنى دە قوعاممەن جاراسىمدى ءومىر ءسۇرۋدى، تارتىپكە باعىنىپ، مەملەكەتتىڭ تىنىشتىعىنا ۇلەس قوسۋدى ناسيحاتتايدى. سوندىقتان دا زاڭعا تۇسىنىستىكپەن قاراپ، ورتاق يگىلىك جولىندا بىرلىگىمىزدى بەكەمدەيىك. اللا تاعالا ەلىمىزگە تىنىشتىق، جۇرەگىمىزگە يمان بايلىعىن ءناسىپ ەتسىن، -دەلىنگەن ق م د ب حابارلاماسىندا.
ايتا كەتەلىك ۇلتتىق كيىمدى سانگە اينالدىرۋ ماقساتىندا ارنايى جۇمىس توبى قۇرىلدى.
