جاڭا سالىق ساياساتى كاسىپكەرلەردى قاناپ جاتىر ما

استانا. KAZINFORM - استانادا جاڭا سالىق كودەكسىنە تالقىلاۋعا ارنالعان دوڭگەلەك ۇستەل ءوتتى. ءىس-شارانى ق ر ۇلتتىق ەكونوميكا مينيسترلىگى مەن «اتامەكەن» ۇ ك پ بىرلەسىپ، قازاقستان قۇرىلىسشىلار وداعى ۇيىمداستىردى.

تالقىلاۋ بارىسىندا كاسىپكەرلەر جاڭا كودەكستىڭ كەيبىر نورماسىنا قاتىستى الاڭداۋشىلىق ءبىلدىردى.

ولار بيزنەس ءۇشىن سالىق ساياساتىن قاتاڭ بولىپ بارا جاتقانىن جاسىرمادى. قازاقستان قۇرىلىسشىلار وداعىنىڭ باسشىسى تالعات ەرعاليەۆ سالىق كودەكسىنىڭ كۇردەلىلىگىنە بايلانىستى بيزنەستىڭ ءبىر بولىگى كولەڭكەدە قالۋى مۇمكىن ەكەنىن جەتكىزدى. «ب ك Audit» كومپانياسىنىڭ ديرەكتورى ايجان بالاكەشوۆا جاڭا سالىق كودەكسىندە سىبايلاس جەمقورلىق تاۋەكەلدەرى بولۋى مۇمكىن دەگەن الاڭداۋشىلىق ءبىلدىردى. كاسىپكەرلەردىڭ تاۋەلسىز بىرلەستىگىنىڭ ءتوراعاسى قانات ەلەۋسىزوۆ سالىق زاڭناماسى مەملەكەتتىك رەتتەۋ سالاسىنا كىرمەيتىنىن ايتتى.

«سالىق كودەكسىندە تەكسەرۋ، ايىپپۇلدار سياقتى قۇرالدار بار. مۇنىڭ ءبارى مەملەكەتتىك رەتتەۋگە قاتىستى. ءبىز بۇل كودەكستىڭ زاڭعا تاۋەلدى اكتىلەرگە اينالۋ قاۋپىن كورىپ وتىرمىز. بۇيرىق ەشكىمنىڭ كەلىسىمىنسىز شىعارىلدى. سالىق كودەكسى بيزنەستى جويادى دەپ ايتۋعا ابدەن بولادى»، - دەدى ول.

ۇلتتىق ەكونوميكا مينيسترلىگىنىڭ وكىلى ەرلان ساعنايەۆ جاڭا سالىق كودەكسى بويىنشا جۇمىس توبى بارلىق ۇسىنىستاردى تالقىلاپ جاتقانىن، وتىنىشتەر جەردە قالمايتىنىن ايتتى.

«بىزگە مىڭنان استام ۇسىنىس ءتۇستى. ساراپشىلار بيزنەس ماسەلەلەرىن تالقىلاۋعا قاتىستى. كودەكس جوباسىن ازىرلەۋمەن قاتار ءبىز حالىقارالىق ساراپشىلارمەن تاسىلدەر تۋراسىندا كوپ كەڭەستىك. دۇنيەجۇزىلىك بانك تە، حالىقارالىق ۆاليۋتا قورى دا ءبىراۋىزدان بىزگە بىلاي دەيدى: «ارىپتەستەر، ارناۋلى سالىق رەجيمى - بۇل سالىقتىق مىندەتتەمەلەردى وڭايلاتىلعان ورىنداۋدىڭ ءبىر ءتۇرى عانا جانە سالىقتىق مىندەتتەمەلەردى ورىنداۋدى قىسقارتۋ دەگەن ءسوز ەمەس»، - دەدى ساعنايەۆ.

مينيسترلىك وكىلى مەملەكەتتىڭ ماڭىزى بار وراسان ىستەردى جوققا شىعارماۋعا شاقىردى. سالىق كودەكسىنىڭ بارلىق جوباسى بيزنەستىڭ دە، حالىقتىڭ دا تالاپ-تىلەكتەرىنە ساي ەكەنىن اتاپ ءوتتى.