جاڭا سالىق كودەكسىندەگى قايشىلىقتاردى جويۋ قاجەت - پرەزيدەنت

ونىڭ سوزىنشە، تاعى ءبىر باسىمدىق - سالىق ساياساتىن جەتىلدىرۋ.

- جاڭا سالىق كودەكسى بۇكىل جۇيەنى كەشەندى تۇردە قايتا جاڭعىرتۋعا نەگىز قالادى. الايدا مۇنداي اۋقىمدى رەفورما ونى ازىرلەۋ كەزەڭىندە الدىن الا بولجاۋ قيىن ماسەلەلەردى ءسوزسىز انىقتايدى. سونىڭ سالدارىنان بيزنەس جەكەلەگەن نورمالاردى قولدانۋ كەزىندە قيىندىقتارعا تاپ بولىپ وتىر. سالىق كودەكسى — بۇل وزگەرمەيتىن قاعيدا دا، قاسيەتتى كىتاپ تا ەمەس. ءول ومىر شىندىعىنان الشاق بولماۋى كەرەك. سوندىقتان قايشىلىقتاردى جويىپ، نورمالاردىڭ ەكىۇشتى تۇسىندىرىلۋىنە جول بەرمەۋ، تەڭگەرىمسىزدىكتەر مەن كاسىپكەرلەرگە تۇسەتىن ارتىق جۇكتەمەنى ازايتۋ قاجەت، — دەدى مەملەكەت باسشىسى.

سونىمەن قاتار، سالىق جۇيەسى بيزنەستىڭ دامۋ ىنتاسىن جويماۋعا، ينۆەستيتسيا تارتۋعا جانە جۇمىس ورىندارىن اشۋعا كەدەرگى كەلتىرمەۋگە ءتيىس. سوندىقتان ۇكىمەت بيزنەس وكىلدەرىنىڭ پىكىرىنە قۇلاق اسىپ، سالىق زاڭناماسىنا نىسانالى وزگەرىستەر ەنگىزۋ جونىندەگى ۇسىنىستار پاكەتىن ازىرلەۋى قاجەت.

— مۇنى جان- جاقتى سارالاپ، وتە مۇقيات جاساۋ كەرەك. كاسىپكەرلەردىڭ جۇمىس ىستەۋ قاعيدالارىن قايتا-قايتا وزگەرتە بەرۋگە بولمايدى. زاڭنامامىزدىڭ تىم كۇردەلى ءارى تۇسىنۋگە اۋىر بولعانى سونشالىق، ول كاسىپكەرلەر ءۇشىن ناعىز باس اۋرۋىنا اينالدى، — دەدى پرەزيدەنت.

ايتا كەتەيىك، بۇعان دەيىن توقايەۆ اۋقىمدى قۇرىلىس جوبالارىن مۇقيات ىرىكتەپ، قاتاڭ باقىلاۋ قاجەتتىگىن مالىمدەگەن ەدى.

ونىڭ سوزىنشە، ينفراقۇرىلىمدى جاڭعىرتۋ، جاپپاي سيفرلاندىرۋ جانە يندۋستريا سالاسىن دامىتۋ ءۇشىن بيۋدجەتتەن قوماقتى قارجى ءبولىنىپ جاتىر. جەكە ينۆەستيتسيا دا تارتىلۋدا.

- وسى ورايدا، مىنا ماسەلەگە نازار اۋدارعىم كەلەدى. اۋقىمدى قۇرىلىس اياسىنداعى جوبالاردى مۇقيات ىرىكتەۋ، سەنىمدى كومپانيالارمەن جۇمىس ىستەۋ جانە باستامانى جۇزەگە اسىرۋدىڭ ءار كەزەڭىن ءجىتى باقىلاۋ وتە ماڭىزدى، - دەدى پرەزيدەنت.

بۇل رەتتە مەملەكەتتىك اپپارات وسى مىندەتتى كاسىبي تۇرعىدان مۇلتىكسىز ورىنداۋعا دايىن بولۋى كەرەك.

مەملەكەت باسشىسىنىڭ ايتۋىنشا، ۇزاق مەرزىمدى ماكروەكونوميكالىق تۇراقتىلىقتى قامتاماسىز ەتۋ ءۇشىن بيۋدجەت ساياساتىن رەتتەۋ ماڭىزدى.

بىلتىر قابىلدانعان بيۋدجەت كودەكسى مەملەكەت قارجىسىن ءتيىمدى باسقارۋعا جانە قارجىلىق ءتارتىپتى كۇشەيتۋگە مۇمكىندىك بەرگەن.

- دەگەنمەن شىعىنداردىڭ جىل ساناپ كوبەيىپ بارا جاتقانىن ەسكەرگەن ءجون. سول سەبەپتى قازىنا قارجىسىن جوسپارلاۋ جانە باسقارۋ ساپاسىن ودان ءارى ارتتىرۋ قاجەت. ورىنسىز، ءتيىمسىز شىعىنداردىڭ الدىن الۋ ءۇشىن جاساندى ينتەللەكت تەحنولوگياسىنىڭ مۇمكىندىگىن پايدالانعان دۇرىس، - دەدى پرەزيدەنت.

سونداي-اق مەملەكەتتىك قازىنا جۇيەسىن تولىققاندى سيفرلاندىرۋ جۇمىسىن اياقتاۋ قاجەتتىگى ايتىلدى.

- بيۋدجەت قاراجاتىن باسقارۋدىڭ ورتاق ءادىس-تاسىلدەرگە نەگىزدەلگەن، اۆتوماتتاندىرىلعان جۇيەسىن قۇرۋ قاجەت. ۇكىمەت پەن ۇلتتىق بانكتەن ناقتى ۇسىنىستار كۇتەمىن، - دەدى قاسىم-جومارت توقايەۆ.

جالپى پراكتيكا دارىگەرلەرىنىڭ وكىلەتتىگىن كەڭەيتىپ، بۇل جۇيەنى قارجىلاندىرۋ كولەمىن كەزەڭ- كەزەڭىمەن ۇلعايتۋ ماڭىزدى. بۇل تۋرالى قازاقستان حالقىنا جولداۋىن جاريالاۋ كەزىندە پرەزيدەنت قاسىم-جومارت ءمالىم ەتتى.

- سونداي-اق ءبىز العاشقى مەديسينالىق-سانيتارلىق كومەك جۇيەسىن جاڭعىرتۋ ىسىنە ەرەكشە ءمان بەرەمىز. وسى تۇرعىدان العاندا، جالپى پراكتيكا دارىگەرلەرىنىڭ وكىلەتتىگىن كەڭەيتىپ، بۇل جۇيەنى قارجىلاندىرۋ كولەمىن كەزەڭ- كەزەڭىمەن ۇلعايتۋ ماڭىزدى. ۇكىمەتكە كەلەر جىلدىڭ 1-قاڭتارىنان باستاپ وسى باعىتتا جۇمىس ىستەيتىن ۋچاسكەلىك قىزمەت ماماندارىنىڭ جالاقىسىن ۇزدىكسىز ەڭبەك وتىلىنە قاراي 40 پايىزعا دەيىن ارتتىرۋدى تاپسىرامىن. بۇل 77 مىڭنان استام ماماننىڭ تابىسىن وسىرۋگە مۇمكىندىك بەرەدى، - دەدى قاسىم-جومارت توقايەۆ.

بۇعان دەيىن پرەزيدەنت قاسىم-جومارت توقايەۆ قۇرىلتاي وتىرىسىندا «جاڭا تاريحي كەزەڭدەگى قازاقستاننىڭ وزەكتى مىندەتتەرى» اتتى جولداۋىن جاريالاپ جاتقانىن جازعان ەدىك.