جاڭا سالىق كودەكسى كاسىپكەرلەرگە اۋىر تيمەي مە؟ - جۇمانعارين جاۋاپ بەردى
استانا. KAZINFORM – ق ر پرەمەر-ءمينيسترىنىڭ ورىنباسارى - ۇلتتىق ەكونوميكا ءمينيسترى سەرىك جۇمانعارين جاڭا سالىق كودەكسى كاسىپكەرلىككە قالاي اسەر ەتەتىنىن ايتىپ بەردى.
«اتامەكەن» ق ر ۇلتتىق كاسىپكەرلەر پالاتاسىندا وتكەن باسپا ءسوز ءماسليحاتىندا ب ا ق وكىلدەرى سەرىك جۇمانعاريننەن ونسىز دا تاريف باعاسى ءوسىپ جاتقان كەزەڭدە جاڭا سالىق كودەكسى كاسىپكەرلەردىڭ سانىن ازايتىپ جىبەرمەي مە دەپ سۇرادى.
- تاريفتىك باعدارلاما ىسكە اسىرىلعاندا مۇنداي جاعداي (الەمدەگى گەوساياسي وقيعالار - رەد.) بولعان جوق. سول سەبەپتى قازىر شامالى وزگەرىس ەنگىزىپ جاتىرمىز. تاريفتىك رەفورمانى قازىر توقىراتقان جوقپىز، ءبىراق ازداپ تەجەپ وتىرمىز. سونىڭ ارقاسىندا قىزمەت كورسەتۋ سەكتورىنداعى ينفلياتسيا جارتى پروتسەنتكە تومەندەيدى. ونى ەسەپتەپ شىقتىق. جالپى ايتقاندا، ارينە، ءبىزدىڭ رەفورمامىز، ق ق س- تى 4 پروتسەنتكە كوتەرۋ ءوز اسەرىن بەرەدى. ينفلياتسياعا 2-2,5 پروتسەنت قوسىلادى. ءبىراق كوبىسى (كاسىپكەرلەر - رەد.) مۇنى ەستىگەننەن-اق باعانى كوتەرىپ جىبەردى. جاڭا سالىق كودەكسى كەلەسى جىلى 1-قاڭتاردان باستاپ كۇشىنە ەنەدى، ال ونىڭ ينفلياتسياعا اسەرىن قازىردەن سەزىپ جاتىرمىز، - دەدى ول.
سوداي-اق مينيستر ەلىمىزدە سالىق سالاسىن رەفورمالاعاندا بيزنەسكە قولداۋ كورسەتۋ ماسەلەسى دە نازاردان تىس قالماعانىن ايتتى.
- كوبىسى ءىرى كاسىپتى ۇساقتاپ، 10 شاقتى كىشى جانە ورتا كاسىپكەرلىكتى قولدانىپ، سالىقتان قاشادى. بۇل قولدان جاسالعان كاسىپكەرلىك. ءبىز ءبىر جاعىنان رەفورما جاساپ جاتساق، ەكىنشى جاعىنان بيزنەسكە قولداۋدى ارتتىرىپ جاتىرمىز. «بايتەرەك» ۇ ب ح» ا ق كاپيتالىن 1 تريلليون تەڭگەگە ۇلعايتىپ جاتىرمىز. دامۋ ينستيتۋتتارىن كوتەرىپ، بيزنەسكە قاراجات بەرۋ مۇمكىندىگىن ارتتىرىپ وتىرمىز. سەبەبى قانشا بيزنەس وكىلىمەن سويلەسسەم دە، ولارعا كەرەگى - اقشانى ارزان پايىزبەن الۋ مۇمكىندىگى. قارجى ءارى قولجەتىمدى، ءارى ارزان بولۋى كەرەك. قازىرگى ۋاقىتتا ۇلتتىق بانكتىڭ مولشەرلەمەسى 16,5 پروتسەنت. «بايتەرەك» ۇ ب ح» ا ق بىرىككەن مولشەرلەمە بويىنشا 12,6 پروتسەنتپەن بەرىپ وتىر. ەرتەڭ ۇلتتىق بانكتىڭ مولشەرلەمەسى ازايسا، بۇل دا تومەندەيدى، - دەدى سەرىك جۇمانعارين.
ايتا كەتەيىك، بۇگىن مەملەكەت باسشىسى جاڭا سالىق كودەكسىنە قول قويدى.
