جاڭا سالىق كودەكسى باسپانا باعاسىن 20 پايىزعا كوتەرەتىنى راس پا - سكلياردىڭ جاۋابى
استانا. KAZINFORM - پرەمەر-ءمينيستردىڭ ءبىرىنشى ورىنباسارى رومان سكليار ۇكىمەت ۇيىندەگى باسپا ءسوز ءماسليحاتىندا سالىق كودەكسى باسپانا باعاسىن 20 پايىزعا كوتەرەتىنى تۋرالى بولجامدارعا جاۋاپ قاتتى.
- جاڭا سالىق كودەكسى قاراپايىم ازاماتتارعا ەشقانداي اسەر ەتپەيدى. ءبىز بيىل 19 ميلليون شارشى مەتردەن استام تۇرعىن ءۇي سالۋعا ۇمتىلىپ جاتىرمىز جانە باسپانا باعاسىن نارىق ادىستەرىمەن رەتتەپ وتىرمىز. الايدا، 10 جىل بويى مەملەكەت جەكە مەنشىك قۇرىلىس كومپانيالارىنا تۇرعىن ءۇي تاپسىرىسىن بەرۋ ارقىلى باعاعا ىقپال ەتىپ كەلەدى.
بىزدە تۇرعىن ءۇي باعاسى وسكەن دەپ ايتۋعا كەلمەيدى. مەنىڭ ايتايىن دەگەنىم، بيزنەس- كلاسس نەمەسە ەليتالى تۇرعىن ءۇي سەگمەنتىنىڭ باعاسى ەمەس. «ەكونوم- كلاسس» ساناتىنداعى تۇرعىن ءۇي قانشا تۇرۋى كەرەك بولسا، تۋرا سونشا تۇرادى. ءبىز مۇندا باعانىڭ كۇرت وزگەرۋىن كورىپ وتىرعان جوقپىز. جاڭا سالىق كودەكسىن قابىلداۋدىڭ ارقاسىندا الپاۋىت قۇرىلىس كومپانيالارى بيزنەستى بولشەكتەۋ ارقىلى تابىسقا كەنەلۋ تاجىريبەسىنەن كەتەدى، — دەدى ول.
رومان سكليار جاڭا سالىق كودەكسى كۇشىنە ەنگەننەن كەيىن قۇرىلىس كومپانيالارىنا مەملەكەتتىك تاپسىرىسپەن جۇمىس ىستەۋ ءتيىمدى بولا تۇسەتىنىن ايتتى.
— سالىقتى كوپ تولەگەندىكتەن تابىسى ازايادى. دەگەنمەن «باقىتتى وتباسى»، «ناۋرىز جۇمىسكەر» باعدارلامالارى اياسىندا از قامتىلعان ازاماتتارعا ارناپ مەملەكەتتىك تاپسىرىس جاساعان كەزدە جوبالىق سمەتالىق قۇجاتتاماعا سايكەس باعا پارامەترلەرىن رەتتەيتىن بولامىز. استىن سىزىپ ايتايىن، باسپانا باعاسىن نارىقتىق جولمەن بولسا دا رەتتەيمىز، - دەدى پرەمەر-ءمينيستردىڭ ءبىرىنشى ورىنباسارى.
ايتا كەتەيىك، كەشە رومان سكليار Airbus-تىڭ ەۋروپا بويىنشا پرەزيدەنتى جوان پەليسەمەن اۆياتسيا سالاسىنداعى ىنتىماقتاستىقتى دامىتۋ جايىن تالقىلاپ، قازاقستان اۋماعىندا ازاماتتىق جانە مەملەكەتتىك اۆياتسيا ۇشاقتارىن جوندەۋ مەن قىزمەت كورسەتۋ ورتالىعىن اشۋ قاجەتتىگىن مالىمدەگەن بولاتىن.
اۆتور
ەسىمجان ناقتىباي
