جاڭا مەگاپوليس: الاتاۋ قالاسىنىڭ 4 اۋدانى قانداي باعىتتاردا داميدى
الاتاۋ. KAZINFORM - بىرنەشە كۇن بۇرىن ارناۋلى مارتەبە العان الاتاۋ قالاسىنىڭ دامۋ جوسپارى تانىستىرىلدى.
بولاشاق قالاسىنا اينالۋ ءتيىس الاتاۋ بىرنەشە اۋدانعا بولىنەدى. ولاردىڭ ءارقايسىسىنىڭ ونەركاسىپتىك-لوگيستيكالىق ورتالىقتان باستاپ عىلىمي-ءبىلىم بەرۋ جانە تۋريستىك كلاستەرلەرگە دەيىن وزىندىك ەرەكشەلىگى بولادى.
بۇل اۋدان - قارجى-ىسكەرلىك جانە حالىقارالىق ساۋدا ورتالىعىنا اينالادى. ول وتەگەن باتىر، پوكروۆكا، قويانقۇس، ىنتىماق جانە جاڭالىق ەلدى مەكەندەرىنىڭ ورتاسىندا ورنالاسادى، جالپى اۋدانى - 4 مىڭ گەكتارعا جۋىق. بولاشاقتا مۇندا 220 مىڭنان استام ادام تۇرادى دەپ جوسپارلانعان (قازىر - نەبارى 15 مىڭ).
مۇندا 6,5 ميلليون شارشى مەتردەن استام تۇرعىن ءۇي، 3,6 ميلليون شارشى مەتر كوممەرتسيالىق نىسان، شامامەن 181 مىڭ جۇمىس ورنى، سونداي-اق مەكتەپتەر، بالاباقشالار مەن ەمحانالار سالىنادى. قازىردىڭ وزىندە PepsiCo ،Caspian Group جانە الماتى جەلدەتكىش زاۋىتىنىڭ جوبالارى جۇزەگە اسىرىلا باستادى. اۋداننىڭ سيمۆولى - حالىقارالىق بيزنەس دامىتۋ ورتالىعى Iconic Building-1 بولادى.
بۇل اۋدان - ەڭ ۇزدىك ءبىلىم بەرۋ جۇيەسى بار، زاماناۋي مەديتسينانىڭ ورتالىق بولماق. اۋماعى 15 مىڭ گەكتاردان اساتىن بۇل اۋدان كىشى الماتى مەن قاسكەلەڭ وزەندەرى اراسىنداعى جولدىڭ بويىنا ورنالاسادى. بولاشاقتا مۇندا 675 مىڭعا دەيىن تۇرعىن قونىستانادى (قازىر - شامامەن 2,3 مىڭ). 20 ميلليون شارشى مەتردەن استام تۇرعىن ءۇي جانە 3,6 ميلليون شارشى مەتر كوممەرتسيالىق نىسان سالۋ جوسپارلانىپ وتىر. جالپى 337 مىڭ جۇمىس ورنى، ونداعان مەكتەپ، بالاباقشا جانە مەديتسينا مەكەمەلەرى قاراستىرىلعان.
قازىرگى ۋاقىتتا مادەني-ىسكەرلىك K- Park كەشەنىنىڭ قۇرىلىسى باستالدى. بولاشاقتا حالىقارالىق ءبىلىم بەرۋ ورتالىعى، اكادەمقالاشىق، مەديتسينالىق كلاستەر جانە Hyundai Green Food Almaty مەن Mars كومپانيالارىنىڭ جوبالارى ىسكە اسادى.
بۇل - عىلىمي-وندىرىستىك ورتالىق جانە قازاقستاندى قىتاي مەن رەسەيمەن بايلانىستىراتىن ءىرى كولىك تورابىنا اينالادى. الماتى - قاپشاعاي تاسجولى مەن جەتىگەن - قازىبەك تەمىرجولىنىڭ بويىندا ورنالاسقان اۋدان 36 مىڭ گەكتاردان استام جەردى قامتيدى. مۇندا 650 مىڭنان استام ادام ءومىر سۇرەدى دەپ جوسپارلانعان. شامامەن 20 ميلليون شارشى مەتر تۇرعىن ءۇي سالىنىپ، 300 مىڭنان استام جۇمىس ورنى اشىلماق.
ايرىقشا ماڭىزعا يە نىسان - 1,5 مىڭ گەكتار اۋماقتاعى جاڭا اۋەجاي. وندىرىستىك ايماقتار كولىك دالىزدەرىنىڭ بويىنا شوعىرلانىپ، ءوندىرىس پەن لوگيستيكا ءۇشىن قولايلى جاعداي جاسايدى.
بۇل - تۋريزم، ەكولوگيا جانە دەمالىس اۋدانى. مۇندا كازينو ورتالىعى، تابيعي ايماقتار مەن بەلسەندى دەمالىس ينفراقۇرىلىمى بىرىكتىرىلەدى. ول قاپشاعاي سۋ قويماسى مەن قاسكەلەڭ وزەنىنىڭ جاعالاۋىندا، قونايەۆ قالاسىنىڭ جانىندا 31 مىڭ گەكتاردان استام اۋماقتى قامتيدى. 320 مىڭعا جۋىق ادام تۇرادى دەپ بولجانىپ وتىر. 10 ميلليون شارشى مەتر تۇرعىن ءۇي، 3,6 ميلليون شارشى مەتر كوممەرتسيالىق نىسان سالىنىپ، 155 مىڭ جۇمىس ورنى اشىلادى. بولاشاقتا مۇندا «فورمۋلا-1» تراسساسى جانە تۋريستىك كەشەن - Iconic Building-2 پايدا بولادى.
بۇگىنگى كورىنىس
بولاشاق مەگاپوليس اۋماعى - قازىر نەگىزىنەن بوس جاتقان القاپتار. دەگەنمەن، كەي اۋماقتا العاشقى قۇرىلىس جۇمىستارى باستالعان: الاڭدار تەگىستەلىپ، ارنايى تەحنيكا جۇمىس ىستەپ جاتىر. قالانىڭ جالپى اۋماعى 88 مىڭ گەكتاردان اسادى. ءبىراق بارلىق جەرگە قۇرىلىس جۇرگىزىلمەيدى: باستى نازار جاسىل ايماقتارعا، ساياباقتار مەن سۋ نىساندارىنا اۋدارىلادى. الاتاۋ - زاماناۋي ءارى ەكولوگيالىق قالا رەتىندە جوسپارلانىپ وتىر.
الاتاۋ قالاسىنىڭ اكىمى اركەن وتەنوۆ بۇگىنگى كۇنى جەردى مەملەكەتكە قايتارۋ جۇمىستارى بەلسەندى ءجۇرىپ جاتقانىن اتاپ ءوتتى. ايتۋىنشا، قازىر 1000 گەكتاردان استام جەر مەملەكەت مەنشىگىنە قايتارىلعان.
ال پرەمەر-ءمينيستردىڭ ورىنباسارى قانات بوزىمبايەۆ جەر ماسەلەسىنىڭ وتكىر ەكەنىن ايتتى. ونىڭ سوزىنشە، مەملەكەت زاڭسىز بەرىلگەن جەرلەردى قايتارىپ الۋدى كوزدەپ وتىر.
الاتاۋ قالاسى ينۆەستيتسيا ەسەبىنەن سالىنادى
- مەملەكەتتىڭ ءرولى - ينفراقۇرىلىمدى قامتاماسىز ەتۋ. بيزنەستىڭ جۇمىس ىستەۋى ءۇشىن جولدار، كوممۋنيكاتسيالار، الەۋمەتتىك نىساندار قاجەت. سول سەبەپتى پرەزيدەنت الاتاۋعا ەرەكشە مارتەبە بەرۋ جانە پرەمەر-مينيستر باسقاراتىن ارنايى كەڭەس قۇرۋ تۋرالى جەكە جارلىققا قول قويدى. مۇنىڭ ءبارى ينۆەستورلاردىڭ جۇمىسىن جەڭىلدەتۋگە جانە بيۋروكراتيالىق كەدەرگىلەردى ازايتۋعا باعىتتالعان، - دەدى اكىم اركەن وتەنوۆ.
جوباعا ونداعان كومپانيا قىزىعۋشىلىق تانىتىپ وتىر. كوبى ازىرگە جوبالاۋ كەزەڭىندە. الايدا كەيبىر ينۆەستور قۇرىلىسقا كىرىسىپ كەتكەن. مىسالى، PepsiCo كومپانياسى 80 ميلليارد تەڭگە كولەمىندە ينۆەستيتسيا قۇيعان.
- ۋاقىت وتە كەلە بۇل ءوندىرىستى كەڭەيتۋ جوسپارلانىپ وتىر. سونداي-اق Mars كومپانياسىمەن دە كەلىسسوزدەر ءجۇرىپ جاتىر، ولار ارنايى ەكونوميكالىق ايماقتا كاسىپورىن اشۋعا نيەتتى. كولىك-لوگيستيكالىق قىزمەتكە قىزىعۋشىلىق تانىتقان كومپانيالار دا كوبەيىپ كەلەدى، - دەدى قالا اكىمى.
ونىڭ ايتۋىنشا، قازىر 30 ينۆەستوردىڭ ءتىزىمى جاساقتالعان. ولاردىڭ جالپى ينۆەستيتسيا كولەمى 500 ميلليارد تەڭگەگە باعالاندى، شامامەن 7 مىڭ جۇمىس ورنى اشىلادى.
قانات بوزىمبايەۆ قالا نەگىزىنەن جەكە ينۆەستيتسيالار ەسەبىنەن سالىناتىنىن، ال مەملەكەت الەۋمەتتىك ينفراقۇرىلىمدى - مەكتەپتەر، اۋرۋحانالار، بالاباقشالاردى سالۋدى ءوز موينىنا الاتىنىن ايتتى.
- ءبىز مەديتسينالىق كلاستەر قۇرۋدى جوسپارلاپ وتىرمىز. مىسالى، وڭتۇستىك كورەيانىڭ بىرنەشە ينۆەستورى ءوز ەمحانالارىن اشۋعا دايىن. ماقسات - ولاردى مىندەتتى مەديتسينالىق ساقتاندىرۋ جۇيەسىنە ەنگىزىپ، جەرگىلىكتى حالىققا قىزمەت كورسەتۋگە جاعداي جاساۋ. مۇنداي باستامالاردى ءبىز باس جوسپارعا ەنگىزەمىز، - دەدى ول.
الاتاۋدىڭ الداعى 5 جىلداعى دامۋى
قانات بوزىمبايەۆتىڭ ايتۋىنشا، الاتاۋ قالاسىنىڭ دامۋى ۇزدىكسىز جۇرەدى.
- قالا ۇنەمى جاڭارىپ، جەتىلدىرىلىپ وتىرادى. ءبىراق الداعى بەس جىلداعى باستى مىندەت - ىرگەتاسىن قالاپ، ونى قازاقستان ەكونوميكاسىنىڭ درايۆەرىنە اينالدىرۋ، - دەدى ول.
ۆيتسە-پرەمەر الاتاۋ - ادامدار جايلى ءومىر ءسۇرىپ، وقىپ، جۇمىس ىستەپ ءارى دەمالا الاتىن پوليورتالىقتى قالاعا اينالۋى كەرەك ەكەنىن اتاپ ءوتتى.
- بۇل مىندەتتى جۇزەگە اسىرۋ ءۇشىن ءبىز ۋربانيستيكا سالاسىنداعى ۇزدىك مامانداردى تارتىپ وتىرمىز. العاشقى ناتيجەلەردى تۇرعىندار كەلەسى جىلى كورەدى، ول كەزدە قارقىندى قۇرىلىس جۇمىستارى باستالادى، - دەدى ۆيتسە-پرەمەر.
ەسكە سالايىق، بۇعان دەيىن الاتاۋ قالاسى قازاقستانداعى العاشقى سيفرلىق شاھارعا قالاي اينالاتىنىن جازعانبىز.
