جىلقى ەتى الەۋمەتتىك ماڭىزى بار تاۋارلار تىزبەسىنە كىرۋى مۇمكىن

استانا. KAZINFORM - ماجىلىستە ءوتىپ جاتقان دوڭگەلەك ۇستەلدە جىلقى ەتى الەۋمەتتىك ماڭىزى بار تاۋارلار تىزبەسىنە ەنۋى مۇمكىن ەكەنى ايتىلدى.

ءماجىلىس دەپۋتاتى قازىبەك الىشيەۆ جىلقى ەتىن تۇتىنۋشىلاردىڭ ۇلەسى جىلدان-جىلعا ارتىپ كەلە جاتقانىن ايتىپ، نەگە ونى الەۋمەتتىك ماڭىزى بار تاۋارلاردىڭ تىزبەسىنە قوسىلماي كەلە جاتقانىن سۇرادى.

بۇل سۇراققا ساۋدا جانە ينتەگراتسيا ۆيتسە-ءمينيسترى جانەل كۇشىكوۆا جاۋاپ بەردى.

- ەشقانداي كەدەرگى جوق. ءبىز ول ۇسىنىستى قارايىق. ونداي ماسەلە وسىعان دەيىن كوتەرىلگەن جوق. الەۋمەتتىك ماڭىزى بار تاۋارلاردىڭ ءتىزىمى باياعىدان ەل ىشىندە جوعارى قولدانىسقا يە ونىمدەردەن جاساقتالىپ، قالىپتاسقان. ءبىز ونى كەزەڭ-كەزەڭ سايىن قاراپ وتىرامىز. ول تاۋارلاردىڭ باعاسى قول جەتەرلىكتەي بولۋ كەرەك، - دەدى جانەل كۇشىكوۆا.

وتكەن ايدا، ساۋدا جانە ينتەگراتسيا ۆيتسە-ءمينيسترى قايرات تورەبايەۆ ەل وڭىرلەرىندە سيىر ەتىنىڭ باعاسى وسكەنىن راستاعان ەدى.