جاڭا كاسساتسيالىق سوتتاردىڭ ءتوراعالارى مەن سۋديالارى تاعايىندالدى
استانا. KAZINFORM - كاسساتسيالىق سوتتار «جاپپاي كاسساتسيا» پرينتسيپى بويىنشا جۇمىس ىستەي باستادى.
بيىلعى 1-شىلدەدەن باستاپ استانادا مەملەكەت باسشىسىنىڭ 2023-جىلعى قىركۇيەكتە كاسىپكەرلەرمەن كەزدەسۋىندە مالىمدەگەن تاپسىرماسى بويىنشا قىلمىستىق، ازاماتتىق جانە اكىمشىلىك ىستەر بويىنشا ءۇش كاسساتسيالىق سوت ءوز جۇمىسىن باستادى.
جاڭا سوتتار ەلوردادا ورنالاسقان.
بيىلعى 1-شىلدەگە دەيىن كاسساتسيالىق ساتىنىڭ فۋنكتسيالارىن جوعارعى سوت جۇزەگە اسىردى. ازاماتتىق جانە قىلمىستىق ىستەردى قاراۋ «تاڭدامالى» كاسساتسيالىق ءتارتىپ بويىنشا جۇرگىزىلدى.
ونىڭ ءمانى ازاماتتىق ىستەر بويىنشا ازاماتتاردىڭ ءوتىنىشحاتتارى الدىمەن الدىن الا قاراۋعا بەرىلىپ، ولاردى القالى قاراۋعا بەرۋ نەمەسە بەرۋدەن باس تارتۋ تۋرالى شەشىمدى سۋديانىڭ ءوزى عانا شىعاردى.
قىلمىستىق ىستەر بويىنشا الدىن الا قاراۋ القالى تۇردە، ءۇش سۋديانىڭ قاتىسۋىمەن جۇرگىزىلدى.
- ءبىراق بۇل ءتارتىپ جەتىلدىرىلمەگەن، ازاماتتارعا بەلگىلى ءبىر قولايسىزدىق تۋدىردى. باستاپقىدا اكىمشىلىك ادىلەتتىڭ ەنگىزىلۋىمەن جاپپاي كاسساتسيالىق ءتارتىپ قولدانىلعان اكىمشىلىك ىستەر بويىنشا شاعىمدار تۇسكەن جوق. ناتيجەسىندە، سوت ءىسىن جۇرگىزۋدىڭ ءۇش ءتۇرى بويىنشا كاسساتسيالىق تارتىپتە قايتا قاراۋعا باسقاشا كوزقاراس پايدا بولدى. بۇل جاعداي كاسساتسيالىق قاراۋعا قولجەتىمدىلىكتى شەكتەدى جانە تيىسىنشە سوت تورەلىگىنە قولجەتىمدىلىك تۋرالى قوعامنىڭ سۇرانىسىن قاناعاتتاندىرمادى، - دەلىنگەن حابارلامادا.
بيىلعى جىلدىڭ 1-شىلدەسىنەن باستاپ قىلمىستىق جانە ازاماتتىق ىستەردى الدىن الا قاراۋ جويىلدى.
- كاسساتسيالىق سوتتار «جاپپاي كاسساتسيا» پرينتسيپى بويىنشا جۇمىس ىستەي باستادى. «جاپپاي» كاسساتسيا، ەڭ الدىمەن، ءىستى ءىس جۇرگىزۋگە قابىلداۋ ساتىسىمەن ەرەكشەلەنەدى. ەندى بارلىق كەلىپ تۇسكەن شاعىمدار ءىس جۇرگىزۋگە قابىلدانىپ، ءمانى بويىنشا كەمىندە ءۇش سۋديادان تۇراتىن القادا قارالادى. سونىڭ ناتيجەسىندە سوت اكتىلەرىن كاسساتسيالىق تارتىپتە قايتا قاراۋ سوتتىڭ قالاۋى بويىنشا جۇرگىزىلمەيدى. ىستەردى كاسساتسيالىق تارتىپتە قاراۋ مەرزىمى التى ايدان اسپايدى، - دەلىنگەن جوعارعى سوت حابارلاماسىندا.
جوعارعى سوت جوعارى سوت ورگانى رەتىندە سوت پراكتيكاسىنىڭ بىركەلكىلىگىن قامتاماسىز ەتۋگە باسا نازار اۋداراتىن بولادى.
جوعارعى سوت سۋدياسىنىڭ باستاماسى بويىنشا سوت اكتىلەرىن قايتا قاراۋ، ەگەر ولاردى سوت پراكتيكاسىنا قايشى كەلەتىن جەرگىلىكتى جانە كاسساتسيالىق سوتتار قابىلداعان ەرەكشە جاعدايلاردا مۇمكىن بولادى.
مەملەكەت باسشىسىنىڭ جارلىعىمەن مىنالار تاعايىندالدى:
ازاماتتىق ىستەر جونىندەگى كاسساتسيالىق سوت ءتوراعاسى - سمايىلوۆ اسقار سپارتاك ۇلى جانە 37 سۋديا؛
قىلمىستىق ىستەر جونىندەگى كاسساتسيالىق سوت ءتوراعاسى - جۇماعۇلوۆ اقان مارات ۇلى جانە 20 سۋديا؛
اكىمشىلىك ىستەر جونىندەگى كاسساتسيالىق سوت ءتوراعاسى - ناجىميدەنوۆ بەرىك تولەۋتاي ۇلى جانە 18 سۋديا.
سوت اكىمشىلىگى باسشىسىنىڭ وكىمىمەن:
كاسساتسيالىق سوتتار دەپارتامەنتىنىڭ باسشىسى بولىپ قوجاحمەتوۆ ەرجان قايروللا ۇلى تاعايىندالدى.
استانا قالاسىنداعى كاسساتسيالىق سوتتاردىڭ مەكەنجايلارى:
ازاماتتىق جانە قىلمىستىق ىستەر بويىنشا - استانا قالاسى، بەيبىتشىلىك كوشەسى، 37؛
اكىمشىلىك ىستەر بويىنشا - استانا قالاسى، تولە ءبي كوشەسى، 53
ايتا كەتەلىك مەملەكەت باسشىسى قاسىم-جومارت توقايەۆ قازاقستان رەسپۋبليكاسى كاسساتسيالىق سوتتارىنىڭ ءتوراعالارى مەن سۋديالارىن تاعايىنداۋ تۋرالى جارلىققا قول قويعان ەدى.
