جاڭا جىل قارساڭىنداعى نانىم-سەنىمدەر

استانا. KAZINFORM — جاڭا جىل ءدامدى تاماق جەپ، ءتاتتى سۋسىن ءىشىپ، جۇرەكجاردى تىلەك الماساتىن مەرەكە عانا ەمەس. بۇل مەيرامنىڭ ءمان-ماڭىزى زور. «جاڭا جىل - جاڭا ءومىردىڭ باستاۋى» دەسەك بولادى.

كەيدە ادامدار ءتۇرلى نانىم-سەنىمدەرگە سۇيەنىپ ءومىر سۇرەدى. اسىرەسە جاڭا جىل قارساڭىندا الداعى جىلدى بولجاۋعا ەرەكشە كوڭىل بولەتىندەي. كەيدە ءتىپتى تاعدىردىڭ ءوزى بەلگى بەرەتىندەي. ونى بىرەۋى بايقاسا، ەندى ءبىرى ەلەمەۋى مۇمكىن. سول سەبەپتى جاڭا جىل قارساڭىندا اينالاعا زەر سالىپ، ەشتەڭەنى ەلەۋسىز قالدىرماعان ءجون.

ەندىگى رەتتە ىرىم-نانىمداردىڭ ەڭ تانىمالدارىنا توقتالىپ وتەلىك.

تازالىق پەن ءتارتىپ

*جاڭا جىلعا دەيىن قارىز قايتارىپ، وكپە-رەنىشتى كەشىرگەن دۇرىس. كەلەر جىلعا نەگاتيۆتى ەنەرگيانى ارقالاماۋ ءۇشىن بارلىق ءىستى اياقتاپ، «كارمانى» تازالاۋ كەرەك.

*جاڭا جىل ءتۇنى جاڭا ءارى ادەمى كيىم-كەشەك كيگەن ءجون. بۇل ومىرىڭىزدە جارقىن وقيعالاردىڭ كوپ بولۋىنا سەپتىگىن تيگىزەدى.

مولشىلىق پەن بايلىقتى شاقىرۋ

*ءۇيدى مەرەكەگە وراي بەزەندىرۋ كەرەك. سول ارقىلى ومىرىڭىزگە مولشىلىق پەن تولاعاي تابىس تارتاسىز.

* قارجىلىق تۇراقتىلىقتى قالاساڭىز، قالتاڭىزعا اقشا سالىڭىز. كەيبىرەۋلەر جاڭا جىل ءتۇنى قالتاسىنا اقشا سالىپ قويادى. «بۇل - بايلىق شاقىرۋدىڭ بەلگىسى» دەپ سەنەدى.

*مەرەكە ءتۇنى ەشتەڭە سىندىرماڭىز. بۇل ماتەريالدىق شىعىنداردان ساقتايدى.

*داستارقانىڭىز بوس بولماۋى كەرەك. بوس داستارقان - كەدەيلىكتىڭ بەلگىسى. سول سەبەپتى تاماقتى مولىنان ازىرلەپ، مەرەكەلىك ۇستەلدى «جايناتىپ»، اس-اۋقاتقا تولتىرعان ابزال.

ارمان مەن تىلەك

*ساعات ءتىلى تۇنگى 12:00 گە كەلگەندە تىلەك تىلەڭىز. ول مىندەتتى تۇردە ورىندالادى. سول ساتتە بولماسا دا، ءبىر جىل ىشىندە جاقسىلىقتىڭ بولاتىنى حاق.

* جاڭا جىلدى كوتەرىڭكى كوڭىل-كۇيدە قارسى الىڭىز.

*ساعات 12:00 دە شام جاعۋ، قاعازعا تىلەك جازىپ، ونى ورتەپ، كۇلىن سۋسىنعا ارالاستىرىپ ىشەتىندەر دە بولادى.

* جاڭا جىلدىق وتشاشۋ كەزىندە تىلەك ايتۋ ادەتى بار.

جاقسى ادامداردىڭ ورتاسىندا بولۋ

*جاڭا جىلدا العاشقى بولىپ قۇشاعىڭىزعا العان ادام ءبىر جىل بويى جانىڭىزدان تابىلادى.

جاقسىلىق جاساپ جارىسايىق!

*كوشەدە ءيت نەمەسە مىسىق كەزىكسە، تاماقتاندىرىڭىز. بۇل ومىرىڭىزگە جىل بويى جاقسىلىق پەن ساتتىلىك اكەلەدى.

*مەرەكەلىك داستارقاننان قالعان تاماقتى تاستاماڭىز. ارتىعى قالسا، جانۋارلارعا بەرىڭىز. وسىلايشا، جاقسىلىق جاساۋدىڭ العاشقى قادامدارىن باستاڭىز.

تۇستەردىڭ سيمۆوليكاسى

*كيىمنىڭ ءتۇسى. جاڭا جىلدا قىزىل نەمەسە التىن ءتۇستى كيىم كيۋ ساتتىلىك پەن قۋانىش اكەلەدى دەپ سانالادى.

*ۇستەلىڭىزگە اق ءتۇستى داستارقان جايۋدى ۇمىتپاڭىز. بۇل ارەكەت تازالىق پەن جاڭا وقيعالارعا اشىق بولۋدى ايعاقتايدى.

تىيىمدار

*جاڭا جىل قارساڭىندا قوقىس شىعارماڭىز. وسىلايشا «لاس ىستەردەن» ساق بولاسىز.

*ارتىق زاتتاردان ارىلىڭىز. يتالياندىقتار سياقتى ەسكى زاتتاردى ورتەپ، جاڭا ومىرگە جول اشىڭىز.

*ۇرىسپاۋ. تۋىستارمەن نەمەسە جاقىندارمەن جانجالداسۋدان اۋلاق بولۋ كەرەك. ۇرىس-كەرىس جاماندىق شاقىرادى دەپ ەسەپتەلەدى.

جاڭا جىلداعى ءبىرىنشى ارەكەت

*كەيبىرەۋلەر جاڭا جىلدىڭ العاشقى مينۋتتارىندا اقشا ساناۋ نەمەسە جاعىمدى ءىس جاساۋ كەرەك دەپ ويلايدى. سەبەبى «بۇل - بولاشاقتىڭ ءساتتى باستاماسى» دەپ ەسەپتەلەدى.

شاشۋ مەن وتشاشۋ

*وتشاشۋلار مەن شامدار - تەرىس كۇشتەردى قورقىتىپ، جىلعا جارىق پەن قۋانىش اكەلەدى دەپ سانالادى.