جاڭا جۇقپالى اۋرۋلاردىڭ ەداۋىر بولىگى جانۋارلاردان تارايدى - دارىگەر

الماتى. KAZINFORM - الماتى قالاسىنىڭ سانيتارلىق دارىگەرلەرى زوونوزدى ينفەكسيالاردىڭ الدىن الۋ جولدارىن ءتۇسىندىردى.

الماتى قالاسى سانيتاريالىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى اسەل قالىقوۆانىڭ ايتۋىنشا، زوونوزدىق ينفەكسيالار جانۋارلاردان ادامعا تابيعي جولمەن جۇعادى. جاڭا جۇقپالى اۋرۋلاردىڭ ەداۋىر بولىگى جانۋارلاردان تارايدى جانە بۇكىل الەم بويىنشا حالىق دەنساۋلىعىنا ەلەۋلى قاۋىپ توندىرەدى.

- ەڭ كەڭ تارالعان زوونوزدارعا قۇتىرما، سارىپ، لەپتوسپيروز، سالمونەللەز، سونداي-اق ورنيتوز، توكسوپلازموز جانە باسقا دا ينفەكسيالار جاتادى. بۇل اۋرۋلار اۋىر تۇردە ءوتىپ، كۇردەلى اسقىنۋلارعا، كەي جاعدايدا ولىمگە اكەلۋى مۇمكىن. ينفەكسيانىڭ نەگىزگى كوزدەرى: ءۇي جانۋارلارى (مىسىقتار، يتتەر)، اۋىل شارۋاشىلىعى جانۋارلارى (ءىرى قارا مال، شوشقالار، قۇستار)، جابايى جانۋارلار، كەمىرگىشتەر، - دەدى اسەل قالىقوۆا.

سانيتاريالىق دارىگەر ينفەكسيانىڭ ادامعا بەرىلۋىنىڭ نەگىزگى جولدارىن اتادى:
- ينفەكسيا جانۋارلارمەن بايلانىس كەزىندە نەمەسە ولاردىڭ سىلەكەي، قان، ءزارى ارقىلى جۇعادى.
- اليمەنتارلىق جول: ينفەكسياسى بار تاعامدى (ەت، ءسۇت، جۇمىرتقا) قولدانعاندا بەرىلەدى.
- اەروگەندىك جول: ينفەكسيا قۇرامىندا قوزدىرعىشتارى بار شاڭ نەمەسە اەروزول ارقىلى اۋا ارقىلى تارالادى.
- ترانسميسسيۆتىك جول: ينفەكسيا تاسىمالداۋشىلار (كەنەلەر، ماسالار، بۇرگەلەر) ارقىلى بەرىلەدى.

- جانۋارلارمەن تىعىز بايلانىس، ۆەتەرينارلىق باقىلاۋدىڭ بولماۋى، سانيتارلىق-گيگيەنالىق تالاپتاردى ساقتاماۋ، ساپاسىز تاعام ونىمدەرىن پايدالانۋ - ينفەكسيا جۇقتىرۋ قاۋپىنە اكەلەدى. زوونوزدىق ينفەكسيالاردىڭ الدىن الۋ ءۇشىن جەكە باس گيگيەناسىن ساقتاۋ ماڭىزدى. سونداي-اق جانۋارلاردى كۇتۋ نەمەسە شيكىزاتپەن جۇمىس ىستەۋ كەزىندە جەكە قورعانىس قۇرالدارىن پايدالانۋ قاجەت. ودان بولەك ءۇي جانە اۋىل شارۋاشىلىعى جانۋارلارىن تۇراقتى ۆەتەريناريالىق تەكسەرۋدەن وتكىزۋ، جانۋارلاردى ۆاكسيناتسيالاۋ، كەمىرگىشتەر مەن جاندىكتەرگە قارسى وڭدەۋ جۇرگىزۋ كەرەك، - دەدى ول.