«جاڭا اۋەن» جوباسى قايتا جاندانادى - ەربوسىن نۇرمۇحان ۇلى
استانا. KAZINFORM - قازاق مادەنيەتى مەن ونەرىنە وزىندىك ۇلەس قوسقان، قىتاي قازاقتارى اراسىندا تانىمال «جاڭا اۋەن» جوباسى قايتا جاندانباق. بۇل تۋرالى قازاقپارات تىلشىسىنە اتالعان كومپانيانىڭ ديرەكتورى ەربولسىن نۇرمۇحان ۇلى ايتىپ بەردى.
جاقىندا استانا قالالىق فيلارمونيا زالىندا «اتاجۇرتتا جاڭا اۋەن» اتتى كونسەرت وتەدى.
كەشتە تەك شەتەلدە تۋىپ-وسكەن قازاق ونەرپازدار عانا ەمەس، قازاقستاننىڭ تانىمال ەسترادا جۇلدىزدارى دا ونەر كورسەتەدى. اتاجۇرتتى اۋەنمەن تەربەتەتىن بۇل كەش - «جاڭا اۋەن» كومپانياسىنىڭ قازاقستانداعى العاشقى ۇلكەن جوبالارىنىڭ ءبىرى.
- بيىل ەلىمىزدىڭ تاۋەلسىزدىك العانىنا 35 جىل تولىپ وتىر. سونىمەن قاتار تاۋەلسىزدىكپەن بىرگە باستالعان ۇلى كوشكە دە 35 جىل بولدى. جاقىندا ەلىمىز ءۇشىن ماڭىزدى تاريحي وقيعالاردىڭ ءبىرى - جاڭا اتا زاڭىمىز قابىلداندى. وسىنداي مەرەيلى كەزەڭدە حالىققا ەرەكشە رۋحاني سىي جاساپ، مەرەكەلىك كوڭىل كۇي سىيلاۋ ماقساتىندا استانا قالالىق فيلارمونيا زالىندا «اتاجۇرتتا جاڭا اۋەن» اتتى كونتسەرت ۇيىمداستىرىپ جاتىرمىز. بۇل كەشتە «جاڭا اۋەن» ونەرپازدارى مەن قازاق ەستراداسىنىڭ بەلگىلى انشىلەرى ءبىر ساحنادا ءان شىرقايدى، - دەدى ەربوسىن نۇرمۇحان ۇلى.
پروديۋسەر قازاق ونەرىن دامىتۋ باعىتىنداعى الداعى جوسپارلارىمەن دە ءبولىستى.
- قازاقستانعا قونىس اۋدارعالى بەرى بيزنەس سالاسىندا ەڭبەك ەتىپ كەلەمىن. وسى ۋاقىت ارالىعىندا وقىرماندار مەن كورەرمەندەر «جاڭا اۋەن» جوبالارى توقتاپ قالماسا ەكەن دەگەن تىلەكتەرىن ءجيى بىلدىرەدى. حالىقتىڭ وسى سۇرانىسىن ەسكەرە وتىرىپ، جوبانى قايتا جانداندىرۋدى قولعا الدىم. جۋىردا قازاقستاننىڭ ءبىرقاتار وڭىرلەرىن ارالاپ، «جاڭا اۋەن» ونەرپازدارىنان قۇرالعان شاعىن توپپەن كونتسەرتتەر وتكىزدىك. كورەرمەننىڭ ىقىلاسى ەرەكشە بولدى. ەندى، مىنە، استانادا قورىتىندى ۇلكەن كەش ۇيىمداستىرىپ وتىرمىز. كەلەر جىلى «جاڭا اۋەن» كومپانياسىنىڭ قۇرىلعانىنا 30 جىل تولادى. وسىعان وراي اۋقىمدى جوبالار جوسپارلانۋدا. بۇعان دەيىن قىتايدا بىرگە كونسەرت قويعان قازاقستاندىق ونەر جۇلدىزدارى مەن تەاتر مايتالماندارىن تارتا وتىرىپ، الداعى ۋاقىتتا ەكى ەل اراسىندا ۇلكەن مادەني جوبالاردى جۇزەگە اسىرۋ ويىمىزدا بار، - دەدى ول.
ەربوسىن نۇرمۇحان ۇلى - تانىمال كاسىپكەر، پروديۋسەر، ەكونوميست، ق ر «مادەنيەت سالاسىنىڭ ۇزدىگى» توسبەلگىسىنىڭ يەگەرى. ول «جاڭا اۋەن» كومپانياسى ارقىلى كوپتەگەن جاس تالانتتىڭ تانىلۋىنا، ونەرىن شىڭداۋىنا ىقپال ەتتى. سونداي-اق ەل اراسىندا ساقتالعان حالىق اندەرىن جيناقتاپ، جاڭعىرتىپ، جاڭا سيپاتتا كەڭىنەن ناسيحاتتاۋعا ۇلەس قوستى. بۇگىندە بۇل تۋىندىلار الەم قازاقتارىنىڭ ورتاق رۋحاني مۇراسىنا اينالدى.
سونىڭ ىشىندە «قاراجورعا» سىندى حالىق مۇراسىن جاڭاشا وڭدەپ، ۇلتتىق مادەني قۇندىلىق رەتىندە قايتا جاڭعىرتۋعا اتسالىستى. سونىمەن قاتار قازاقستان مەن قىتاي اراسىنداعى مادەني بايلانىستى نىعايتۋدا قازاق ونەرىن تانىتقان التىن كوپىر بولدى. بۇگىندە «ءۇرىمجى جاڭا اۋەن» ۇجىمى مەن ونىڭ ونەرپازدارى قازاقستاندا شىعارماشىلىق جۇمىستارىن جالعاستىرىپ كەلەدى.
ايتا كەتەيىك، «اتاجۇرتتا جاڭا اۋەن» كونسەرتى 20 -ءساۋىر كۇنى ساعات 19:00 دە استانا قالالىق فيلارمونيا زالىندا وتەدى. كەشتە ساكەن جاقسىلىق ۇلى، مارجان اراپبايەۆا، ۇشقىن جامالبەك، مۇراتبەك سارباسوۆ، قاجىمۇرات شەشەنقۇل ۇلى، احمەتجان رابجان، اينۇر قاجيموللا قىزى، ۇلبوسىن كەنجەباي، «دوس» توبى، داۋرەن نۇرعوجا، ەرجان ماديار، امانگۇل عابيدەن، ەركەگۇل ايدول، قۇرمەتجان باعداۋلەت، «ورال & جاندوس»، التىناي نۇربەك، مۇراتجان ماحمۇت، گۇلسىناي سەرىك قىزى، «بەرەن» توبى، باعجان ەرعايىپ، ءنۇربۇبى نۇرىمباي قىزى جانە وزگە دە ونەرپازدار ونەر كورسەتەدى.
بيلەتتەر Kassir.kz سايتى ارقىلى جانە استانا قالاسىنداعى Qazsound music ورتالىعىندا (ونلاين جانە وفلاين) ساتىلادى.
ريزابەك نۇسىپبەك ۇلى
