حەزبوللا يزرايل بازاسىنا درونمەن شابۋىل جاساپ، ءتورت سارباز مەرت بولدى

استانا. KAZINFORM - اسكەريلەردىڭ حابارلاۋىنشا، يزرايلدىڭ سولتۇستىگىندەگى اسكەري بازاعا جاسالعان درون شابۋىلىنان ءتورت يزرايلدىك سارباز قازا تاۋىپ، 60 تان استامى جارالاندى، دەپ جازادى BBC.

يزرايل قورعانىس كۇشتەرىنىڭ حابارلاۋىنشا، حايفانىڭ وڭتۇستىگىندەگى بينيامين- گيۆات-ادا بەكەتىندە ورنالاسقان بازاعا جاسالعان شابۋىل كەزىندە جەتى سارباز اۋىر جارالانعان.

ماگەن داۆيد ادوم (MDA) مەديتسينالىق قىزمەتى بۇعان دەيىن شابۋىلدان 61 ادام جارالانعانىن حابارلاعان. 37 ادام جەدەل جاردەم جانە تىكۇشاقپەن اۋرۋحانالارعا جەتكىزىلدى.

شابۋىلدى «حەزبوللا» ۇيىمى ءوز موينىنا الدى. ۇيىمنىڭ باسپا ءسوز قىزمەتىنىڭ حابارلاۋىنشا، بۇل سوققى يزرايلدىڭ بەيسەنبى كۇنگى ليۆاننىڭ وڭتۇستىگى مەن بەيرۋتتاعى شابۋىلدارىنا جاۋاپ رەتىندە جاسالدى.

وقيعا ورنىنان تۇسىرىلگەن كادرلارعا قاراعاندا، شابۋىل كەزىندە اسكەري قىزمەتكەرلەر اسحانادا بولعان. الەۋمەتتىك جەلىدە تاراعان سۋرەتتەردە توبەسىندە سوققىدان كەيىنگى تەسىگى بار بوس اسحانا كورىنەدى.

Times of Israel گازەتىنىڭ الدىن الا تەرگەۋ دەرەكتەرىنە سىلتەمە جاساي وتىرىپ حابارلاۋىنشا، «حەزبوللا» جەرورتا تەڭىزىنەن ەكى «ميرساد» ۇشقىشسىز ۇشاعىن ۇشىرعان.

يزرايلدىك Alma Research زەرتتەۋ ورتالىعىنىڭ مالىمەتى بويىنشا، ولاردىڭ «جويۋ راديۋسى 120 شاقىرىم، ماكسيمالدى جىلدامدىعى 370 ك م/ساع، 40 ك گ-عا دەيىن جارىلعىش زاتتى تاسىمالداۋعا جانە 3 ك م بيىكتىكتە ۇشۋعا قابىلەتتى».

ەكى ۇشقىشسىز ۇشاقتى يزرايلدىك رادار قاداعالادى جانە ونىڭ بىرەۋىن حايفانىڭ سولتۇستىك جاعالاۋىندا قاعىپ ءتۇسىردى، ال ەكىنشى ۇشاق جەرگە تىم جاقىن ۇشقاندىقتان راداردان جوعالىپ كەتتى، دەپ حابارلايدى باسىلىم.

اۆتور
ەركەجان سماعۇلوۆا