«حەزبوللا» حاسان ناسراللانىڭ دەنەسىن تاپتى

استانا. KAZINFORM - ليۆانداعى «حەزبوللا» توبى ءوزىنىڭ مارقۇم باسشىسى حاسان ناسراللانىڭ دەنەسىن تاپتى.

بۇل تۋرالى Reuters جانە AFP اقپارات اگەنتتىكتەرى جەكسەنبى، 29-قىركۇيەكتە قوزعالىستىڭ وزىندەگى دەرەككوزدەرگە سىلتەمە جاساپ حابارلادى. ولاردىڭ ايتۋىنشا، ناسرۋللانىڭ دەنەسىندە اشىق جاراقات جوق. بۇل ونىڭ جارىلىس تولقىنىنىڭ اسەرىنەن ولگەن بولۋى مۇمكىن دەگەندى بىلدىرەدى، دەپ جازادى DW.

«ونىڭ دەنەسى سەنبى كۇنى تابىلدى»، - دەدى جۋرناليستەرگە «حەزبوللا» وكىلى.

ونىڭ ايتۋىنشا، ناسراللامەن قوشتاسۋ جانە جەرلەۋ كۇنى ءالى انىقتالعان جوق. ناسراللا 27-قىركۇيەكتە يزرايل قورعانىس كۇشتەرى (ساحال) بەيرۋتتىڭ شەتىندەگى قوزعالىستىڭ باسقارۋ ورتالىعىنا اۋەدەن سوققى بەرگەندە قازا تاپتى. كۋاگەرلەردىڭ ايتۋىنشا، حيزبوللا شتابىنان تەك قيراندىلار مەن تەرەڭدىگى 30 مەترلىك قابىرعا قالعان.

ناسراللا ليۆانداعى قوزعالىستى 30 جىلدان استام باسقاردى. ونىمەن بىرگە توپتىڭ تاعى بىرنەشە جوعارى شەندى قولباسشىسى، سونداي-اق يراننىڭ ايتۋىنشا، يسلام ريەۆوليۋتسياسى ساقشىلار كورپۋسى قولباسشىسىنىڭ ورىنباسارى كوز جۇمدى.

يزرايل ليۆان تەرريتورياسىنا شابۋىلىن جالعاستىرىپ جاتىر

29-قىركۇيەكتە يزرايل قورعانىس كۇشتەرى ليۆاننىڭ وڭتۇستىگىندەگى حەزبوللانىڭ تاعى 120 نىسانىنا سوققى بەرگەنىن حابارلادى. بۇل نىسانالاردىڭ اراسىندا جويعىشتاردىڭ كوماندالىق پۋنكتتەرى، قارۋ-جاراق قويمالارى جانە ينفراقۇرىلىم بولدى، دەپ ناقتىلادى ساحال.

سونىمەن قاتار يزرايل اسكەريلەرى توپتىڭ تاعى ءبىر قولباسشىسى نابيل كاۋكتىڭ كوزى جويىلعانىن حابارلادى. «حەزبوللا» بۇل اقپاراتقا ازىرگە تۇسىنىكتەمە بەرگەن جوق. ءبىراق قوزعالىس جاقتاستارى كاۋكتىڭ ءولىمى تۋرالى حاباردى ءبىر كۇن بۇرىن جاريالادى.

«ءال- جازيرا» تەلەارناسى ليۆان دەنساۋلىق ساقتاۋ مينيسترلىگىنە سىلتەمە جاساپ، ءيزرايلدىڭ ليۆانعا ءبىر تاۋلىكتە جاساعان اۋە شابۋىلى سالدارىنان 77 ادامنىڭ قازا تاپقانىن حابارلادى.

«حەزبوللا» ءوز جەتەكشىسى حاسان ناسراللانىڭ قازا بولعانىن راستاعان بولاتىن.