چەحيادا جالعىزباستى مۇقتاج اتا-انالاردىڭ سانى ارتىپ كەلەدى
استانا. KAZINFORM - چەحيانىڭ ستاتيستيكا باسقارماسى وتكەن جىلى بالالى وتباسىلاردىڭ ءال-اۋقاتىنا قاتىستى اۋقىمدى زەرتتەۋ جۇرگىزىپ، قازىرگى جاعدايدىڭ ناشارلاعانىنا الاڭداۋشىلىق ءبىلدىرىپ وتىر، دەپ جازادى ازەرتادج.
8500 چەحيالىق ءۇي شارۋاشىلىعىن قامتىعان بۇل زەرتتەۋ ناتيجەسىندە 2024 -جىلى بالالى وتباسىلاردىڭ %12 ى تابىستىڭ جەتكىلىكسىزدىگى ماسەلەسىنە تاپ بولعانى انىقتالدى. سالىستىرمالى تۇردە ايتقاندا، 2022 -جىلى بۇل كورسەتكىش %10 دى قۇراعان. مۇنداعى «تابىسى بويىنشا كەدەيلىك» ۇعىمى - وتباسىلاردىڭ اي سايىنعى تابىسى چەحياداعى ورتاشا تازا تابىستىڭ %60 ىنان تومەن بولۋى.
ەڭ اۋىر جاعداي - جالعىزباستى اتا-انالار مەن ءۇش جانە ودان دا كوپ بالاسى بار وتباسىلاردا بايقالادى. ءبىرىنشى جاعدايدا %36,6 وتباسى تابىستىڭ جەتكىلىكسىزدىگىن باستان كەشىرسە، ەكىنشى جاعدايدا بۇل كورسەتكىش %23,6 دى قۇراعان. ارناۋلى ۇكىمەتتىك ەمەس ۇيىمدار چەحياداعى جالعىزباستى اتا-انالاردىڭ جاعدايى بىرنەشە جىلدان بەرى جاقسارماي كەلە جاتقانىن اتاپ ءوتىپ وتىر.
چەحيا عىلىم اكادەمياسىنىڭ سوتسيولوگيالىق ينستيتۋتى مەن ۇلتتىق SYRI ينستيتۋتىنىڭ (الەۋمەتتىك-ەكونوميكالىق اۋرۋلار مەن جۇيەلىك قاۋىپتەردىڭ اسەرىن زەرتتەۋ جونىندەگى ۇلتتىق ينستيتۋت) ماماندارى COVID-19 پاندەمياسى كەزىندە 32 تولىق ەمەس وتباسىن باقىلاپ، قازىرگى كۇردەلى جاعدايدىڭ سەبەبى جالعىزباستى انالاردىڭ ەڭبەك نارىعىنداعى وسالدىعى مەن ماتەريالدىق تاپشىلىعىنا بايلانىستى ەكەنىن ايتتى.
زەرتتەۋلەر كورسەتكەندەي، مۇنداي وتباسىلاردا ءجيى كەزدەسەتىن قيىندىقتاردىڭ ءبىرى - ازىق-تۇلىك تاپشىلىعى. اقشا جەتىسپەگەندىكتەن، جالعىزباستى انالار تابىس تابۋ ءۇشىن قان پلازماسىن تاپسىرۋ سياقتى امالدارعا جۇگىنەدى.
ال ارناۋلى ۇكىمەتتىك ەمەس ۇيىمدار مەملەكەت تاراپىنان بەرىلەتىن الەۋمەتتىك كومەكتىڭ جەتكىلىكسىزدىگىن دە سىنعا الادى.
