چەحيادا جاڭا مەملەكەتتىك ۆيزۋالدىق ستيل بەكىتىلدى
استانا. KAZINFORM - كەلەسى جىلدىڭ ءساۋىر ايىنا قاراي چەحيانىڭ بارلىق مەملەكەتتىك ورگانى ۇكىمەت بەكىتكەن جاڭا مەملەكەتتىك ۆيزۋالدىق ستيلدى تولىق ەنگىزەدى، دەپ حابارلايدى ازەرتادج.
2025-جىلدىڭ سوڭىنا دەيىن مەملەكەت تۋرالى ۆيزۋالدىق سايكەستەندىرۋ ەلەمەنتتەرىن قانداي جاعدايدا جانە قالاي قولدانۋ كەرەكتىگى جونىندە نۇسقاۋلىق تا دايىندالادى. وسىلايشا چەحيا ۇلى بريتانيا، نيدەرلاندى، گەرمانيا، شۆەتسيا سياقتى وزىندىك ەرەكشە ۆيزۋالدىق ستيلى بار ەلدەردىڭ قاتارىنا قوسىلادى.
مەملەكەتتىك تاپسىرىسپەن Studio Najbrt كومپانياسى ازىرلەگەن چەح فيرمالىق ستيلىنىڭ نەگىزگى ەلەمەنتى - ارىستان بەينەلەنگەن لوگوتيپ. بۇل سيمۆول قىزىل تىكبۇرىشتى قالقانى، ونىڭ شەتىندە كوك جولاق (چەح تريكولورىنا سايكەس) جانە ۇستىڭگى بولىگىندە ورمەلەپ تۇرعان اق ەكى قۇيرىقتى ارىستاندى كورسەتەدى.
قاراپايىم نۇسقادا كوك كونتراستتى جولاق جوق، ءبىراق كوك ءتۇس جازۋلاردا قولدانىلادى، ال جازۋ ءۇشىن ارنايى «Czechia Sans» اتتى شريفت جاسالعان.
چەحيا سىرتقى ىستەر ءمينيسترىنىڭ باسشىسى يان ليپاۆسكيدىڭ ايتۋىنشا، جاڭا فيرمالىق ستيل زاماناۋي گرافيكالىق ديزاين تالاپتارىنا ساي بولۋى عانا ەمەس، سونىمەن قاتار گەرالديكالىق ەلەمەنتتەردى ساقتاپ، مەملەكەتتىك رامىزدەرمەن قايشىلىقسىز ءارى مەملەكەتتىك باسقارۋ جۇيەسىنىڭ ۇلتتىق ەرەكشەلىگىنە سايكەس بولۋى ماڭىزدى بولعان.
بۇدان بۇرىن چەحيادا اپتاپ ىستىقتان قويماداعى وق-دارىلەر جارىلا باستاعانىن حابارلاعان ەدىك.
