چەحيا سىرتقى ىستە ءمينيسترى: ءبىز قازاقستانعا جىلقى تۇقىمىن تۇرلەندىرۋگە كومەكتەسەمىز

استانا. KAZINFORM - چەحيا قازاقستانمەن جەتكىزۋ تىزبەگىندەگى اسا ماڭىزدى شيكىزات ءوندىرىسىن سالاسىندا ارىپتەستىك ورناتۋعا نيەتتى. چەح رەسپۋبليكاسىنىڭ سىرتقى ىستەر ءمينيسترى يان ليپاۆسكي قازاقستان پرەمەر-ءمينيسترىنىڭ ورىنباسارى - سىرتقى ىستەر ءمينيسترى مۇرات نۇرتىلەۋمەن وتكەن كەزدەسۋدەن كەيىن ب ا ق وكىلدەرىنە وسىنداي مالىمەت بەردى.

«ەنەرگەتيكا، ينجينيرينگ، سۋىل شارۋاشىلىعى سياقتى سالالاردا ءوزارا ىقپالداستىق دامىپ كەلەدى. بەلگىلى ءبىر ناتيجەلەر دە بار. Skoda, Total Eng سياقتى كومپانيالار قازاقستان نارىعىندا باياعىدان جۇمىس ىستەپ كەلەدى. تاعى ەكى كومپانيا جۋىقتا قازاقستان جۇمىس ىستەپ باستايدى. ءبىز، سونداي- اق، جەر قويناۋىن يگەرۋ، جەتكىزۋ تىزبەگىندەگى اسا ماڭىزدى شيكىزات ماتەريالدارىن ءوندىرۋ سالالارىنداعى ارىپتەستىكتىڭ زور الەۋەتىن كورىپ وتىرمىز. بۇل باعىتتار ءبىزدىڭ ارىپتەستىكتىڭ تاعى ءبىر ماڭىزدى باعىتى بولادى دەپ ۇمىتتەنەمىز»، - دەدى.

چەحيا ءمينيسترى عىلىم سالاسىنداعى ەكىجاقتى بايلانىستارعا توقتالدى.

«بۇگىنگى كەزدەسۋ كەزىندە عىلىمي زەرتتەۋ، بيزنەس بايلانىستاردى دامىتۋ ماسەلەسىندە ارىپتەستىكتى نىعايتۋ تۋرالى كەلىسىمگە كەلدىك. سونداي-اق استانادا چەح جانە قازاقستان رەسپۋبليكالارىنىڭ اراسىندا بىرلەسكەن زەرتتەۋ ينستيتۋتىن قۇرماقشىمىز.

پرجيەۆالسكي جىلقىسىنىڭ تۇقىمىن قازاقستاندا جانداندىرۋ جوباسىنىڭ ءساتتى ىسكە اسىرىلىپ باستاعانىن اتاپ وتكىم كەلەدى. بۇل جىلقى تۇقىمى قازاقستاندا دا تانىمال بولادى دەپ ۇمىتتەنەمىن. 2024 -جىلدىڭ شىلدە ايىندا پراگادان قازاقستانعا العاشقى جەتى جىلقى جىبەرىلگەن. كەلەسى جىلى 30-40 باس جىلقى تاعى جىبەرۋ جوسپارلانىپ وتىر. ءبىز قازاقستانداعى جىلقى تۇقىمىن تۇرلەندىرۋگە كومەكتەسەمىز، كەرقۇلانداردى قازاقستانعا ورالتامىز دەپ ۇمىتتەنەمىز»، - دەدى يان ليپاۆسكي.

ەسكە سالا كەتەيىك، چەحيا سىرتقى ىستەر ءمينيسترىنىڭ قازاقستان- چەحيا ىنتىماقتاستىعىنىڭ الەۋەتى زور ەكەنىن ايتقانىن جازعان ەدىك.

اۆتور
ەسىمجان ناقتىباي