حورۆاتيا پرەزيدەنتى يزرايلدىڭ ساياساتىن قاتاڭ سىنعا الدى

استانا. KAZINFORM - حورۆاتيا پرەزيدەنتى زوران ميلانوۆيچ يزرايل ا ق ش- تىڭ قولداۋىن پايدالانا وتىرىپ، ەشقايدا اپارمايتىن قىلمىستىق ساياسات جۇرگىزىپ جاتقانىن مالىمدەدى، دەپ جازدى انادولى اگەنتتىگى.

مەملەكەت باسشىسى بۇل پىكىرىن زاگرەب قالاسىنداعى رەسمي ءىس-شارادان كەيىن جۋرناليستەردىڭ سۇراقتارىنا جاۋاپ بەرە وتىرىپ ايتتى.

يزرايلدىڭ يرانعا جاساعان شابۋىلىنان باستالعان قاقتىعىسقا توقتالعان ميلانوۆيچ:

- يزرايل كوپ جىلدان بەرى نە ىستەيمىن دەسە دە، ەرىككە يە بولىپ وتىر - بۇل ايقىن. مەنىڭشە، ءبىز مۇنداي مەملەكەتپەن جانە ونىڭ باسشىلارىمەن ەش بايلانىستا بولماۋىمىز كەرەك. يزرايلدىڭ جۇرگىزىپ وتىرعان قىلمىستىق ساياساتى ەشقانداي وڭ ناتيجەگە اكەلمەيدى، جانە وكىنىشكە قاراي، ولار بۇل ىستە ۆاشينگتوننىڭ قولداۋىنا يە، - دەدى.

سونداي-اق ول:

- بىرەۋلەر دۇنيەجۇزىلىك قاقتىعىستى تۇتاندىرعىسى كەلەدى جانە بۇعان كۇش پەن زورلىق ارقىلى قول جەتكىزۋدە. ولار بۇل ارەكەتتەرىن امەريكالىق قارۋلارمەن جاساپ جاتىر، - دەپ قوستى.

ميلانوۆيچتىڭ ايتۋىنشا، حورۆاتيا دا پالەستينانى تاۋەلسىز مەملەكەت رەتىندە مويىنداۋى ءتيىس. ول يزرايلدىڭ «ۇسقىنسىز» ساياساتى جايلى اشىق ايتۋ قاجەتتىگىن اتاپ ءوتتى.

- قىلمىسكەرلەر ءتيىستى جازاسىن الۋى كەرەك. قازىرگى يزرايل ۇكىمەتىنىڭ كەيبىر وكىلدەرى وسى ءۇشىن جاۋاپتى، - دەپ قورىتىندىلادى حورۆاتيا پرەزيدەنتى.

ەسكە سالا كەتەيىك، يراننىڭ جوعارعى كوشباسشىسى ترامپقا جاۋاپ رەتىندە يراندى ەشكىم شەگىنۋگە ماجبۇرلەي المايتىنىن ايتقان بولاتىن.