حوش ءيىس ادامنىڭ جانىن ەمدەيدى: اروماتەراپيانىڭ قۇپياسى

استانا. KAZINFORM - حوش ءيىس ارقىلى ادامداردىڭ ىشكى دۇنيەسىنە ۇڭىلۋگە بولادى. ەرەكشە تەراپيانىڭ ءتۇرى تۋرالى «بۇگىن LIVe» جوباسىنىڭ كەزەكتى سانىنا قوناق بولعان زارينا ياروتسكايا ايتىپ بەردى.

- ءبىز حوش ءيىس ارقىلى ادامدارعا تەست جاسايمىز. وندا ادامداردىڭ ىشكى دۇنيەسىندە بولىپ جاتقان كوڭىل كۇيىن انىقتايمىز. تەراپياعا كەلگەن ادام 25 تەن اسا حوش ءيىس يىسكەيدى. سول يىسكەگەن حوش ءيىسى ۇناسا، وعان «+» بەلگىسىن قالدىرادى. ۇناتپاسا «-» دەپ بەلگىلەيدى. سوعان قاراپ ءبىز ادامداردىڭ قانداي كوڭىل كۇيدە وتىرعانىن تەكسەرىپ بەرەمىز، - دەيدى ول.

اروماتەراپيەۆتتىڭ ايتۋىنشا، ءار ادامنىڭ وزىنە ءتان حوش ءيىسى بولادى. تەك بولمىسىنا ساي كەلەتىن ءيىستى دۇرىس تاڭداۋ ماڭىزدى.

- ءبىز تەست جاساۋ ارقىلى ءار ادامنىڭ ءوز حوش ءيىسىن تاڭداپ بەرەمىز. قالاي دەيسىز عوي؟! مەنىڭ پراكتيكامدا بىزگە كەلگەن ادامداردىڭ 80 پايىزى مانسابىن دوڭگەلەتكىسى كەلەدى. «اقشامدى كوبەيتسەم» دەيدى. بىرەۋلەر قارىم-قاتىناستى شەشكىسى كەلەدى. ال كەيبىرەۋلەر ماحاببات سەزىمىمەن كومەككە جۇگىنەدى. سول كەلۋشىلەردىڭ ءارتۇرلى سۇرانىسىنا بايلانىستى ءبىز تەست جۇرگىزەمىز. سوسىن سول ادامنىڭ كوڭىل كۇيىنە بايلانىستى ارنايى حوش ءيىس دايىنداپ بەرەمىز. ول اروماتتى سەبۋ ارقىلى ادامنىڭ سۇرانىسى يىسپەن، مۇرىنمەن ءتۇپساناعا جەتەدى. ول ءتۇپسانادا ۇيىقتاپ جاتقان رەسۋرستاردى وياتا باستايدى. رەسۋرستار ويانعان كەزدە ادامدا وي وزگەرەدى عوي جانە مۇمكىندىكتەر پايدا بولادى. سول مۇمكىندىكتەر ارقىلى تابىسقا جەتە باستايدى، - دەيدى مامان.

زارينا ياروتسكايا اروماتەراپيانىڭ قالاي جۇرگىزىلەتىنىن ءتۇسىندىردى.

- بىرىنشىدەن، ءبىز ارومات ارقىلى ەرلى- زايىپتىلاردىڭ نەمەسە قىز بەن جىگىتتىڭ قارىم- قاتىناسىن، ولاردىڭ جۇمىستاعى كوڭىل كۇيىن، كاسىبىنىڭ تابىس اكەلىپ، اكەلمەيتىنىن، ءتىپتى ايەل ادامنىڭ ءوزىن-ءوزى قانشالىقتى جاقسى كورەتىنىن انىقتاي الامىز. ادامنىڭ ومىرگە دەگەن كوزقاراسى، ىشكى پەيىلى، قانداي وزگەرىس كەزەڭىندە جۇرگەنى - ءبارى وسى ارقىلى كورىنىپ تۇرادى. ءبىز ارومات كومەگىمەن ادامداردى تانىپ قانا قويماي، شىن مانىندە كومەكتەسە الامىز. كوپ ادام وزگەرگىسى كەلەدى، ءومىرىن جاقسارتقىسى كەلەدى. ءبىراق نەدەن باستارىن بىلمەيدى. ءبىز سول وزگەرىستى باستاۋعا يتەرمەلەيتىن ءبىرىنشى قادامدى ۇسىنامىز. ولاردىڭ ومىرىندە قانداي كۇيزەلىس بولىپ جاتقانىن، قانداي وزگەرىسكە مۇقتاج ەكەنىن كورىپ، باعىت- باعدار بەرەمىز. شىن نيەتپەن كەلگەن ادامدار بىزدەن تەست ءوتىپ، ارتىنان بىردەن كەرى بايلانىس بەرىپ، ناتيجەلەرىن جازىپ جاتادى، - دەيدى اروماتەراپيەۆت.

ءتۇرلى حوش ءيىستى اتىرلەرمەن جۇمىس ىستەيتىن مامان ەكولوگيالىق تازا ءيىسسۋدى دۇرىس تاڭداۋ لايفحاگىن ءبولىستى.

- ەگەر سەۋىپ جۇرگەن اتىرلەرىڭىزدى تەكسەرگىلەرىڭىز كەلسە، ۇيدە وتىرىپ ساراپتاما جاساۋعا بولادى. ول ءۇشىن ارنايى تەحنيكا بار. ايناعا ءوزىڭىزدىڭ ءاتىرىڭىزدى سەبەسىز. كەيىن سول جەرگە وت تۇتاتساڭىزدار، ءتۇتىن شىعادى. ەگەر سول جەردەن قارا ءتۇتىن شىقسا، دەمەك ول ءاتىر ەكولوگيالىق زياندى. ال ەگەر ءتۇتىنى ءتۇسسىز، اقشىل بولىپ شىعىپ جاتسا، وندا زيانى جوق اروماتتى سەۋىپ ءجۇرسىز، - دەيدى ول.