حۋتورلىق توبى: اتىشۋلى حاسان قاسىمبايەۆ ۇستالدى

قوناەۆ. KAZINFORM - الماتى وبلىسىنىڭ پوليتسياسى حاسان قاسىمبايەۆتى قاماۋعا الدى. بۇعان دەيىن 16 جاستاعى شەرزات پولاتتىڭ ولىمىنەن كەيىن تالعارلىقتار ونى «حۋتورسكيە» توبىنىڭ باسشىسى بولۋى مۇمكىن ەكەنىن ايتقان بولاتىن.

الماتى وبلىسى پوليتسيا دەپارتامەنتىنىڭ مالىمەتىنە سايكەس، بيىل 2-قاراشا كۇنى ح. قاسىمبايەۆ 2021 -جىلى ماۋسىمدا ا. ازاماتىن ۇرلاپ، دەنساۋلىعىنا قاساقانا اۋىر زيان كەلتىردى دەگەن كۇدىكپەن ۇستالدى جانە ۋاقىتشا ۇستاۋ يزولياتورىنا ورنالاستىرىلدى.

- قازىرگى ۋاقىتتا قىلمىستاردىڭ بارلىق جاعدايلارىن جان-جاقتى، تولىق جانە وبەكتيۆتى زەرتتەۋدى قامتاماسىز ەتۋ ءۇشىن تەرگەۋ ارەكەتتەرىنىڭ كەشەنى جۇرگىزىلىپ جاتىر. ءىس ماتەريالدارى بۇلتارتپاۋ شاراسىن سانكتسيالاۋ ءۇشىن سوتقا جىبەرىلدى. تەرگەۋ وبلىستىق پوليتسيا دەپارتامەنتى باسشىلىعىنىڭ باقىلاۋىندا. تەرگەۋ مۇددەسى ءۇشىن وزگە دە اقپارات جاريالاۋعا جاتپايدى، - دەپ حابارلادى وبلىستىق پوليتسيا دەپارتامەنتىنىڭ باسپا ءسوز قىزمەتى.

ەسكە سالايىق، الەۋمەتتىك جەلىدە حاسان قاسىمبايەۆ قىلمىستىق توپتىڭ جەتەكشىسى بولۋى مۇمكىن ەكەنى تۋرالى اقپارات تاراعاننان كەيىن ول بەينەۇندەۋ جاريالاعان بولاتىن. وندا قاسىمبايەۆ ەشقانداي قىلمىستىق توپقا قاتىسى جوق ەكەنىن ايتتى.

بۇعان دەيىن 4-قازان كۇنى تالعار قالاسىنداعى توبەلەستەن 16 جاستاعى شەرزات پولات كوز جۇمعانىن جازعانبىز.

ىشكى ىستەر ءمينيسترى ەرجان سادەنوۆ الماتى وبلىسى تالعار اۋدانىنداعى جاس ءوسپىرىمنىڭ ولىمىنە قاتىستى ءىستى جەكە باقىلاۋىنا الدى.

12-قازان تۇندە قارا جامىلعان وتباسىنىڭ ءۇيى ورتەنىپ كەتتى. الماتى وبلىسىنىڭ پوليتسيا دەپارتامەنتى بوتەننىڭ مۇلكىن قاساقانا جويۋ فاكتىسى بويىنشا ءىس قوزعالدى.

ىشكى ىستەر مينيسترلىگىنىڭ وكىلدەرى ب ا ق قىزمەتكەرلەرىنە شەرزات پولات قازا تاپقان جەردە كامەراعا ءتۇسىپ قالعان ۆيدەونى كورسەتتى.

اۆتور
دوسبول اتاجان