حاسان قاسىمبايەۆقا قاتىستى ءىس سوتقا جولداندى
قونايەۆ. KAZINFORM - قازاقپارات ساۋالىنا جاۋاپ بەرگەن الماتى وبلىسىنىڭ پروكۋراتۋراسى حاسان قاسىمبايەۆقا قاتىستى ءىس قانداي ساتىدا ەكەنىن حابارلادى.
پروكۋراتۋرا مالىمەتىنشە، الماتى وبلىسى پوليتسيا دەپارتامەنتىنىڭ تەرگەۋ باسقارماسى ح. قاسىمبايەۆ جانە باسقا تۇلعالارعا قاتىستى قىلمىستىق ءىس بويىنشا تەرگەپ- تەكسەرۋدى اياقتاپ، وسى جىلدىڭ 21-شىلدەسىندە ءىستى ايىپتاۋ اكتىسىمەن وبلىس پروكۋراتۋراسىنا جولداعان.
ال وبلىس پروكۋراتۋراسى 29-شىلدەدە ءىس بويىنشا قۇرىلعان ايىپتاۋ اكتىسىن بەكىتىپ، ءىستى قاراۋ ءۇشىن تالعار اۋداندىق سوتىنا جولداعانىن حابارلادى.
الماتى وبلىستىق پوليتسيا دەپارتامەنتىنىڭ مالىمەتىنە سايكەس، حاسان قاسىمبايەۆقا قاتىستى ادام ۇرلاۋ، دەنساۋلىققا قاساقانا اۋىر زيان كەلتىرۋ جانە بوپسالاۋ فاكتىلەرى بويىنشا تەرگەۋ امالدارى جۇرگىزىلدى.
ەسكە سالايىق، بىلتىر قاراشا ايىندا حاسان قاسىمبايەۆ قاماۋعا الىندى.
بۇعان دەيىن 16 جاستاعى شەرزات پولاتتىڭ ولىمىنەن كەيىن تالعارلىقتار ونى «حۋتورسكيە» توبىنىڭ باسشىسى بولۋى مۇمكىن ەكەنىن ايتقان ەدى.
كەيىن ىشكى ىستەر ءمينيسترىنىڭ ءبىرىنشى ورىنباسارى باۋىرجان الەنوۆ كاسىپكەر حاسان قاسىمبايەۆقا قاتىستى تۇسىنىك بەردى.
