حاسان ناسراللانى جەرلەۋ ءراسىمى 4-قازاندا وتەدى
استانا. KAZINFORM - ليۆانداعى شەيىتتىك «حەزبوللا» قوزعالىسىنىڭ باس حاتشىسى حاسان ناسراللانى جەرلەۋ ءراسىمى جۇما كۇنى وتەدى. بۇل تۋرالى بەيسەنبى كۇنى يراكتاعى يرانشىل جاساقپەن بايلانىسى بار Sabereen News-تىڭ Telegram ارناسى حابارلادى.
ارنايى دەرەككوزگە سىلتەمە جاساعان قىسقا مالىمدەمەدە سەيەد حاسان ناسراللانى جەرلەۋ جۇما كۇنى وتەتىنى حابارلانعان.
ءبىراق جەرلەۋ ءراسىمىنىڭ ورنى دا، ۋاقىتى دا كورسەتىلمەگەن.
«حەزبوللا» ۇيىمىنىڭ باس حاتشىسى 27-قازاندا ليۆان توبىنىڭ ورتالىق شتاب-پاتەرى ورنالاسقان بەيرۋتتىڭ وڭتۇستىك شەتىندەگى كۇشتى اۋە شابۋىلى كەزىندە قازا تاپتى. ونىمەن بىرگە استىرتىن شتابتا توپتىڭ باسقا دا مۇشەلەرى، سونداي-اق يران توڭكەرىس ساقشىلارىنىڭ گەنەرالى قازا تاپتى.
حاسان ناسراللا 64 جاستا بولعان، ول توپتى 32 جىل بويى باسقارىپ كەلگەن.
«حەزبوللا» ءالى كۇنگە دەيىن كوشباسشىسىنىڭ جەرلەۋ ءراسىمى تۋرالى ەشقانداي مالىمەتتەردى جاريالاعان جوق.
ءبىرقاتار اقپارات قۇرالدارى جەرلەۋ ءراسىمى قاي جەردە وتەتىنى تۋرالى بولجام ايتتى. ليۆاننىڭ LBC راديوحابار تاراتۋ كورپوراتسياسى ءراسىمنىڭ بەيرۋتتىڭ وڭتۇستىك شەتىندە، ليۆاننىڭ وڭتۇستىگىندە نەمەسە بەكاا القابىندا وتكىزۋ نۇسقاسىن بولجايدى. الايدا، يزرايلدىڭ ۇزدىكسىز سوققىلارىن ەسكەرە وتىرىپ، بۇل نۇسقا قازىرگى ۋاقىتتا ەكىتالاي بولىپ كورىنەدى.
سونداي-اق، «حەزبوللا» ونىڭ دەنەسىن شەتەلگە تاسىمالداۋى مۇمكىن دەگەن بولجام بار، ونىڭ ەڭ ىقتيمال جەرى يمام حۋسەين جەرلەنگەن يراكتاعى شەيىتتەردىڭ قاسيەتتى قالاسى كەربالا بولۋى مۇمكىن.
جەكسەنبىدە يراك پرەمەر-ءمينيسترى مۇحاممەد شيا ءال-سۋدانيدىڭ كەڭەسشىسى ابدۋل ءامىر تايبان X الەۋمەتتىك جەلىسىندە ناسراللانىڭ «يراكتا ونىڭ اتاسى يمام حۋسەيننىڭ قابىرىنىڭ جانىنا» جەرلەنەتىنىن جاريالادى.
اۆتور
ەركەجان سماعۇلوۆا
