حاربيندە وتەتىن قىسقى ازيا ويىندارىنا كىل مىقتىدان كىم بارادى

استانا. KAZINFORM - قىتايدىڭ حاربين قالاسىندا وتەتىن قىسقى ازيادا ويىندارىنا ەل سپورتشىلارىنىڭ ءۇش قۇرامى دا تىركەلگەن. ءبىراق، بايراقتى باسەكەگە كىم قاتىساتىنىن باپكەرلەر انىقتايدى.

ۇلتتىق وليمپيادا كوميتەتىنىڭ مالىمەتىنشە، قازىرگى ۋاقىتتا قىسقى ازيا ويىندارىن ۇيىمداستىرۋشىلارمەن اتالعان بايراقتى باسەكەگە قازاقستاننىڭ سپورت دەلەگاتسياسىنىڭ قاتىسۋىن ۇيىمداستىرۋ ماسەلەلەرى بويىنشا قارقىندى جۇمىس جۇرگىزىلىپ جاتىر. ەلىمىزدىڭ سپورتشىلارى 9-قىسقى ازيا ويىندارى باعدارلاماسىنا كىرگەن سپورتتىڭ 11 ءتۇرىنىڭ 10 ىنا قاتىسۋدى جوسپارلاپ وتىر.

ولار مىنالار:

1. كونكيمەن جۇگىرۋ سپورتى؛
2. شورت-ترەك؛
3. مانەرلەپ سىرعاناۋ؛
4. حوككەي؛
5. كەرلينگ؛
6. تاۋ شاڭعىسى سپورتى؛
7. شاڭعى جارىسى؛
8. فريستايل (تەك اكروباتيكا)؛
9. بياتلون؛
10. سكي-الپينيزم (شاڭعى ءالپينيزمى، سپورتتىڭ جاڭا ءتۇرى).

قازاقستان سپورتشىلارى سنوۋبورد جارىستارىنا قاتىسپايدى.

- بۇگىندە حاربين-2025 ازيا ويىندارىنىڭ اككرەديتتەۋ جۇيەسىنە 450 دەن استام ادام تىركەلدى. تىركەلگەن تۇلعالاردىڭ باسىم بولىگىن سپورتشىلار قۇرايدى. ويتكەنى، الدىن الا ءوتىنىم سپورتشىلاردىڭ ءۇش قۇرامىمەن بەرىلگەن. ال ويىندار جاقىنداعاندا باپكەرلەرگە قاتىسۋشىلاردىڭ تىركەلگەن تىزىمىنەن قازاقستان اتىنان قىتايدا كىم ونەر كورسەتەتىندىگىن انىقتاۋعا تۋرا كەلەدى، - دەدى ۇلتتىق وليمپيادا كوميتەتىنەن.

جارىستار ءبىر بىرىنەن 260 شاقىرىم قاشىقتىقتا ورنالاسقان ەكى ءتۇرلى كلاستەردە، اتاپ ايتقاندا مۇز ۇستىندەگى سپورت تۇرلەرى حاربيندە، ال شاڭعى سپورتى تۇرلەرى يابۋليدە وتەدى. العاشقى جارىستار ويىنداردىڭ رەسمي اشىلۋ سالتاناتى بولماي تۇرىپ باستاپ كەتەدى. ويتكەنى، كەيبىر جارىس تۇرلەرىنە ويىندارعا بولىنگەننەن ۇزاعىراق ۋاقىت قاجەت.

- وسىعان بايلانىستى سپورتشىلار ءتۇرلى قالادا بولادى. بارلىعىنا ارنالعان ءبىرىڭعاي قالاشىق بولمايدى. دەلەگاتسيانىڭ بارلىق مۇشەسى ويىندى ۇيىمداستىرۋ كوميتەتى بەلگىلەگەن مامانداندىرىلعان، اككرەديتتەلگەن قوناق ۇيلەرگە ورنالاستىرىلادى، - دەدى كوميتەتتەن.