حاربين-2025: ازيا ويىندارىندا قازاقستان قۇراماسى قانداي فورما كيەدى
استانا. KAZINFORM - قازاقستان رەسپۋبليكاسى تۋريزم جانە سپورت مينيسترلىگى 2025-جىلدىڭ 7-14-اقپان ارالىعىندا قىتايدىڭ حاربين قالاسىندا وتەتىن IX قىسقى ازيا ويىندارىندا ۇلتتىق قۇراما كيەتىن سپورتتىق فورماسىن تانىستىردى.
قازاقستان رەسپۋبليكاسى تۋريزم جانە سپورت مينيسترلىگى ۇلتتىق قۇرامانىڭ
جاڭا فورما حالىقارالىق ستاندارتتارعا ساي ازىرلەنىپ، ۇلتتىق تالاپتار تولىق ەسكەرىلگەنىن اتاپ ءوتتى.
نەگىزگى تۇستەر - قويۋ كوك پەن اشىق كوك. بۇل تۇستەر تۇراقتىلىقتى، تاۋەلسىزدىكتى جانە جاڭا بەلەستەرگە ۇمتىلىستى بەينەلەيدى. اق ءتۇستى ەلەمەنتتەر تازالىقتى جانە سپورتتاعى ادىلدىك قاعيداتتارىن ايقىندايدى.
ديزاين مەملەكەتتىك رامىزدەرمەن: ەلتاڭبا جانە تۋمەن تولىقتىرىلعان.
سونىمەن قاتار فورمانىڭ بەزەندىرىلۋىندە QAZAQSTAN جازۋى، 2025-جىلعى IX قىسقى ازيا ويىندارىنىڭ لوگوتيپى جانە قازاقستان ۇلتتىق وليمپيادا كوميتەتىنىڭ ەمبلەماسى بار.
فورما زاماناۋي تەحنولوگيالارمەن جاسالعان جوعارى ساپالى ماتەريالداردان دايىندالعان.
سپورتشىلاردىڭ جايلىلىعى ءۇشىن تابيعي تەرمورەتتەۋ قاسيەتىنە يە ماتالار قولدانىلدى. سىرتقى كيىم تابيعي مامىقپەن جىلىتىپ، جەڭىل ءارى جىلۋدى ساقتايتىن ەتىپ جاسالعان. سپورتتىق كوستيۋمدەردە سۋىق جاعدايلاردا دا جىلۋ ساقتايتىن جوعارى تەحنولوگيالىق فليس پايدالانىلدى.
فورما جيىنتىعىنا جىلى كۋرتكا، جەلدەن قورعايتىن كوستيۋم، جيلەت، سپورتتىق جانە جاتتىعۋ كيىمدەرى، فۋتبولكا، شورتى، باس كيىمدەر، سپورتتىق اياق كيىم جانە ءارتۇرلى اكسەسسۋارلار كىرەدى.
IX قىسقى ازيا ويىندارىنا ازيانىڭ 32 ەلىنەن 1147 سپورتشى قاتىسادى. جارىس باعدارلاماسى اياسىندا 6 سپورت ءتۇرى جانە 11 ديستسيپلينا بويىنشا 196 مەدال جيىنتىعى ساراپقا سالىنادى.
جاڭا سپورتتىق فورمانىڭ جاسالۋى دەمەۋشىلەر قولداۋىنىڭ ارقاسىندا جۇزەگە استى.
ايتا كەتەيىك، وسىعان دەيىن قىسقى ازيا ويىندارىنا قازاقستاننان 139 سپورتشى قاتىساتىنى تۋرالى جازعان بولاتىنبىز.
اۆتور كۇنسۇلتان وتارباي
