حاماس سودىرلارى قىتاي مەن تايلاند ازاماتتارىن دا ۇرلاپ اكەتكەن
حاماس سودىرلارى ۇرلاپ اكەتكەن Supernova مۋزىكا فەستيۆالى كورەرمەندەرىنىڭ اراسىندا قىتاي ازاماتى بار. قازاقپارات بۇل تۋرالى BBC اگەنتتىگىنە سىلتەمە جاساپ حابارلايدى.

«نوا بەيجىڭدە دۇنيەگە كەلگەن. ول - ءبىزدىڭ قىزىمىز، قارىنداسىمىز جانە دوسىمىز»، - دەلىنگەن قىتايدىڭ يزرايلدەگى ەلشىلىگى تاراتقان حابارلامادا.
نوانى موتوتسيكلگە مىنگەن ءبىر توپ قارۋلى ادام الىپ كەتكەنى كورىنىپ تۇرعان بەينەجازبا قوسا بەرىلگەن.
ديپلوماتيالىق ميسسيانىڭ حابارلاماسىندا ايتىلعانداي، ۇرلانعان ايەلدىڭ ەكى ازاماتتىعى بار - قىتاي حالىق رەسپۋبليكاسى مەن يزرايل.
بۇعان دەيىن ەرىكتى قۇتقارۋ جاساقتارىن بىرىكتىرەتىن يزرايلدىك ZAKA قوعامدىق ۇيىمى مۋزىكالىق فەستيۆال وتكەن جەردەن قازا تاپقان 250-دەن استام ادامنىڭ دەنەسى تابىلعانىن حابارلاعان.
يزرايلدىڭ وڭتۇستىگىندەگى ءشول دالادا ءوتىپ جاتقان جانە ەۆرەيلەردىڭ سۋككوت مەرەكەسىمەن تۇسپا- تۇس كەلەتىن Supernova فەستيۆالىنە شابۋىل سەنبى كۇنى جاسالدى.
الەۋمەتتىك جەلىدەگى كادرلار مەن كۋاگەرلەردىڭ ايتۋىنشا، حاماس سودىرلارى كۇتپەگەن جەردەن پايدا بولىپ، كەلۋشىلەردى اتىپ، كەپىلگە الا باستاعان.
تايلاند سىرتقى ىستەر مينيسترلىگىنىڭ حابارلاۋىنشا، سەنبى كۇنى تاڭەرتەڭ حاماس سودىرلارىنىڭ يزرايلگە شابۋىلى باستاعالى ەلدىڭ 12 ازاماتى قازا تاپتى، تاعى 11 ادام ۇرلانىپ، سەگىزى جاراقات العان.
تايلاندتىق جۇمىسشى BBC Thai-عا سەنبى كۇنى ولىمنەن ارەڭ امان قالعانىن ايتتى.
«مەن جۇك كولىگىنىڭ استىنا كىرىپ كەتتىم. حاماس جاۋىنگەرلەرى مەنى شىعارىپ الىپ، تاپانشانى باعىتتادى»، - دەدى ول.
يزرايلدە تايلاندتىڭ 30 مىڭعا جۋىق ازاماتى بار، تاعى 5 مىڭدايى گازا سەكتورىندا تۇرادى.
اۆتور
زارينا تۋعانبايەۆا