حاماس قولىنداعى تۇتقىنداردىڭ 20 سى عانا ءتىرى بولۋى مۇمكىن

استانا. KAZINFORM - گازا سەكتورىندا حاماس ۇستاپ وتىرعان تۇتقىنداردىڭ ىشىندە ءتىرى قالعاندارىنىڭ سانى 20 ادامنان اسپاۋى مۇمكىن. ولاردىڭ قازا تاپقانى تۋرالى راستالعان دەرەك جوق. بۇل تۋرالى يزرايلدىك دەرەككوزدەرگە سۇيەنە وتىرىپ تاسس ءمالىم ەتتى.

- 20 ادامنان اسپايدى، ولاردىڭ ءولىمى تۋرالى دەرەك جوق، - دەلىنگەن حابارلامادا.

يزرايل تاراپىنىڭ سوڭعى اقپاراتىنا سايكەس، گازا سەكتورىندا تۇتقىندا وتىرعانداردىڭ اراسىندا دونباسس تۋماسى ماكسيم حاركين دە بار. جالپى حاماس-تىڭ قولىندا ءتىرى جانە قازا تاپقان تۇتقىنداردى قوسقاندا شامامەن 50 ادام قالعان.

24- شىلدەدە يزرايل پرەمەر-ءمينيسترى بينيامين نەتانياحۋ حاماس- تىڭ گازا سەكتورىنداعى اتىستى توقتاتۋ جونىندەگى ۇسىنىسقا بەرگەن جاۋابىنا بايلانىستى، 6 -شىلدەدەن بەرى دوحادا ءوتىپ جاتقان كەلىسسوزدەردەن دەلەگاتسيانى كەرى قايتارۋ تۋرالى بۇيرىق بەردى.

سوڭعى باستامالار اياسىندا كەلىسىلگەن 60 كۇندىك اتىستى توقتاتۋ كەزەڭىندە حاماس يزرايلگە 10 ءتىرى تۇتقىندى جانە گازادا قازا تاپقان 18 ادامنىڭ ءمايىتىن تاپسىرۋى ءتيىس بولاتىن. ءوز كەزەگىندە يزرايل سول كەزەڭ ىشىندە ۇزاق مەرزىمگە سوتتالعان 150 پالەستينالىقتى جانە 2023 -جىلعى قازان ايىندا باستالعان اسكەري وپەراتسيادان كەيىن گازا سەكتورىندا تۇتقىندالعان 1100-دەن استام ادامدى تۇرمەدەن بوساتۋعا مىندەتتەلەر ەدى. بۇدان بولەك، ىقتيمال كەلىسىمگە سايكەس، گازا حالقىنا جەتكىزىلەتىن گۋمانيتارلىق كومەك كولەمى ەداۋىر ارتاتىن ەدى.

بۇعان دەيىن ۇلى بريتانيانىڭ پرەمەر-ءمينيسترى كير ستارمەر گازاداعى جاعدايعا بايلانىستى مينيسترلەر كابينەتىنىڭ شۇعىل وتىرىسىن شاقىرعانىن جازدىق.

گازا سەكتورىندا اشتىقتان كوز جۇمعاندار سانى 127 ادامعا جەتتى.