حاماس باسشىسى يسمايل حانيا قاتاردا جەرلەندى

استانا. KAZINFORM - قاتار استاناسىندا پالەستينالىق حاماس قوزعالىسى ساياسي بيۋروسىنىڭ باسشىسى يسمايل حانيانى جەرلەۋ ءراسىمى ءوتتى. ول دوحانىڭ شەتىندەگى لۋسايل زيراتىنا جەرلەندى. بۇل تۋرالى Aljazeera جازدى.

بۇعان دەيىن ساياساتكەردىڭ تابىتى كاتاردىڭ ۇلى مەملەكەتتىك مەشىتىنە قويىلعان بولاتىن. وندا جانازا نامازى وقىلدى. جەرلەۋ راسىمىنە مىڭداعان ادام جينالدى.

راسىمگە قاتار ءامىرى، پرەمەر-مينيستر، يران پرەزيدەنتىنىڭ ءبىرىنشى ورىنباسارى، تۇركيانىڭ سىرتقى ىستەر ءمينيسترى جانە باسقا دا جوعارى لاۋازىمدى تۇلعالار قاتىستى.

ازا تۇتۋ راسىمىندە حاماس باسشىلىعىنىڭ مۇشەلەرى، ونىڭ ىشىندە مارقۇمنىڭ ىقتيمال مۇراگەرى دەپ تانىلعان حاليد ميشال دا بولدى.

سوڭعى جىلدارى حانيا حاماس قوزعالىسىنىڭ ساياسي كەڭسەسى ورنالاسقان قاتار استاناسىندا ءومىر ءسۇردى.

يندونەزيا، ليۆان، مالايزيا، پاكىستان، تۇركيا جانە يەمەننىڭ حۋسيتتەر باقىلاۋىنداعى ايماقتارىندا دا ازا تۇتۋ راسىمدەرى ءوتتى.

راسىمنەن ءبىر كۇن بۇرىن تەگەراندا قوشتاسۋ ءراسىمى ءوتتى.

31-شىلدەدە پالەستينالىق حاماس قوزعالىسى ساياسي بيۋرونىڭ باسشىسى يسمايل حانيانىڭ مەرت بولعانىن حابارلادى.

بۇقارالىق اقپارات قۇرالدارىنىڭ حابارلاۋىنشا، حانيا تەگەراندا بولعان كەزدە جارىلعىش زات ىسكە قوسىلىپ، قازا تاپقان.

حاماس حانيانىڭ ءولىمى ءۇشىن كەك الۋعا ۋادە بەردى. حانيانىڭ يراندا ءولتىرىلۋى تەگەران مەن يزرايل اراسىنداعى شيەلەنىستى ودان ءارى كۇشەيتىپ جىبەردى.

ايتا كەتەيىك، وسىعان وراي كەشە تۇركيا مەن پاكىستان حالقى دا ازا تۇتقانىن حابارلاعان ەدىك.

اۆتور
جاراسقان نۇرىبايەۆ