حاماس پالەستينا مەملەكەتى قۇرىلمايىنشا قارۋ تاپسىرۋدان باس تارتتى
استانا. KAZINFORM - حاماس توبى پالەستينالىقتاردىڭ ۇلتتىق قۇقىقتارى تولىق قالپىنا كەلتىرىلمەيىنشە، قارۋ-جاراقتى تاپسىرۋدان باس تارتاتىنىن مالىمدەدى، دەپ جازدى DW.
بۇعان دەيىن گەرمانيانىڭ سىرتقى ىستەر ءمينيسترى گازا سەكتورىنداعى بەيبىتشىلىك ءۇشىن حاماس-تى قارۋ تاپسىرۋعا شاقىرعان بولاتىن.
تەرروريستىك دەپ تانىلعان حاماس ۇيىمى گازا سەكتورىنداعى قاقتىعىستاردى توقتاتۋ ماقساتىندا جاسالعان قارۋدى تاپسىرۋ تۋرالى ۇندەۋلەردى قابىلدامادى. 2-تامىز، سەنبى كۇنى توپ تاۋەلسىز پالەستينالىق مەملەكەت قۇرىلمايىنشا قارۋدان باس تارتپايتىنىن مالىمدەدى.
- ۇرىستار تەك ۇلتتىق قۇقىقتارىمىز تولىق قالپىنا كەلتىرىلگەندە عانا، ەڭ الدىمەن يەرۋساليمدى استانا ەتكەن ەگەمەن، تاۋەلسىز پالەستينالىق مەملەكەت قۇرىلعاندا توقتاتىلۋى مۇمكىن، - دەلىنگەن حاماس تاراتقان مالىمدەمەدە.
گەرمانيا س ءى م باسشىسى حاماس-تى قارۋدى تاستاۋعا شاقىردى
بۇعان دەيىن گەرمانيانىڭ سىرتقى ىستەر ءمينيسترى يوحانن ۆادەفۋل حاماس تەرروريستەرى قارۋدى تاستاپ، تۇتقىنداردى بوساتىپ، گازاداعى بيلىكتەن باس تارتسا، سوعىس اياقتالادى دەگەن مالىمدەمە جاساعان بولاتىن.
- گەرمانيا ءيزرايلدى قولداۋدى جالعاستىرا بەرەدى جانە حاماس اقىرى نەمىس ازاماتتارىن قوسا العاندا، بارلىق تۇتقىنداردى بوساتىپ، قارۋىن تاپسىرىپ، پالەستينالىق ايماقتارداعى ساياسي ىقپالىنان باس تارتۋى ءۇشىن جۇمىس ىستەيدى. بۇل قوزعالىس ەندى يزرايلگە قاۋىپ توندىرمەۋى كەرەك، - دەدى ول.
مينيستر حاماس-تى «بەرىلۋدەن جانە بۇل سوعىستى توقتاتۋدان باس تارتتى» دەپ ايىپتادى.
ايتا كەتەيىك، الەمنىڭ كوپتەگەن ەلدەرى پالەستينا مەملەكەتىن مويىنداي باستادى. قىركۇيەك ايىندا فرانتسيا دا وسىنداي شەشىم قابىلداۋى مۇمكىن. بۇل ەل باسقا مەملەكەتتەرمەن بىرگە الەم قاۋىمداستىعىن دا وسى قادامعا شاقىرعان بولاتىن.
