حالىقارالىق وليمپيادالاردا جۇلدە العان وقۋشىلار بيىل 77,5 ميلليون تەڭگە سىياقى الدى
استانا. قازاقپارات - 2024 -جىلى قازاقستاندىق وقۋشىلار 35 حالىقارالىق وليمپيادا مەن كونكۋرستارعا قاتىسىپ، 563 مەدال جەڭىپ الدى: 77 سى - التىن، 201 ى - كۇمىس، 285 ى - قولا مەدال، ياعني ءار ەكىنشى قاتىسۋشى جۇلدەگەر اتاندى.
وقۋ-اعارتۋ مينيسترلىگى ورتا ءبىلىم كوميتەتىنىڭ مالىمەتى بويىنشا، بۇگىندە ورتا ءبىلىم بەرۋ جۇيەسىندە 7964 مەكتەپ بار، وندا 3,9 ميلليوننان استام بالا ءبىلىم الىپ، 408 مىڭ پەداگوگ قىزمەت ەتەدى.
2024 -جىلى قول جەتكىزگەن ءىرى جەتىستىكتەردىڭ ءبىرى - حالىقارالىق وليمپيادالارعا قاتىسقان قازاقستاندىق وقۋشىلاردىڭ ءاربىر ەكىنشىسى جۇلدەلى ورىندارعا يە بولدى. قازاقستان قۇراماسىنىڭ قورجىنى جالپى 563 مەدالمەن تولىقتى، ونىڭ ىشىندە 77 التىن، 201 كۇمىس جانە 285 قولا مەدال بار. (وتكەن 2023 -جىلى وقۋشىلار 23 مەدال، ونىڭ ىشىندە 2 التىن، 11 كۇمىس جانە 10 قولا مەدال ۇتىپ العان بولاتىن).
31 قازاقستاندىق وقۋشى الەمنىڭ ەڭ بەدەلدى وليمپيادالارى - حالىقارالىق ماتەماتيكا (IMO)، فيزيكا (IPhO)، بيولوگيا (IBO)، لينگۆيستيكا (IOL)، حيميا (IChO)، گەوگرافيا (IGeO)، جانە ينفورماتيكا (IOI) پاندەرىنەن وليمپيادالارعا قاتىسىپ، 26 مەدال جەڭىپ الدى. ونىڭ ىشىندە 2 التىن، 12 كۇمىس جانە 12 قولا مەدال بار.
اسىرەسە، حيميا ءپانى بويىنشا ەڭ بەدەلدى حالىقارالىق وليمپيادادا (IChO) جانە روبوتوتەحنيكادان «First Global Challenge» الەم چەمپيوناتىندا قازاقستاندىق وقۋشىلار 190 ەلدىڭ اراسىنان وزىپ شىعىپ، ەكى وليمپيادادا دا ءۇش مارتە الەم چەمپيونى اتاندى.
- بۇل جەتىستىكتەر - مەملەكەت باسشىسىنىڭ تاپسىرماسى بويىنشا دارىندى وقۋشىلاردى قولداۋعا باعىتتالعان شارالاردىڭ ناتيجەسى. 2022 -جىلدان باستاپ حالىقارالىق وليمپيادالاردىڭ جەڭىمپازدارى مەن جۇلدەگەرلەرىنە، سونىمەن قاتار ولاردى دايىنداعان پەداگوگتارعا ءبىرجولعى اقشالاي سىياقى قاراستىرىلعان. بيىل 26 وقۋشىعا 77,5 ميلليون تەڭگە جانە 24 پەداگوگقا 6,4 ميلليون تەڭگە سىياقى بەرىلەدى. سالىستىرار بولساق، وتكەن جىلى 23 وقۋشى مەن 20 پەداگوگ جالپى 71,4 ميلليون تەڭگە سىياقى العان بولاتىن. 2022 -جىلى 27 وقۋشى مەن 26 پەداگوگقا بارلىعى 83,7 ميلليون تەڭگە سىياقى بەرىلگەن، - دەپ جازىلعان ورتا ءبىلىم كوميتەتىنىڭ جاۋابىندا.
سونىمەن قاتار، حالىقارالىق وليمپيادالاردىڭ جەڭىمپازدارىنا كەز كەلگەن قازاقستاندىق ج و و-عا تۇسۋگە ءبىلىم گرانتى بەرىلەدى.
ەسكە سالا كەتسەك، التىن مەدال جەڭىپ العان وقۋشى 1500 ايلىق ەسەپتىك كورسەتكىش مولشەرىندە (5 ميلليون 538 مىڭ تەڭگە)، كۇمىس مەدال ءۇشىن - 1000 ا ە ك (3 ميلليون 692 مىڭ تەڭگە)، قولا مەدال ءۇشىن - 500 ا ە ك (1 ميلليون 846 مىڭ تەڭگە) مولشەرىندە اقشالاي سىياقى الادى.
جەڭىمپازدار مەن جۇلدەگەرلەردى دايىنداعان پەداگوگتەرگە مىناداي مولشەردە ءبىرجولعى سىياقى بەرىلەدى:
I دارەجەلى ديپلوم مەن التىن مەدال يەگەرىن دايىنداعان پەداگوگكە - بازالىق لاۋازىمدىق جالاقىنىڭ 26,5 ەسەلەنگەن مولشەرى
II دارەجەلى ديپلوم مەن كۇمىس مەدال يەگەرىن دايىنداعان پەداگوگكە- بازالىق لاۋازىمدىق جالاقىنىڭ 17,5 ەسەلەنگەن مولشەرى
III دارەجەلى ديپلوم مەن قولا مەدال يەگەرىن دايىنداعان پەداگوگكە- بازالىق لاۋازىمدىق جالاقىنىڭ 8,5 ەسەلەنگەن مولشەرى.
سونىمەن بىرگە، بيىل گرەكياداعى روبوتوتەحنيكا بويىنشا FIRST GLOBAL CHALLENGE الەمدىك كەزەڭىندە الماتى قالاسىنىڭ نزم وقۋشىلارى ءابسوليۋتتى جەڭىمپاز اتاندى. بۇل جارىستا قازاقستان ءۇشىنشى جىل قاتارىنان ابسوليۋتتى چەمپيون بولىپ كەلەدى.
ا ق ش-تا روبوتوتەحنيكا بويىنشا FIRST ROBOTICS الەمدىك چەمپيوناتتا ر ف م م وقۋشىلارى جوعارى ماراپاتقا يە بولدى.
تاعى ءبىر جارقىن وقيعا رەتىندە - شىلدە ايىندا قازاقستاندا IBO-2024 ەڭ بەدەلدى بيولوگيا ءپانى بويىنشا حالىقارالىق وليمپيادانىڭ وتكىزىلۋىن اتاۋعا بولادى. وعان 81 ەلدەن 305 جاس بيولوگ پەن 275 عالىم قاتىستى. قازاقستان قۇراماسى %100 مەدالدىك ناتيجە كورسەتكەن.
اۋىل مەكتەپتەرىنىڭ وقۋشىلارىنا ارنالعان رەسپۋبليكالىق پاندىك وليمپيادا ەلىمىزدە ەكىنشى جىل وتكىزىلىپ كەلەدى. ناتيجەسىندە اۋىل وقۋشىلارىنىڭ جۇلدەلى ورىندارعا يە بولۋ كورسەتكىشى 10 ەسەگە ارتىپ، مىڭداعان اۋىل بالالارى ءۇشىن جاڭا مۇمكىندىكتەرگە جول اشتى.
اۆتور
ايجان سەرىكجان قىزى
