حالىقارالىق بالالار كۇنى 1-ماۋسىم مەملەكەتتىك مەرەكە بولا ما - ۇكىمەت جاۋابى
استانا. KAZINFORM - قازىر ۇكىمەت 1-ماۋسىم - بالالاردى قورعاۋ كۇنىن مەملەكەتتىك مەرەكە رەتىندە بەلگىلەۋ ماسەلەسىن تالقىلاپ جاتىر.
- مەرەكەلەر مەن دەمالىس كۇندەرى ازاماتتاردىڭ ءوتىنىشى، ءتۇرلى ۇيىمداردىڭ دەمالىس كۇندەرىن بەلگىلەۋگە قاتىستى ۇسىنىستارى نەگىزىندە بەلگىلەنەدى. باسقا مەملەكەتتەرمەن، اسىرەسە ەكونوميكالىق دامۋى جوعارى ەلدەرمەن سالىستىرعاندا، بىزدە مۇنداي مەرەكەلەردىڭ سانى جەتكىلىكتى. بۇل شىنىمەن دە بەلگىلى ءبىر اسەرىن تيگىزىپ وتىرعان بولار. مەنىڭ ويىمشا، ءوندىرىسى ۇزدىكسىز جۇرەتىن كاسىپورىندار ءبارىبىر جۇمىسىن جالعاستىرادى. ارينە، مەرەكە كۇندەرى بۇل كاسىپورىن اكىمشىلىگى زاڭناماعا سايكەس قىزمەتكەرلەرگە قوسىمشا تولەم تولەۋى ءتيىس. ال بۇل كۇندەرى جۇمىس ىستەگەندەرگە قوسىمشا دەمالىس نەمەسە ەڭبەك دەمالىسىنا قوسىمشا كۇندەر بەرىلۋى قاجەت، - دەدى پرەمەر- ءمينيستردىڭ ورىنباسارى ەرمەك كوشەربايەۆ ۇكىمەت ۇيىندە وتكەن باسپا ءسوز ءماسليحاتىندا.
ودان ءارى ۆيتسە- پرەمەر 1-ماۋسىم حالىقارالىق بالالار كۇنىن رەسمي مەرەكە دەپ جاريالاۋعا قاتىستى ويىن ورتاعا سالدى.
- بۇل مەرەكەگە قاتىستى ماسەلە بىرنەشە رەت تالقىلاندى. سەبەبى بۇل بويىنشا ءوتىنىش وتە كوپ ءتۇستى. ودان بولەك ەنەرگەتيكا سالاسىنىڭ قىزمەتكەرلەرى جۇگىنىپ جاتىر. كوپشىلىك بۇل كۇندى دەمالىس كۇنى ەتىپ بەلگىلەۋ كەرەك دەپ سانايدى، - دەپ تولىقتىردى ۇكىمەت باسشىسىنىڭ ورىنباسارى.
ودان بولەك بالالار كۇنى مەرەكەسىن رەسمي ەتۋگە قاتىستى ەڭبەك جانە حالىقتى الەۋمەتتىك قورعاۋ ءبىرىنشى ۆيتسە-ءمينيسترى اسقاربەك ەرتايەۆ پىكىر ايتتى.
- ەل بويىنشا جالپى 10 مەملەكەتتىك مەرەكە بار. مەرەكە كۇندەرىنە قاتىستى كەز كەلگەن ۇسىنىس مەملەكەتتىك ورگاندارمەن قارالىپ، كەلىسۋ ارقىلى شەشىلەدى. 1-ماۋسىمعا قاتىستى راسىندا دا ۇسىنىس بولدى، قازىر مەملەكەتتىك ورگاندارمەن، ساراپشىلارمەن تالقىلاۋ ءجۇرىپ جاتىر. ونىڭ قورىتىندىسى بويىنشا ناتيجەسىن قوسىمشا حابارلايمىز. تالقىلاۋ قىركۇيەككە دەيىن اياقتالادى، - دەيدى ءمينيستردىڭ ورىنباسارى.
