حالىق سانىنىڭ كوبەيۋى مەملەكەتىمىزدىڭ دامۋىنا قوسىمشا سەرپىن بەرەدى - پرەزيدەنت

جاستار قاۋىمىندا كرەاتيۆتى يندۋستريا قارقىندى دامىپ كەلە جاتىر. بۇل تۋرالى بۇگىن ەلوردادا «التىن ساپا» جانە «پارىز» سىيلىقتارىنىڭ جەڭىمپازدارىن ماراپاتتاۋ كەزىندە مەملەكەت باسشىسى قاسىم-جومارت توقايەۆ ءمالىم ەتتى، دەپ حابارلايدى Kazinform.

«جاقىندا قازاقستان حالقىنىڭ سانى 20 ميلليونعا جەتتى. بۇل - تاريحي بەلەس. وعان بۇكىل ەل بولىپ قۋاندىق. حالىق سانىنىڭ كوبەيۋى مەملەكەتىمىزدىڭ دامۋىنا قوسىمشا سەرپىن بەرىپ، ەلىمىزگە ابىروي اكەلەتىنىنە ەش كۇمان جوق. سوندىقتان ءبىزدىڭ نەگىزگى ماقساتىمىز - بارشا جۇرتىمىزدىڭ ساپالى تۇرمىسىن قامتاماسىز ەتۋ»، - دەدى قاسىم-جومارت توقايەۆ.

سونىمەن قاتار مەملەكەت باسشىسى بىلتىر ەلىمىزدەگى ورتاشا ءومىر ءسۇرۋ ۇزاقتىعى 74,4 جاسقا جەتكەنىن ەسكە سالدى.

«بۇل - ەلىمىزدەگى مەديتسينالىق قىزمەتتىڭ ساپاسىمەن قاتار، ازاماتتاردىڭ ءال-اۋقاتى جاقسارىپ جاتىر دەگەن ءسوز. ۇلت رۋحانياتى دا جاڭاشا وركەن جايىپ كەلەدى. ءىرى قالالاردا، اۋىل-ايماقتاردا مادەني جاڭعىرۋ بايقالۋدا. مىسالى، ەلىمىزدىڭ ءار تۇكپىرىندە اپتا سايىن ونداعان كونسەرت، سپەكتاكل قويىلادى. سوعان قاراماستان جۇرت تەاترعا بيلەت تاپپاي جاتادى. قوعامىمىزدا، اسىرەسە جاستار قاۋىمىندا كرەاتيۆتى يندۋستريا قارقىندى دامىپ كەلە جاتىر. بۇل - وتە جاقسى ۇدەرىس»، - دەدى پرەزيدەنت.

ەسكە سالساق، 2023 -جىلعى 14-قاراشادا قازاقستان رەسپۋبليكاسى حالقىنىڭ سانى 20 ميلليون ادامعا جەتتى.