حالىق ءوز تاڭداۋىن جاسادى - ەرلان قوشانوۆ
استانا. KAZINFORM - ا ە س سالۋ جونىندەگى رەفەرەندۋم اياقتالىپ، داۋىس بەرۋ قورىتىندىسى شىقتى. ءماجىلىس ءتوراعاسى ەرلان قوشانوۆ Facebook-تەگى جازباسىندا كەشە وتكەن رەسپۋبليكالىق رەفەرەندۋم دەموكراتيانىڭ ءىس جۇزىندەگى كورىنىسى ەكەنىن، ساياسي مادەنيەت وسىلاي قالىپتاساتىنىن جازدى.
«بۇگىن ورتالىق رەفەرەندۋم كوميسسياسى داۋىس بەرۋدىڭ الدىن الا قورىتىندىسىن جاريالادى. سوعان سايكەس، سايلاۋشىلاردىڭ %71,12 ا ە س قۇرىلىسىن قولدادى. Exit poll قورىتىندىسى دا وسىعان جاقىن ناتيجە كورسەتتى.
جاڭا ساياسي جاعدايدا تاۋەلسىزدىگىمىزدىڭ 33 جىلدىق تاريحىنداعى ءۇش رەفەرەندۋمنىڭ ەكەۋى مەملەكەت باسشىسى قاسىم-جومارت توقايەۆتىڭ باستاماسىمەن ءوتتى. ءسوز جوق، جاڭا ساياسي مادەنيەت ءدال وسىلاي قالىپتاسادى. ءار ازامات قوعام ءۇشىن ماڭىزدى ماسەلەلەردى شەشۋ ىسىنە تىكەلەي ارالاسىپ، ەل تاعدىرىنا ءوزىنىڭ قاتىستى ەكەنىن سەزىنەدى. بۇل - دەموكراتيانىڭ ءىس جۇزىندەگى كورىنىسى.
دەپۋتاتتار ۇنەمى وڭىرلەردى ارالاپ ءجۇر. ءبىز قوعامدىق سانا وزگەرىپ، جاڭا ساياسي مادەنيەت قالىپتاسىپ كەلە جاتقانىن كورىپ وتىرمىز. تۇرعىندار كەز كەلگەن تاقىرىپ بويىنشا ءوز ۇستانىمىن اشىق ايتىپ، ونى بارلىق دەڭگەيدە باتىل قورعاۋدا. بۇل - پرەزيدەنتتىڭ ادىلەتتى قازاقستاندى قۇرۋعا باعىتتالعان ساياسي رەفورمالار باعدارىنىڭ باستى ناتيجەسى.
رەفەرەندۋم قورىتىندىسى - قوعامداعى كوڭىل-كۇيدىڭ ناقتى كورىنىسى. حالىقتىق شتاب بارلىق وڭىرگە بارىپ، مىڭداعان كەزدەسۋ وتكىزدى. سونىڭ بارىسىندا جالپى قوعام ەل بولاشاعى ءۇشىن ا ە س سالۋدىڭ ماڭىزىن ءتۇسىنىپ وتىرعانىنا كوز جەتكىزدى. كاسىپكەرلەر، شارۋالار، كەنشىلەر، جۇمىسشىلار، جاستار، مۇعالىمدەر، دارىگەرلەر جانە باسقالار دا ەكونوميكاسى دامىعان ەلدە ءومىر سۇرگىسى كەلەدى. ولاردىڭ بارلىعى مۇنىڭ كىلتى ەنەرگەتيكالىق تاۋەلسىزدىك ەكەنىن جانە بۇل ءۇشىن ا ە س سالۋ قاجەت ەكەنىن جاقسى تۇسىنەدى.
بەيبىت اتوم - يننوۆاتسيالىق تۇرعىدا سەنىمدى، قاۋىپسىز، ەكولوگيالىق تازا ەنەرگيا كوزى. بۇل - عىلىمدا، تەحنيكادا، وندىرىستە، اۋىل شارۋاشىلىعىندا جانە وزگە دە كوپتەگەن سالادا كوكجيەگىمىزدى كەڭەيتەتىن الەمدىك ترەند.
وسىلايشا، حالىق ءوز تاڭداۋىن جاسادى. بارشا قازاقستاندىقتى ەلىمىزدىڭ جاڭا تاريحىندا ەرەكشە ورىن الاتىن وسى ايتۋلى وقيعامەن شىن جۇرەكتەن قۇتتىقتايمىن. حالىقتىق شتابتىڭ بارلىق مۇشەلەرىنە - ساياسي پارتيالاردىڭ، قوعامدىق بىرلەستىكتەردىڭ، كاسىپوداقتار مەن قاۋىمداستىقتاردىڭ وكىلدەرىنە العىس ايتقىم كەلەدى. سىزدەر ازاماتتارىمىزدىڭ يگىلىگى ءۇشىن اسا ماڭىزدى ىستەر اتقاردىڭىزدار!»، - دەپ جازدى ە. قوشانوۆ.
ەسكە سالا كەتەيىك، بۇعان دەيىن ورتالىق رەفەرەندۋم كوميسسياسىنىڭ ءتوراعاسى نۇرلان ءابدىروۆتىڭ قازاقستاندىقتاردىڭ 71,12 پايىزى رەفەرەندۋمدا ا ە س قۇرىلىسىن قولداپ داۋىس بەرگەنى تۋرالى ايتقانىن جازعان ەدىك.
