GGG ءنومىرلى كولىكتى جۇرگىزگەن ەلوردالىق ۇستالدى

نۇر- سۇلتان. قازاقپارات - ەلوردادا «قاۋىپسىز جول» رەسپۋبليكالىق جەدەل الدىن الۋ شاراسىنىڭ اياسىندا ەكى كۇن ىشىندە 500 گە جۋىق جول ەرەجەسىن بۇزۋ فاكتىسى انىقتالدى، دەپ حابارلايدى قازاقپارات ءتىلشىسى.

اتالعان زاڭسىزدىققا جول بەرگەن كولىك جۇرگىزۋشىلەردىڭ ىشىندە تەمىر تۇلپارىنا GGG ءارىپتى ءنومىر جاپسىرىپ العان Mercedes-Benz يەسى دە بار.

«پوليسيا قىزمەتكەرلەرى ءتۇن ورتاسىندا اتالمىش كولىكتى توقتاتىپ، قۇجاتتارىن تەكسەرۋ كەزىندە اۆتوموبيلدەگى تىركەۋ بەلگىلەرى ەسەپتەن شىعارىلعانى انىقتالدى. ال GGG ءارىپتى ءنومىردى ول باسقا ادامنان ساتىپ العانى بەلگىلى بولدى. 26 جاستاعى جۇرگىزۋشىنىڭ ۇسىتنەن ستاندارتتىڭ تالاپتارىنا سايكەس كەلمەيتىن نومىرلىك بەلگىلەرى بار اۆتوكولىك جۇرگىزگەنى ءۇشىن اكىمشىلىك قۇقىق بۇزۋ تۋرالى كودەكستىڭ 590-بابى 4-بولىگى بويىنشا اكىمشىلىك ءوندىرىس قوزعالدى. ماتەريال پروتسەسسۋالدىق شەشىم قابىلداۋ ءۇشىن نۇر- سۇلتان قالاسىنىڭ مامانداندىرىلعان اكىمشىلىك سوتىنا جىبەرىلدى. اۆتوكولىك كوممۋنالدىق تۇراققا قويىلدى»، - دەپ جازادى قالالىق پوليسيا دەپارتامەنتىنىڭ باسپا ءسوز قىزمەتى.

ەلوردادا «قاۋىپسىز جول» رەسپۋبليكالىق جەدەل الدىن الۋ شاراسى ءالى ءوتىپ جاتىر. ەكى كۇن ىشىندە پوليتسيا قىزمەتكەرلەرى 500 گە جۋىق جول ەرەجەسىن بۇزۋ وقيعاسىن تىركەگەن. ونىڭ ىشىندە 79 جاياۋ جۇرگىنشى بار. ەكى كۇندە 3 جول- كولىك وقيعاسى تىركەلىپ، 3 ادام زارداپ شەككەن. ەرەجە بۇزعانى ءۇشىن 8 نومىرلىك بەلگى الىنىپ، 7 اۆتوكولىك كوممۋنالدىق تۇراققا قويىلدى.